U Biełarusi zapracavali paštamaty: zabrać pasyłku stanie praściej

«Biełpošta» aficyjna zapuściła ŭ ekspłuatacyju paštamaty. Zaraz atrymać mižnarodnuju pasyłku možna biez čerhaŭ u luby zručny čas. Jak karystacca novymi pryładami i ŭ čym plusy dla klijentaŭ, pakazali siońnia ŭ adnym z samych sučasnych adździaleńniaŭ pošty na pr. Pieramožcaŭ, 123, pieradaje BiełTA. 

Pavialičyć

Paśla testavych vyprabavańniaŭ pačałasia ekspłuatacyja 20 takich pryład samaabsłuhoŭvańnia: 11 ź ich — u stalicy, pa adnym u kožnym abłasnym centry, a taksama ŭ Oršy, Lidzie, Barysavie i Babrujsku. Jak heta pracuje, tłumačyć načalnik upraŭleńnia techničnaha i sietkavaha ŭzajemadziejańnia «Biełpošty» Alaksiej Ćvirka.

Patrapić pasyłka ŭ paštamat albo jaje treba budzie zabrać na pošcie, vyrašaje sam klijent. Dla pieranakiravańnia pasyłki ŭ luby z paštamataŭ klijentu treba zarehistravacca ŭ asabistym kabiniecie na sajcie «Biełpošty» i adzin raz prajści identyfikacyju ŭ najbližejšym da paštamata adździaleńni paštovaj suviazi (treba budzie pradjavić pašpart abo paśviedčańnie kiroŭcy).

«Kali čałaviek rehularna atrymlivaje mižnarodnyja paštovyja adpraŭleńni z zamiežnych internet-kram abo ad svajakoŭ za miažoj, chutčej za ŭsio, klijent karystajecca pasłuhaj pieranakiravańnia.

Jak tolki pasyłka atrymała numar, pa jakim jaje možna adsočvać, pasyłka moža być pieranakiravanaja. U klijenta ŭ asabistym kabiniecie na sajcie «Biełpošty» źjavicca dadatkovaje mieniu «paštamaty». Jon zmoža ŭbačyć ich adrasy i pieranakiravać pasyłku ŭ paštamaty», — tłumačyć Alaksiej Ćvirka. Važny niuans — heta treba zrabić da prachodžańnia mytnaha kantrolu.

Paśla pierasyłki kurjer dastavić pasyłku ŭ paštamat. Pra toje, što možna zabrać pasyłku, klijenta apaviaściać SMS abo listom na elektronnuju poštu, nazvanymi pry rehistracyi ŭ asabistym kabiniecie. U apaviaščeńni budzie kod, jaki adkryje jačejku, i termin znachodžańnia pasyłki ŭ paštamacie (3 sutak — 72 hadziny z momantu dastaŭki). U zručny dla siabie čas klijent moža pryjści i atrymać pasyłku samastojna, nie zachodziačy ŭ adździaleńnie pošty.

Darečy, u jačejek niama numaroŭ. U jakuju ź ich patrapić vaša pasyłka, vyznačaje apieratar, i heta budzie zaležać ad habarytaŭ paštovaha adpraŭleńnia. Praduhledžany jačejki troch typaŭ, pry hetym varta ŭličvać: maksimalnyja habaryty — 50×40×39 sm, maksimalnaja nahruzka na palicu — 30 kh, kali pasyłka ciažejšaja, u paštamat jaje nie źmieściać.

Bolšaść paštamataŭ, jakija pracujuć ciapier, ustalavany kala adździaleńniaŭ suviazi, ale ŭ pryncypie ich mohuć raźmiaščać u handlovych centrach abo inšych miescach.

Kali pasyłka płatnaja (jość nakładny płaciež, mytnyja zbory i h.d.), na ekranie źjavicca infarmacyja pra sumu, jakuju treba apłacić. Zrabić heta možna tolki z dapamohaj bankaŭskaj kartki. Paśla apłaty jačejka aŭtamatyčna adkryjecca — pasyłku možna zabrać. Pa žadańni klijenta paštamat nadrukuje ček. Kali na praciahu 72 hadzin nichto nie pryjšoŭ pa pasyłku, kurjer zabiraje jaje i pieradaje ŭ najbližejšaje adździaleńnie suviazi. Pra toje, dzie ciapier zabrać pasyłku, klijenta prainfarmujuć iznoŭ ža pa SMS ci elektronnaj pošcie.

U pierśpiektyvie sietku paštamataŭ chočuć pašyrać z ulikam raźvićcia internet-handlu. Heta značyć, internet-kramy taksama mahli b pieradavać klijentam pakupki praz paštamaty. Heta dapamoža spraścić «apošniuju milu», h.zn. samu dastaŭku tavaru pakupniku. Uładalniki internet-kramaŭ skaračajuć vydatki na ŭłasnuju kurjerskuju słužbu, a klijenty atrymlivajuć zručny servis. Košt dastaŭki stanie nižejšym. Adpaviedna, dla kančatkovaha spažyŭca tavar akažacca tańniejšym. Hetym šlacham pajšli, naprykład, u Polščy, Litvie, Estonii, Rasii.

• 0
• 0
• 0
• 0
• 0
• 0
• 0
• 0