Staršynia kancerna «Biełnaftachim» Andrej Rybakoŭ patłumačyŭ, čamu košt paliva paetapna pavyšajecca na adnu kapiejku, a nie radziej, ale na bolš istotnyja sumy. «My prapahandujem pieradusim palityku strymanaści. Štotydzień viadziem manitorynh, ci nie źjaŭlajecca trend rostu koštaŭ na naftu ŭsploskam. Pa sukupnaści paramietraŭ vynosim rašeńnie ab nastupnym pavyšeńni (cany na paliva)», — zajaviŭ Andrej Rybakoŭ u efiry ANT.
Andrej Rybakoŭ udakładniŭ, što ŭ sabiekošcie paliva košt nafty zajmaje kala 80%. Pavodle jaho słoŭ, košt nafty vyras z pačatku hoda na 40%, pry hetym «adekvatnaha pavieličeńnia cenaŭ na naftapradukty nie adbyvałasia». «Adekvatnaha, zychodziačy z usich faktaraŭ, u tym liku kursu nacvaluty», — adznačyŭ kiraŭnik «Biełnaftachim».
Pry hetym šmatrazovaje pavyšeńnie ŭ hetym hodzie koštu paliva na adnu kapiejku tolki dazvoliła ŭtrymać na adnym uzroŭni suadnosiny koštu nafty i naftapraduktaŭ, udakładniŭ Andrej Rybakoŭ.
Pavodle jaho słoŭ, u «Biełnaftachimie» kožny tydzień pravodziać manitorynh, «ci nie źjaŭlajecca trend rostu koštaŭ na naftu usploskam». Paśla hetaha prymajecca rašeńnie ab źmienie cen na paliva.
Pavyšeńnie koštaŭ na paliva na adnu kapiejku dazvalaje «adaptavać spažyŭcoŭ da rostu», a taksama «dazvalaje kantralavać situacyju pa roście, zychodziačy z mahčymaha vahańnia (koštaŭ na naftu)».
Andrej Rybakoŭ adznačyŭ, što prodaž paliva na ŭnutranym rynku «hłyboka stratny», što nie moža pierakryć ni ekspart, ni inšyja miery, jakija prymajucca na ŭnutranym rynku.
Nahadajem, z 7 kastryčnika ŭ Biełarusi znoŭ źmianilisia roźničnyja ceny na aŭtamabilnaje paliva. Roźničnyja košty na dyzielnaje paliva i aŭtamabilny bienzin pavialičylisia na 1 kapiejku. Zaraz košt 1 litra bienzinu AI-92-K5-Jeŭra składaje 1 rubiel 38 kapiejek, AI-95-K5-Jeŭra — 1 rubiel 46 kapiejek, AI-98-K5-Jeŭra — 1 rubiel 67 kapiejek, DT — 1 rubiel 46 kapiejek.
Heta dzieviatnaccataje źmianieńnie cenaŭ na aŭtamabilnaje paliva ŭ hetym hodzie.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma12
Kamientary