U Niamieččynie zakryli apošniuju vuhalnuju šachtu ŭ krainie

U historyi Niamieččyny skončyłasia cełaja epocha — epocha zdabyčy kamiennaha vuhalu. Niemcy zanialisia joju bolš za 900 hadoŭ tamu, u 19-m stahodździ vuhal i stal Rurskaj vobłaści zabiaśpiečyli industryjalnuju i vajennuju moc Hiermanskaj impieryi, paśla Druhoj suśvietnaj vajny šmat u čym dziakujučy vuhalu adradžałasia zachodniaja častka krainy i pačynaŭsia praces ekanamičnaj intehracyi Jeŭropy, piša DW.

I voś adna z najvažniejšych u minułym halin niamieckaj ekanomiki spyniła svajo isnavańnie. 21 śniežnia 2018 hoda ŭvojdzie ŭ historyju Niamieččyny jak toj dzień, kali ŭ byłym šachciorskim miastečku Botrapie ŭračysta zakryłasia samaja apošniaja ŭ krainie vuhalnaja šachta Prosper-Haniel. Z hetaha času ŭ Niamieččynie kamienny vuhal z-pad ziamli bolš nie zdabyvajuć. Zachavałasia tolki zdabyča buraha vuhalu adkrytym sposabam u karjerach i razrezach.

Siarod vialikich jeŭrapiejskich vuhalnych dziaržaŭ Hiermanija ŭ spravie zhortvańnia hetaj tradycyjnaj haliny zusim nie pieršaprachodziec. U Bielhii apošniuju šachtu zakryli jašče ŭ 1992 hodzie, u Francyi — u 2004-m, u Vialikabrytanii — u 2015-m. Va ŭsich hetych krainach zdabyču kamiennaha vuhalu spyniali pa ekanamičnych pryčynach. Admova ad jaho z ekałahičnych mierkavańniaŭ (abarona nasielnictva ad smohu, a hłabalnaha klimatu — ad vykidaŭ parnikovych hazaŭ) — tendencyja tolki samaha apošniaha času.

Voś i ŭ Niamieččynie šachciory jašče paŭstahodździa tamu pačali hublać pracu nie z-za baraćby suprać zabrudžvańnia navakolnaha asiarodździa, a z-za źnižeńnia kankurentazdolnaści niamieckaha kamiennaha vuhalu. Jaho, z adnaho boku, usio bolš vyciskali inšyja enierhanośbity — nafta, haz, jadziernaje paliva, ź inšaha boku — impartny vuhal z krain z bolš tannaj pracoŭnaj siłaj, bolš nizkimi standartami techniki biaśpieki i/abo z adkrytym sposabam zdabyčy.

U vyniku z 1960 pa 1980 hodu kolkaść šachtaŭ u Niamieččynie skaraciłasia sa 146 da 39, a da 2000 hoda dažyli tolki 12. Adpaviedna, kolkaść niamieckich šachcioraŭ, jakija składali ŭ 1957 hodzie kala 610 tysiač čałaviek (tady byli zdabytyja rekordnyja amal 150 miljonaŭ ton vuhalu), u 1994 hodzie ŭpieršyniu ŭpała nižej za adznaku 100 tysiač čałaviek, a ŭ pieršym dziesiacihodździ 21-ha stahodździa skaraciłasia prykładna da 30 tysiač. Apošnija try hady ŭ Hiermanii pracavali 2 šachty, na jakich kala 4,5 tysiačy harniakoŭ zdabyvali kala 4 miljonaŭ ton u hod.

Drukujecca ŭ miežach śpiecyjalnaj rubryki «Naviny Hiermanii»

• 0
• 0
• 0
• 0
• 0
• 0
• 0
• 0