Što viadoma pra vychadcaŭ ź Biełarusi, jakija stali ahientami KDB u Łatvii

U adpaviednaści z rašeńniem łatvijskaha Siejma ŭ Nacyjanalnym archivie apublikavali kartateku ahientaŭ KDB. Bolš za 10 tysiač adskanavanych kartak. Heta nie tolki dadzienyja pra ahientaŭ, ale i pra asob, jakich razhladali patencyjnymi kandydatami dla viarboŭki. Jeŭraradyjo vyjaviła kartki bolš za sta vychadcaŭ ź Biełarusi.

1. U asnoŭnym jany pracavali ŭ sudnachodnaj abo čyhunačnaj halinie

Tak siarod zavierbavanych jość matrosy, kursanty ryžskaha marachodnaha vučylišča, elektryki, jakija pracavali na fłot, roznyja čyhunačnyja rabočyja, kranaŭščyki i mnohija inšyja. Łatvija ŭ tyja časy była hetkim «usiesajuznym» portam. Akramia taho, u saviecki čas tam pracavali rybałavieckija fłaty. Zrazumieła, što ŭsio heta patrabavała niemałoj kolkaści śpiecyjalistaŭ. Bałtyjskija respubliki pa ŭzroŭni žyćcia ličylisia vyšej za Uschodnie-Jeŭrapiejskija savieckija respubliki. Tamu apynucca ŭ toj ža Ryzie ahułam chacieli mnohija.

2. Ci jość siarod ich viadomyja ludzi?

Siarod zavierbavanych akazaŭsia ŭžo były kiraŭnik Lukoil Baltija Chaim Kohan. Uradženiec Babrujska, jon pierajechaŭ u Łatviju z baćkami ŭ 1947 hodzie. Byŭ zavierbavany ŭ 1972 hodzie, jamu prysvoili psieŭdanim «Jafimaŭ». Z 1995 hoda Kohan pracavaŭ u kiraŭnictvie Lukoil. Jon pamior u 2011 hodzie, na toj čas zajmaŭ pasadu namieśnika staršyni savieta kampanii.

Pavialičyć

U apublikavanych kartkach ahientaŭ łatvijskaha KDB taksama znajšłasia kartka biełarusa Branisłava Jureviča, 1913 hoda naradžeńnia. Jon byŭ zavierbavany savieckaj vyviedkaj u žniŭni 1944 hoda i pierapraŭleny ŭ Hiermaniju. Z kartki viadoma, što jon mieŭ psieŭdanim «Alfa».

Jurevič uładkavaŭsia na pracu ŭ Hałoŭnaje kiraŭnictva vajskovych spraŭ Biełaruskaj centralnaj rady ŭ Bierlinie, uvajšoŭ u davier da hienierała Kastusia Jezavitava (jany byli znajomyja z časoŭ mižvajennaj Łatvii). A ŭ krasaviku 1945-ha ahient dapamoh «ŚMIERŠ» aryštavać Jezavitava, jaki paśla pieraniesienaj apieracyi nie moh samastojna pierajechać u amierykanskuju zonu akupacyi Niamieččyny.

Pavialičyć

3. Paśla biełarusaŭ, bolš za ŭsio źjazdžała jaŭrejaŭ i palakaŭ

I tut ničoha dziŭnaha. Niahledziačy na departacyju palakaŭ i praviadzieńnie Izrailem palityki repatryjacyi, pradstaŭniki abiedźviuch nacyj dahetul uvachodziać u top-5 pa kolkaści ŭ Biełarusi — paśla biełarusaŭ i ruskich.

4. Ź jakoha času i jak šmat było zavierbavana vychadcaŭ ź Biełarusi?

Pa najaŭnych kartkach ahientaŭ možna skazać, što pieršyja viarboŭki biełarusaŭ u Łatvii pačalisia z momantu jaje zachopu savieckaj armijaj i praciahvalisia až da razvału SSSR. Apošnija viarboŭki, pa apublikavanych kartkach, byli praviedzienyja ŭ śniežni 1990 hoda, užo na parozie niezaležnaści.

Čytajcie. Łatvija adkryła archivy KHB: pravasłaŭny mitrapalit byŭ ahientam i daručyŭ kiravać majomaściu carkvy svajmu kurataru

• 0
• 0
• 0
• 0
• 0
• 0
• 0
• 0