Bahdankievič: «Absalutna niezrazumieła, jak ułady buduć viartać układy nasielnictvu»
Admova najbujniejšych bankaŭ vydavać kredyty na žyllo źjaŭlajecca śviedčańniem pahłybleńnia kryzisu ekanomiki Biełarusi, miarkuje eks-kiraŭnik Nacbanku.
Admova najbujniejšych bankaŭ vydavać kredyty na žyllo źjaŭlajecca śviedčańniem pahłybleńnia kryzisu ekanomiki Biełarusi. Tak ličyć eks‑kiraŭnik Nacbanka Biełarusi prafiesar Stanisłaŭ Bahdankievič.
Jak užo paviedamlałasia, AAT «ASB «Biełarusbank» z 8 śniežnia spyniŭ kredytavańnie kupli žylla. Inšyja biełaruskija banki taksama ŭviali abmiežavańni pa vydačy kredytaŭ nasielnictvu.
«Biełarusbank» i «Biełahraprambank» sa svaimi statutnymi fondami bolš za 1 miljard dalaraŭ kožny źjaŭlajucca sistemaŭtvaralnymi ŭ bankaŭskaj sistemie krainy. Da ŭvahi, na astatnija biełaruskija banki prychodzicca ŭsiaho dzieści paŭmiljardy dalaraŭ statutnych fondaŭ. Tamu
taki fakt jak prypynieńnie vydačy kredytaŭ na kuplu žylla «Biełarusbankam» možna i treba razhladać jak vielmi tryvožny sihnał»,— paviedamiŭ «Biełaruskamu partyzanu» Stanisłaŭ Bahdankievič.
Prafiesar taksama adznačyŭ, što ŭ Biełarusi vielmi mała kažuć ab praŭdzivych pryčynach pryniaćcia rašeńniaŭ va ŭmovach finansavaha kryzisu, jaki razharajecca .
Jon ličyć, što ŭ «Biełarusbanka» užo paŭstali finansavyja ciažkaści.
«Miarkuju, što ŭ hetaha banka paŭstali ciažkaści sa zvarotam raniej vydadzienych pazyk, a taksama z volnymi srodkami. Na vialiki žal, u Biełarusi, u adroźnieńni ad absalutnaj bolšaści krain śvietu, vielmi mała kažuć ab praŭdzivych pryčynach pryniaćcia taho abo inšaha rašeńnia va ŭmovach finansavaha kryzisu, jaki razharajecca. Ja razumieju, što ŭrad kirujecca nie dapuščeńniem paniki i źniaćciem hrošaj inviestaraŭ z bankaŭ. Ale, moža być, na spynieńnie panikiorskich nastrojaŭ lepš by padziejničali inšyja miery. Našy ludzi nie takija ŭžo raziavaki, i zdolejuć sami razabracca ŭ pradastaŭlenaj infarmacyi ab realnym stanoviščy spraŭ u biełaruskaj ekanomicy, u tym liku — bankaŭskim siektary», — upeŭnieny Stanisłaŭ Bahdankievič.
Pa słovach ekśpierta, absalutna niezrazumieła, jakim čynam ułady płanujuć viartać układy nasielnictvu, pakolki najaŭnych reziervaŭ Nacbanka vidavočna niedastatkova dla źjaŭleńnia antykryzisnych strachavych fondaŭ.
«Dziaržava zajaviła, što harantuje zvarot układaŭ nasielnictva. Ale nichto nie skazaŭ, za košt čaho heta budzie rabicca ŭ vypadku ŭźniknieńnia takoj nieabchodnaści.
Jašče ŭčora treba było ŭtvarać antykryzisnyja strachavyja fondy na hetyja mety.Najaŭnych reziervaŭ Nacyjanalnaha banka krainy dla hetaha vidavočna niedastatkova. Na 1 kastryčnika ŭ kamiercyjnych bankaŭ Biełarusi admoŭny bałans składaŭ 1,5 miljarda dalaraŭ, a ŭsie reziervy NB RB aceńvalisia ŭ 4,5 miljardy dalaraŭ. A što adbyłosia za pakul samyja ciažkija miesiacy finansavaha kryzisu — kastryčnik i listapad — zastajecca tolki zdahadvacca», — padkreśliŭ prafiesar.
Eks‑kiraŭnik Nacbanka adznačyŭ, što va Ŭkrainie, naprykład, padobny strachovačny fond stvorany.
«Jaho składaje kredyt MVF u 16 miljardaŭ dalaraŭ. Kiraŭnik Nacyjanalnaha banka hetaj krainy zajaviŭ, što ni kapiejki hrošaj z hetaha fondu nie vydatkavana. Hetyja hrošy pryznačanyja na pieraadoleńnie zusim užo fors‑mažornych akaličnaściaŭ.
Čamu ŭ nas takoha fondu dahetul niama? Čamu kardynalna nie pierahledžany biudžet, asabliva jahonaja raschodnaja častka? Čamu kardynalna nie zrezanaja padtrymka stratnych pradpryjemstvaŭ i asobnych vielmi sprečnych z ekanamičnaha punktu hledžańnia sielskahaspadarčych prahram? Čamu da hetaha času nie devalvavanaja nacyjanalnaja valuta, jakaja mocna ciśnie na eksparcioraŭ i našy zołatavalutnyja zapasy?» — zapytvaje ekśpiert.
«Što datyčycca bankaŭskaj sistemy krainy, to mahu skazać nastupnaje. Kali niehatyŭnyja tendencyi ŭ joj praciahnucca, to možna čakać nastupnaha skaračeńnia kredytavańnia pa ŭsich napramkach»,— skazaŭ Stanisłavaŭ Bahdankievič.
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary