Stan zdaroŭja byłoha aficera HRU Siarhieja Skrypala, atručanaha ŭ sakaviku 2018 hadoŭ ŭ brytanskim Sołśbiery, pahoršaŭ, paviedamlaje The Sunday Times sa spasyłkaj na krynicu ŭ raźviedcy. Pierakaz artykuła apublikavany na Lenta.ru.
Siońnia ž na sabory ŭ Sołśbiery nieviadomyja vyviesili hihancki rasijski ściah.
Skrypal znachodzicca doma pad pastajannym nahladam daktaroŭ. Tyja ŭ svaju čarhu niepakojacca, što 67-hadovy mužčyna naŭrad ci kali-niebudź całkam pieraadoleje nastupstvy chimičnaj ataki.
Surazmoŭca haziety pryznaŭ, što nichto nie viedaje, što budzie sa Skrypalom, bo źviestak pra ŭpłyŭ užytaha suprać jaho jadu vielmi mała. «Samo rečyva, chutčej za ŭsio, budzie vyviedziena [z arhanizma], ale nastupstvy jaho ŭździejańnia mohuć zachoŭvacca doŭha», — ličyć dacent Natynhiemskaha univiersiteta Uejn Karter (Wayne Carter).
Skrypal, u adroźnieńnie ad svajoj dački Julii, jakaja taksama paciarpieła ad jadu, paśla zamachu nie źjaŭlaŭsia na publicy. Heta dało padstavy padazravać, što jon pamior, adnak łondanskaja palicyja abviarhaje hetyja čutki, piša Daily Mail.
Skrypali, jak śćviardžajuć brytanskija ŭłady, byli atručany raspracavanym u SSSR niervova-paralityčnym rečyvam «Navičok» u vyniku apieracyi z udziełam supracoŭnikaŭ HRU. U Łondanie miarkujuć, što napad byŭ sankcyjanavany vyšejšym kiraŭnictvam Rasii. Maskva zajaŭlaje pra svaju niedatyčnaść da zamachu na žyćcio Skrypala.
Ad kantaktu z «Navičkom» paciarpieli taksama žychary Sołśbiery palicejski Nik Bejli, a taksama Čarli Roŭli i Don Sterdžes. Bejli i Roŭli prajšli praciahłuju reabilitacyju, ale śćviardžajuć, što ich zdaroŭju naniesiena vialikaja škoda. Sterdžes pamierła.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ80
Kamientary