U Pietrykavie zakatali ŭ asfalt apošniuju ŭ horadzie brukavanku FOTY
Horad rychtujecca da abłasnych «Dažynak», jakija ŭvosień adbuducca ŭ horadzie.
Na toje, što na miescy brukavanki źjaviŭsia asfalt źviarnuŭ uvahu čytač «Našaj Nivy», siabra MHA «Historyka», Alaksiej Dužy.
«Padčas rekanstrukcyi źniščyli apošniuju brukavanuju darohu kala parka. Hety aŭtentyčny artefakt zaŭsiedy pryvablivaŭ turystaŭ, čyrvony bruk vyhladaŭ vielmi pryhoža pobač z parkam», — raskazvaje Alaksiej.
Zaraz, pa mierkavańni mužčyny, horad straciŭ hetuju razynku.
«Mnie vielmi prykra, što ŭ nas padčas rekanstrukcyj uličvajucca tolki budaŭničyja normy… A voś jak być z estetykaj, historyjaj — usim usio roŭna», — dadaje Alaksiej.
Alaksiej Dužy raskazvaje, što brukavanka na vulicy Kamsamolskaj źjaviłasia ŭ pieršy hod paśla vajny. Miascovyja žychary pamiatajuć, jak jaje kłali pałonnyja niemcy.
U Pietrykaŭskim DRSU adkazali, što prosta vykonvali prajektnaje rašeńnie vykankama.
«Jość zahad, my jamu padparadkujemsia», — adkazaŭ dyrektar Ivan Vieka,
Zrešty, mierkavańnie miascovych žycharoŭ nakont brukavanki padzialilisia. Kali dla adnych — heta historyja, niepaŭtornaje abličča horada, to inšyja kažuć, što «niama čaho škadavać bituju cehłu» i što ciapier na mašynie budzie prajazdžać kudy kamfortniej.
«Kali navat bruk i sapsavaŭsia, to jaho nie zalivać asfaltam treba, a prosta pierakłaści ci zamianić», — ličyć Alaksiej Dužy.
Aleksijevič narešcie vykazałasia pra Izrail i Paleścinu48
Kamientary