Miesiac Juryja Karajeva: piać rečaŭ, jakija źmianilisia za hety čas u MUS

Roŭna miesiac tamu, 11 červienia, Juryj Karajeŭ byŭ pryznačany ministram unutranych spraŭ. Jon źmianiŭ na hetaj pasadzie adyjoznaha Ihara Šunieviča, jaki zapomniŭsia mnohim svaimi nieadnaznačnymi słovami i ŭčynkami. Ci atrymałasia Karajevu niešta źmianić u pracy MUS za hetyja tryccać dzion?

Pavialičyć

Ministerstva stała bolš adkrytym

Pieršaje, što zaŭvažyli litaralna ŭsie, — heta źmiena pracy ŭ miedyjnym kirunku. Kali pry Šunieviču MUS było ledźvie nie bolš zakrytaj strukturaj, čym KDB, to ciapier padychody pačynajuć mianiacca.

Źvierniem uvahu, što pres-sakratar MUS Volha Čamadanava zaviała telehram-kanał, dzie apieratyŭna infarmuje pra zdareńni i kryminalnyja naviny. Naprykład, u situacyi z samahubstvam viaskovaha debašyra ŭ milicejskaj mašynie mienavita struktury MUS sami raspraŭsiudzili navinu, a nie stali zachoŭvać maŭčańnie pa staroj pamiaci. Kali bačna, što siłaviki ničoha nie chavajuć i hatovyja sami raskazvać, raście i davier da milicyi.

I heta nie adzinkavy padobny vypadak. Takija standarty pracy byli zadadzienyja ad pieršaha dnia Karajeva na pasadzie. Kali ŭ Baranavičach pamior sałdat unutranych vojskaŭ MUS, pres-sakratar Uładzimir Parchamcaŭ skazaŭ «NN», što na apubličvańnie zdareńnia była asabistaja vola ministra. Pahladzim, što budzie dalej.

Dazvoliŭ fotkacca z haradavym

Zdajecca, u Karajeva niama nijakaha punkcika nakont pomnika carskamu haradavomu, jak toje było ŭ jahonaha papiarednika. Dla Šunieviča haradavy nabyŭ sakralny charaktar. I luby žart z haradavoha ŭsprymaŭsia milicyjaj vielmi rezka.

Čaho varty viadomy vypadak z 16-hadovym padletkam Arsieniem, jaki daŭ pomniku poŭchu. Milicyjaniery nie prosta złavili chłopca, ale i na kamieru prymusili prasić prabačeńnie ŭ kavałka mietału. U internecie pisali, što heta ŭžo amal jak u Čačni. A ministr Šunievič zajaviŭ, što heta była asabista jahonaja ideja. 18-hadovaj studentcy Alaksandry pašancavała jašče mieniej: jana dvoje sutak praviała ŭ izalatary za padniatuju na pomnik nahu.

Juryj Karajeŭ skazaŭ, što z pomnikam možna fotkacca. «Možna rabić usio, što nie abražaje čałaviečuju hodnaść», — zapeŭniŭ ministr. Pakul nijakich vypadkaŭ zatrymańniaŭ ludziej za incydenty z haradavym pry Karajevie nie było.

Pryniaŭ «Maci 328»

Užo ŭ pieršy miesiac pracy Karajeŭ sustreŭsia z lidarkaj ruchu «Maci 328» Łarysaj Žychar. Heta abjadnańnie maci, jakija zmahajucca za toje, kab ich dzieciam, asudžanym pa narkatyčnych artykułach, źmienšyli terminy adbyvańnia pakarańnia.

Paśla sustrečy spadarynia Žychar zajaviła, što ŭ Juryja Karajeva isnuje žadańnie detalova razabracca ŭ situacyi. «Maci ja nikoli nie admaŭlaju», — pieradała jana słovy ministra.

Što ž paabiacaŭ Karajeŭ? U pryvatnaści, pavialičyć čas spatkańniaŭ dla svajakoŭ asudžanych, a taksama raźbić pieradačy ŭ kałoniju na niekalki. Paabiacaŭ ministr uniknuć i ŭ pytańnie «zialonych našyvak», jakija nosiać u źniavoleńni asudžanyja pa 328-m artykule. U najbližejšy čas budzie zrazumieła, što z hetaha budzie vykanana.

Pazityŭny imidž na Jeŭrapiejskich hulniach

U samym pačatku hulniaŭ Karajeŭ adznačyŭ, što milicyja paŭstanie pierad haściami «vietlivaj i karektnaj». U vyniku, chaj turystaŭ pryjechała nie tak šmat, narakańniaŭ na pracu milicyi nie było, chutčej naadvarot.

Naprykład, turystka sa Słavakii zabyłasia ŭ aŭtobusie mabilnik. U vyniku milicyja vielmi chutka znajšła dziaŭčynu i viarnuła joj telefon. Toje samaje tyčycca turystki z Ukrainy, jakaja na spabornictvach pa boksie «pasiejała» kašalok. I tut milicyja pryjšła na dapamohu.

A voś niejkich vypadkaŭ sa znakam minus z udziełam milicyi na Jeŭrapiejskich hulniach, na ščaście, zafiksavana nie było.

Chodzić u cyvilnym kaściumie, a nie ŭ formie

Dbaje ministr i pra svoj ułasny imidž. Naprykład, čaściej za ŭsio na ludziach jon źjaŭlajecca nie ŭ formie, a ŭ cyvilnym. Tak jon prychodziŭ, naprykład, u parłamient. Šunievič addavaŭ pieravahu vyklučna formie.

Biez formy sfotkali ministra, kali Karajeŭ vychodziŭ z budynka MUS i išoŭ u bok stadyjona «Dynama». Ministr byŭ absalutna adzin i biez achovy. Jeŭrapiejski padychod.

Telehram-kanał «Kulhavy djabał» zaznačaje, što znajomstva z kalektyvam ministerstva Karajeŭ pačaŭ nie z taho, što ŭsich sklikaŭ u svaim kabiniecie, a sam prajšoŭsia pa kabinietach padnačalenych, kab lepš ź imi paznajomicca.

• 0
• 0
• 0
• 0
• 0
• 0
• 0
• 0