Vyniki pastupleńnia: topavyja śpiecyjalnaści biełaruskich VNU

BDUIR: hulniavaja industryja

Prachadnyja bały ŭ Biełaruskim dziaržaŭnym univiersitecie infarmatyki i radyjoelektroniki raskinulisia ŭ dyjapazonie ad 296 da 364.

Bolš za ŭsio bałaŭ spatrebiłasia abituryjentam, jakija chacieli pastupić na śpiecyjalnaść «infarmacyjnyja sistemy i technałohii (u hulniavoj industryi)» — 364. Tut na adno miesca pretendavali 6,7 čałavieka. Majučy ŭsiaho na adzin bał mienš — 363, abituryjenty zmahli stać pieršakurśnikami śpiecyjalnaści «elektronny markietynh» (konkurs — 3,2 čałavieka na miesca). U trojcy lidaraŭ — śpiecyjalnaść «prahramnaje zabieśpiačeńnie infarmacyjnych technałohij»: prachadny bał skłaŭ 359.

BNTU: markietynh

Roskid prachadnych bałaŭ u Biełaruskim nacyjanalnym techničnym univiersitecie — ad 207 da 362.

Maksimalny prachadny bał skłaŭsia na śpiecyjalnaści «markietynh» fakulteta markietynhu, mieniedžmientu i pradprymalnictva — 362. Na adno biudžetnaje miesca tut pretendavali 2,38 čałavieka. Kab u hetym hodzie pastupić na «mytnuju spravu», treba było mieć minimum 341 bał (konkurs — 2,83). Adzin z samych vysokich prachadnych bałaŭ skłaŭsia i na śpiecyjalnaści «prahramnaje zabieśpiačeńnie infarmacyjnych technałohij» fakulteta infarmacyjnych technałohij i robatatechniki — 340.

BDPU: kampjutarnaja hrafika

U Biełaruskim dziaržaŭnym piedahahičnym univiersitecie prachadnyja bały vyraśli praktyčna na ŭsich śpiecyjalnaściach, paviedamlaje pres-słužba. Maksimalny rost — 115 punktaŭ, taki skačok adbyŭsia na śpiecyjalnaści «matematyka i infarmatyka». U cełym pa ŭniviersitecie na adno miesca pretendavali 2,5 čałavieka.

Maksimalny prachadny bał skłaŭsia na śpiecyjalnaść «vyjaŭlenčaje mastactva i kampjutarnaja hrafika» — 322 bały. Na adno miesca tut pretendavali 8,7 čałavieka.

Kab stać pieršakurśnikam śpiecyjalnaści «łahapiedyja», treba było nabrać minimum 314 bałaŭ (konkurs — 3,5 čałavieka na miesca), na «psichałohiju» — 305 bałaŭ (5,8 čałavieka na miesca).

Z 222 bałami z 400 možna było stać pieršakurśnikam śpiecyjalnaści «biełaruskaja mova i litaratura» (konkurs — 1,6). 

BDMU: stamatałohija

Tradycyjna ŭ Miedycynskim univiersitecie vysokija nie tolki maksimalnyja, ale i minimalnyja bały.

Kab stać studentam stamatałahičnaha fakulteta, treba było nabrać 370 bałaŭ z 400 (konkurs — 2,72 čałavieka na miesca). Prachadny bał na farmaceŭtyčny fakultet skłaŭ 364 (2,1 čałavieka na miesca), na lačebny — 358 (2,1 čałavieka na miesca).

BDU: mižnarodnaje prava

Siaredni konkurs u Biełaruskim dziaržaŭnym univiersitecie skłaŭ 1,78 čałavieka na miesca.

Tradycyjna vysokija prachadnyja bały skłalisia na fakultecie mižnarodnych adnosin. Kab pastupić na śpiecyjalnaść «linhvakrainaznaŭstva», treba było nabrać minimum 378 bałaŭ, na «mižnarodnyja adnosiny» — 379, na «mižnarodnaje prava» — 385. Heta najvyšejšy bał ustupnaj kampanii-2019.

• 0
• 0
• 0
• 0
• 0
• 0
• 0
• 0