Tramp admianiŭ sakretnyja pieramovy z «Talibanam» paśla teraktu ŭ Kabule
Prezident ZŠA Donald Tramp zajaviŭ, što z-za teraktu ŭ Kabule, u vyniku jakoha zahinuli 12 čałaviek, u tym liku amierykanski vajskoviec, jon admianiŭ zapłanavanyja raniej sustrečy ź lidarami «Talibanu» i prezidentam Afhanistana Ašrafam Hani, paviedamlajuć infarmahienctvy.
«Upotaj praktyčna ad usich, klučavyja lidary «Talibanu» i asobna prezident Afhanistana źbiralisia sustrecca sa mnoj u Kemp-Devidzie ŭ niadzielu. Siońnia viečaram jany pavinny byli pryjechać u Złučanyja Štaty. Na žal, z metaj stvaryć iłžyvyja ryčahi ŭździejańnia, jany pryznalisia ŭ napadzie u Kabule, u vyniku jakoha zahinuŭ adzin z našych vialikich sałdataŭ i jašče 11 čałaviek. Ja nieadkładna admianiŭ sustreču i mirnyja pieramovy», — napisaŭ amierykanski lidar u Twitter.
Prezident ZŠA dadaŭ, što «kali jany (taliby) nie mohuć damovicca ab spynieńni ahniu ŭ čas hetych vielmi važnych pieramoŭ <…>, to ŭ ich, vierahodna, u lubym vypadku niama mahčymaści damovicca ab značnym pahadnieńni».
U čaćvier u rajonie Kabuła Šaš-Darak, dzie raźmiaščajucca štab-kvatera NATA, ambasada ZŠA i ŭradavyja budynki, adbyŭsia vybuch, adkaznaść za jaki ŭziaŭ na siabie «Taliban». MUS Afhanistana paviedamiła ab hibieli ŭ vyniku vybuchu dziesiaci čałaviek. Kamandavańnie apieracyi «Rašučaja padtrymka», jakuju pravodzić u krainie NATO, infarmavała pra hibiel «pry bajavych dziejańniach» dvuch vajskoŭcaŭ z Rumynii i ZŠA.
Złučanyja Štaty i radykalny ruch «Taliban» uzhadnili raniej prajekt pahadnieńnia pa ŭrehulavańni z 11 punktaŭ. Baki raźličvajuć pryjści da pahadnieńnia ab terminach vyvadu vojskaŭ ZŠA z Afhanistana ŭ abmien na harantyi nievykarystańnia terytoryi hetaj krainy dla napadu na ZŠA abo inšyja krainy. Afhanski ŭrad u pieramovach nie ŭdzielničaje, choć Vašynhton nastojvaje, što afhanskija ŭłady pavinny ŭdzielničać u kančatkovym urehulavańni.
Kamientary