Rasijanka pieraaformiła mašynu na biełarusa-kachanka — i ŭbačyła jaje na sajcie prodažu aŭtamabilaŭ
Natalla Jafimava ź Pieciarburha. Hod tamu na sajcie znajomstvaŭ paznajomiłasia ź Piatrom Burko sa Smarhoni.
Adnosiny, raskazvaje Natalla, byli ščyrymi i ciopłymi. Za hod para nastolki zbliziłasia, što Natalla aformiła svaju mašynu na kachanaha. Ale paśla takoha ščodraha padarunka Piatro raptoŭna źnik.
«Piotr pracavaŭ u Sankt-Pieciarburhu, my sustrakalisia amal hod, i zajšła havorka ab tym, što treba kupić mašynu. Pravoŭ u mianie niama, tamu vyrašyli, što kiravać budzie Piatro. Vybrali mašynu — Nisan Patfajnder 2010 hoda vypusku.
Piatro tłumačyŭ, što pakolki jon biełarus, nivodzin rasijski bank nie daść jamu kredyt. U sakaviku ja ŭziała kredyt na mašynu, jaje ž pakinuła ŭ zakład. Ale ŭ pačatku vieraśnia Piotr paprasiŭ aformić na jaho hienieralnuju davieranaść», — raskazvaje Natalla.
Paśla hetaha, pryznajecca žančyna, jaje kachanaha byccam padmianili.
«Adnosiny stali psavacca, my pierastali bačycca. A ŭ kancy vieraśnia Piecia zabłakavaŭ mianie paŭsiul: i ŭ telefonie, i ŭ internecie», — praciahvaje Natalla.
I raptam Natalla Jafimava ŭbačyła na rasijskim sajcie pa prodažu aŭtamabilaŭ svaju mašynu.
«Viadoma, ja źviarnułasia ŭ našu palicyju. Jany vyśvietlili, što Piatro źniaŭ mašynu z uliku i pieraaformiŭ jaje na inšaha čałavieka. Faktyčna ja ŭžo i nie haspadynia hetaj mašyny. I mašyna ŭžo pradadzienaja za $13 tysiač. Jak tak atrymałasia, mnie nieviadoma. Mašyna ž u zakładzie ŭ banka!» — uzrušajecca žančyna.
Akramia taho, joj udałosia vyśvietlić, što Piatro viarnuŭsia ŭ Biełaruś.
«Ja źviarnułasia ŭ biełaruskuju milicyju. Jany hatovyja mnie dapamahčy, skazali, što viedajuć jaho miescaznachodžańnie, ale biez zapytu z Rasii ničoha nie mohuć zrabić. A što rasijskaja palicyja? Jany mnie ŭ vočy kažuć, što ja sama vinavataja, i treba było dumać hałavoj, pierad tym, jak afarmlać davieranaść. A Burko ŭsio zrabiŭ pa zakonie. I ja prosta ŭ adčai. Što mnie rabić?» — pytajecca Natalla Jafimava.
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie31
Kamientary