Zirnicie, jaki pryhožy kryž adkapali ŭ Višnievie FOTA
Naprykancy 2019 hoda kala napaŭrazburanaj prydarožnaj kaplicy śviatoha Jana niepadalok ad Višnieva, što na Smarhonščynie, byŭ znojdzieny staradaŭni kavany kryž, jaki pralažaŭ u ziamli nie adno dziesiacihodździe, piša Catholic.by.
Višnievaŭ u tym kirunku jość dva: adno na Vałožynščynie, tam słužyŭ ajciec Uładysłaŭ Čarniaŭski i naradziŭsia Šymon Peres, a druhoje — na Smarhonščynie, dzie naradziŭsia kampazitar Miečysłaŭ Karłovič.
Prydarožnuju kaplicu ŭ honar Jana Chryściciela tutejšyja žychary pastavili miž miastečkam Višnievam i vioskaju Hałodničy, pierajmienavanaj balšavikami ŭ «Krasnaaziornuju», što prytuliłasia na bierazie malaŭničaha, čystaha i spakojnaha Višnieŭskaha voziera.
Stromkaja i vieličnaja kaliści, kaplica siońnia pahražaje voś-voś abrynucca, niahledziačy na ryštavańni, što ščylna abstupili jaje z usich bakoŭ…
Krajaznaŭcy-entuzijasty, jakija zajmajucca pošukam cikavych histaryčnych artefaktaŭ, vyrašyli daśledavać prylehłuju da kaplicy terytoryju. I nie daremna: im udałosia znajści kryž, jaki kaliści viančaŭ kultavuju pabudovu i na jaki žahnalisia ŭsie, chto išoŭ abo jechaŭ pa haścincy pobač.
Znojdzienuju śviatyniu z pašanaju pieradali ksiandzu Antoniju Kazłoŭskamu, probašču višnieŭskaj parafii Śviatoha Judy Tadevuša, na terytoryi jakoj znachodzicca kaplica.
«Heta dobry znak! — radujecca śviatar. — Kryž znajšli: ciapier zastałosia adnavić kaplicu, kab ustalavać jaho na «zakonnaje miesca»».
Chutčej za ŭsio, kryž z kaplicy źniali ŭ časy vajaŭničaha ateizmu, kali savieckaja ŭłada viała zmahańnie ź vieraj i relihijnymi simvałami. A moža, chtości prosta vyrašyŭ jaho schavać i zakapaŭ dalej ad niadobrych vačej, ale nie dačakaŭsia lepšych časoŭ, kali skončyłasia savieckaje ciemrašalstva.
Jak by tam ni było, kryž, narešcie, znojdzieny i, kali znojducca taksama vysakarodnyja nieabyjakavyja ludzi, hatovyja dapamahčy ŭ spravie adnaŭleńnia staradaŭniaj kaplicy, zmoža znoŭ viarnucca na svajo pačesnaje miesca.
Niahledziačy na praviedzienyja ŭ ziamli dziesiacihodździ, kryž davoli dobra zachavaŭsia, a heta śviedčyć, chutčej, na karyść viersii pra toje, što jaho schavali vierniki. Zmahary z relihijaj zvyčajna nie cyrymonilisia i, skidvajučy kryžy, ich mocna niaviečyli, jak, naprykład, adbyłosia ŭ Śviry, kudy viadzie haściniec ź Višnieva.
Vykanany ŭ tradycyjnaj maniery z kavanaha mietału, kryž z kaplicy śviatoha Jana maje ŭ vyšyniu 135 sm ad nižniaha zavostranaha kanca, jakim jon, chutčej za ŭsio, macavaŭsia da šarapadobnaj draŭlanaj «makaŭki», i da vierchniaha dekaratyŭnaha elemientu ŭ vyhladzie listka, krychu zahnutaha (i heta, badaj što, adzinaje zaŭvažnaje na im paškodžańnie). Šyrynia kryža ŭpopierak składaje 95 sm.
Ab adnaŭleńni kaplicy maliŭsia ksiondz Antonij, kali 12 śniežnia celebravaŭ śviatuju Imšu za Biełaruś, jakaja tranśliravałasia na Pieršym nacyjanalnym kanale Biełaruskaha radyjo.
Ciapier čytajuć
Dziaržkanały poŭniacca abvinavačvańniami na adras Ukrainy. Nivodzin dziaržkanał nie apublikavaŭ kamientary ŭkraincaŭ. Reakcyi Łukašenki dahetul niama3131
Kamientary