Namieśnik dziaržsakratara ZŠA: Vy, narod Biełarusi, nahadali nam, nakolki važnyja demakratyja i svaboda
Namieśnik dziaržsakratara ZŠA Styven Bihen zaklikaŭ vyzvalić niespraviadliva zatrymanych i spynić hvałt, abmierkavaŭ rolu Rasiei i ZŠA ŭ vyrašeńni supraćstajańnia i vykazaŭ zachapleńnie mužnaściu biełarusaŭ.
Ekskluziŭnaje interviju vioŭ dyrektar Biełaruskaj słužby Radyjo Svaboda Alaksandar Łukašuk.
Łukašuk: Sp. Bihen, minuŭ tydzień z vašaj pajezdki pa rehijonie i vystupu ŭ Vienie. U ABSE vy zaklikali nieadkładna spynić hvałt suprać biełaruskaha narodu i vyzvalić niespraviadliva zatrymanych, u tym liku amerykanskaha hramadzianina Vitala Šklarava. Jak vy aceńvajecie padziei, jakija adbylisia ŭ Biełarusi z taho času — vy bačycie prahres?
Bihen: My nia bačym nijakaha prahresu. I my abdumvajem dadatkovyja miery, nieabchodnyja dla cisku na ŭłady Biełarusi, kab byli zrobleny kroki, jakich patrabuje nia tolki ŭłasnaja Kanstytucyja, zvyčajnaja hodnaść i spraviadlivaść, ale i abaviazańni ŭradu Biełarusi pavodle statutu ABSE i Ŭsieahulnaj deklaracyi pravoŭ čałavieka AAN. Urad Biełarusi maje peŭnyja abaviazańni, jakich jon nie vykonvaje, i mižnarodnaja supolnaść budzie nadalej nastojvać na ich vykanańni.
Ja chaču paŭtaryć: našy asnoŭnyja patrabavańni — nieadkładna vyzvalić niespraviadliva zatrymanych, u tym liku Vitala Šklarava, jakoha trymajuć u niavoli biez usialakich zakonnych padstavaŭ, a taksama — spynić hvałt suprać pratestoŭcaŭ, jaki my nazirajem, mahčyma, nia tak dramatyčna, jak adrazu paśla vybaraŭ, ale apošnimi dniami my bačym jaho iznoŭ… Prahres niedastatkovy, i my abmiarkoŭvajem dadatkovyja miery cisku, my pracujem nad hetym.
Łukašuk: U apošnija hady ZŠA namahalisia akazać padtrymku biełaruskaj niezaležnaści. Sankcyi byli prypynienyja, vysokapastaŭlenyja amerykanskija dyplamaty naviedali Miensk. Ź inicyjatyvy dziaržsakratara Majka Pampeo Biełaruś pačała zakuplać amerykanskuju naftu. Hledziačy nazad, ci nie była hetaja palityka ŭłahodžvańnia adnosinaŭ pamyłkovaj? Ci pa-raniejšamu ZŠA bačać u Alaksandru Łukašenku partnera ŭ abaronie suverenitetu Biełarusi?
Bihen: ZŠA nikoli nie chacieli kanfliktu ci napružanaści ŭ adnosinach ź Biełaruśsiu. Na praciahu 29 hadoŭ biełaruskaj niezaležnaści, ad jaje pieršych dzion, uklučna z vysiłkami roznych amerykanskich administracyjaŭ i maimi asabistymi ŭ 1990-ja, ZŠA damahalisia kanstruktyŭnych stasunkaŭ ź Biełaruśsiu. ZŠA nikoli nie razhladali Biełaruś jak pole spabornictva pamiž Zachadam i Ŭschodam, i my nie razhladajem jaje takim čynam ciapier.
Viadoma, my i našy eŭrapiejskija partnery ŭ krainach Bałtyi, jak i Rasieja, sprabavali ŭciahnuć kiraŭnictva Biełarusi ŭ razmovu, jakaja b pryviała da bolš stabilnaj — i, praŭdu kažučy, bolš spraviadlivaj — sytuacyi ŭ Biełarusi. Hetyja namahańni na siońniašni dzień nia mieli pośpiechu. Ale, Alaksandar, ja chaču padkreślić, što ŭrad Złučanych Štataŭ nie imkniecca vyznačyć, chto budzie prezydentam Biełarusi. Heta peŭna nia nam vyrašać, heta nia našaja rola. I my ŭsialakim čynam imkniemsia nie pieratvaryć heta ŭ sprečku pra asobaŭ. Dla nas asnoŭny faktar, jaki my padtrymlivajem, — heta prava narodu Biełarusi vyznačać svaju ŭładu praz svabodnyja i spraviadlivyja vybary ź niezaležnym nazirańniem.
… Ja zaklikaju ŭsich i kožnaha pračytać usie 146 artykułaŭ Kanstytucyi Biełarusi, jakija padrabiazna i jasna vykładajuć pravy i paŭnamoctvy narodu Biełarusi, što byli jaŭna parušanyja ŭładami 9 žniŭnia.
Kamientary