Dałučeńnie krainy da «Uschodniaha Partniorstva» — heta simvaličnaja kropka ŭ płanach budaŭnictva Sajuzu Biełarusi i Rasiei. Piša Andrej Pačobut na Arche.by.
Udzieł Biełarusi ŭ samicie Jeŭraźviaza i dałučeńnie krainy da «Uschodniaha Partniorstva» — heta simvaličnaja kropka ŭ płanach budaŭnictva Sajuzu Biełarusi i Rasiei. Heta kančatkovaja paraza idealistyčnaha i hłabalnaha, a tak sama, ŭ peŭnaj stupieni, aŭtarskaha, prajektu Alaksandra Łukašenki – adbudovy savieckaj impieryi. Piša Andrej Pačobut na Arche.by.
Sajuznaja dziaržava, piermanientnaja pabudova jakoj viadziecca voś užo 14 hadoŭ, u płanach biełaruskaha kiraŭnictva pavinna była stacca nie niejkim zabiurakratyzavanym invalidam, a ŭpłyvovym centram, vakoł jakoha zhurtujucca «ŭsie ziemli ruskija». Heta byŭ krok ŭ kirunku pabudovy novaha Savieckaha Sajuzu, krainy, ź jakoj byŭ by vymušany ličycca ŭvieś śviet.
Što ŭ paraŭnańni z adradžeńniem supierdziaržavy, jakaja budzie mieć svaje intaresy ŭ kožnym kutku śvietu, ścipleńki i maleńki prajekcik – niezaležnaja Respublika Biełaruś?
Łukašenka nie chavaŭ, svajho adkazu na hetaje pytańnie.
«Dla mianie Biełaruś užo projdzieny etap», – niejak ščyra pryznaŭsia Alaksandar Ryhoravič.
Jon kazaŭ, što «na kaleniach hatovy paŭźci ŭ Rasieju». Potym u zalichvackim uhary raźbivaŭ u Maskvie bakał pa šampanskim, prypiačatvajučy takim čynam jurydyčnaje zamacavańnie pačatku hłabalnaha, jak tady padavałasia, pracesu źbirańnia «ziamiel ruskich». Maryŭ pra Kreml…
I voś na hadzińniku hod 2009‑y, i my
majem jurydyčny ŭvachod Biełarusi ŭ kankurencyjny prazachodni hieapalityčny prajekt, dy nieprychavanaje zaiskivańnie Łukašenki pierad zachodnimi «vašyvymi błochami» u nadziei na inviestycyi i kredyty, sastupki Zachadu ŭ vyhladzie zvalnieńnia raskručanych u zachodnich ŚMI palitźniavolenych dy dazvoł na raspaŭsiud dźviuch niezaležnych hazetaŭ.Na dadatak sapraŭdnaja, a nie dekłaravanaja šmatviektarnaść – usio heta kančatkovaje pierakreśleńnie ŭsich maraŭ i płanaŭ «maładoha prezidenta», jak lubić nazyvać siabie Alaksandr Łukašenka, uspaminajučy pačatki svajoj karjery. Heta biezumoŭnaja i kančatkovaja paraza hieapalityčnaha prajektu, jaki jon realizoŭvaŭ.
Pryčynaj hetaha staŭsia tryumf spažyvieckaha prahmatyzmu nad prasavieckim idealizmam.
Rečaisnaść niekalki razoŭ brutalna nahadała minskamu letucieńniku pra svaje žaleznyja praviły. Krach płanaŭ adbudovy SSSR — vynik realijaŭ sučasnaha śvietu,dzie «babło pieramahaje zło». Akazałasia, što na nieabsiažnyja prastory Rasiei Łukašenku banalna nie chapaje «załatoha zapasu». Pra što Kreml na praciahu apošnich hadoŭ šmat razoŭ baluča nahadaŭ ambicyjnamu biełaruskamu lideru.
Bajkami pra supierimpieryju syty nie budzieš! Navat samaja pryhožaja ideałohija pavinna być zabiaśpiečana materyjalna. I pažadana ŭ svabodna kanviertavanaj valucie. A z hetym u nievydolnaha «rynkavaha sacyjalizmu» jość vialikija prablemy. Viadoma,
Łukašenka vycisnuŭ z Rasiei nie mała. Faktyčna ŭvieś «biełaruski haspadarčy cud» — heta vynik «brackaha siabroŭstva» i nieprykrytaj śpiekulacyi na impierskich ambicyjach uschodniaha susieda.Ale niama ničoha viečnaha pad Miesiacam. Intehracyjnaja ataka siaredziny 90‑ch chutka źmianiłasia «vialikim stajańniem», a potym i ŭvohule zhortvańniem sajuznaha prajektu. Čas hołaj rytoryki minuŭ. Kreml usio bolš ahresiŭna damahajecca apłaty za ŭtrymańnie «darahoha sajuźnika». A tut jašče treba zabiaśpiečvać uzrovień žyćcia hramadzianaŭ, dbać pra sacyjalnyja harantyi i tamu padobnyja pryziemlenyja rečy….
Takim čynam «projdzieny etap» — heta značyć Respublika Biełaruś — staŭsia iznoŭ hałoŭnym.
Utrymańnie poŭnaha kantrolu nad dziaržavaj — dziela hetaha Łukašenka achviaravaŭ svaimi vialikimi hieapalityčnymi ambicyjami.
«Płastmassovyj mir pobiedił, kirpič okazałsia silniej», — śpiavaŭ kaliści saviecki pank i vialiki amatar Łukašenki Jahor Letaŭ. U dadzienym vypadku pieramoha zdarovaha prahmatyzmu nie moža nie ciešyć.
Ciapier čytajuć
«Na 15 chvilin vyklučyli śviatło — boža moj, z Ukrainaj paraŭnali». Łukašenka patłumačyŭ, kolki ekanomić na vuličnym aśviatleńni8
Kamientary