Novy ministr kultury Anatol Markievič: što pra jaho raskazvajuć adnaviaskoŭcy
Ministram kultury pryznačany čałaviek, jaki nivodnaha dnia nie pracavaŭ u śfiery kultury. Im staŭ były pamočnik kiraŭnika krainy pa Bresckaj vobłaści Anatol Markievič.
Što pra jaho viadoma? Markieviču 49 hadoŭ. Jon rodam ź vioski Hramki Ščučynskaha rajona. Vučyŭsia na nastaŭnika matematyki ŭ Bresckim piedahahičnym univiersitecie. Paśla pracavaŭ nastaŭnikam na radzimie. Užo ŭ 28 hadoŭ staŭ dyrektaram Karelickaj SŠ №1.
Ad 2002 hoda — na čynoŭnickaj pracy. Spačatku pracavaŭ namieśnikam staršyni Karelickaha rajvykankama. U 2011-m — staŭ staršynioj Navahrudskaha rajvykankama. Apošnija dva niapoŭnyja hady byŭ pamočnikam Łukašenki na Brestčynie.
Za čas pracy ŭ Navahrudku zapomniŭsia tym, što inicyjavaŭ malebien z prośbaj ab daždžy. Tady ŭ navahrudski sabor pryjšła ŭsia rajonnaja viertykal. Jašče Markievič admoviŭsia nadać adnoj z vulic Navahrudku imia navukoŭca Barysa Kita. «Navahrudski rajvykankam paličyŭ heta niemetazhodnym», — było ŭ adkazie Markieviča.
«Naša Niva» patelefanavała ŭ Hramki Ščučynskaha rajona, kab daviedacca trochu pra novaha ministra. Baćki — Janina i Miečysłaŭ — praciahvajuć žyć u Hramkach, ale źviazacca ź imi nie ŭdałosia. Tym nie mienš, viaskoŭcy raskazali nam pra ziemlaka.
Hramki — nie samaja vialikaja vioska, za savieckim časam tam žyło kala 200 čałaviek, u kancy 90-ch — sotnia, ciapier — usiaho vasiamnaccać. Tym nie mienš, kažuć, pakolki vioska znachodzicca la trasy, to zakinutaj jana nie vyhladaje. Dzieci i ŭnuki pryvodziać u paradak damki, navat kali tam stała nichto nie žyvie.
Baćka Miečysłaŭ miascovy, a voś maci Janina trapiła ŭ Hramki pa raźmierkavańni paśla buchhałtarskich kursaŭ, sama jana z vakolic Žałudka. Pracavała ŭ sielsaviecie, ale potym sustrełasia ź Miečysłavam Markievičam. Jany vielmi chutka ažanilisia, Janinie na toj momant było ci 16, ci 17 hadoŭ.
Baćka pracavaŭ šafioram u dyrektara saŭhasa Kunceviča. U chutkim časie jamu atrymałasia pieraciahnuć žonku na pracu da taho ž Kunceviča, jana stała jahonaj sakratarkaj-mašynistkaj.
Kali Kunceviča zvolnili z saŭhasa, to adtul chutka i syšli i Markievičy. Maci ŭ chutkim časie stała zahadčycaj miascovaj pošty.
U Hramkach usie kataliki, viadoma, nie vyklučeńnie tut i siamja Markievičaŭ. Dziaciej vazili chryścić ci to ŭ Litvu, ci to ŭ Žałudok. Samy blizki kaścioł, jaki ŭ Novym Dvary, u toj čas nie pracavaŭ.
U Miečysłava i Janiny Markievičaŭ troje dziaciej. Starejšy Viktar pracuje namieśnikam hienieralnaha dyrektara pa techničnych pytańniach «Hrodzienskaha harbarnaha abjadnańnia». «U ich tam svajak pracavaŭ, jaki ŭładkavaŭ Viktara, jon spačatku tam ci to elektrykam pracavaŭ, ci to kim, a potym namieśnikam dyrektara staŭ», — raskazvajuć u Hramkach.
Darečy, doŭhi čas «Hrodzienskaje harbarnaje abjadnańnie» ŭznačalvaŭ Siamion Domaš, adzin z kandydataŭ ad apazicyi na vybarach 2001 hoda, jaki potym syšoŭ na dziaržaŭnuju słužbu. Domaš pamior u minułym hodzie.
Małodšaja dačka Natalla žyvie i pracuje ŭ Ščučynie. Jana hałoŭnaja śpiecyjalistka ŭpraŭleńnia ekanomiki miascovaha rajvykankama. A jaje muž Siarhiej Asavik pracuje načalnikam achovy pravaparadku Ščučynskaha RAUS.
«Kali Anatol advučyŭsia ŭ Breście, to pajechaŭ pracavać u Prudziany — heta pobač z Hramkami, žyŭ u baćkoŭ, tam mo hady dva pabyŭ dyrektaram škoły, a potym jaje zakryli. Paśla pracavaŭ nastaŭnikam fizkultury ŭ Novym Dvary, ale chutka staŭ znoŭ dyrektaram škoły ŭ Bakštach, ale i tuju škołu zakryli», — raskazvajuć adnaviaskoŭcy.
U vyniku Anatol vyrašyŭ źjechać na radzimu žonki ŭ Karelicki rajon. Alena Markievič, u dziavoctvie Kavalevič, rodam z Turca na Kareliččynie. Vučyłasia na bijałahičnym fakultecie ŭ Hrodnie. «Dzie jany paznajomilisia ŭžo i nie pomnim, ale viasielle hulali ŭ nas», — kažuć u Hramkach.
Kali Anatol Markievič uznačaliŭ Navahrudski rajvykankam, to žonku trymaŭ pobač. Jana pracavała hałoŭnaj śpiecyjalistkaj adździeła kultury rajvykankama. Mabyć, samy blizki kantakt z kulturaj u Markieviča.
U pary troje synoŭ. Starejšy Illa sioleta skončyŭ BNTU, kažuć, što ŭładkavaŭsia ŭ pryvatnuju firmu.
Siaredni Jaŭhien skončyŭ sioleta škołu i pastupiŭ vučycca ŭ BDPU imia Tanka na nastaŭnika fizkultury. Jon maryŭ stać prafiesijnym futbalistam, ale nie duža atrymałasia. Samy małodšy syn jašče treciakłaśnik — poźniaje dzicia.
Na radzimu Anatol Markievič starajecca pryjazdžać časta, ale, kali pracavaŭ u Breście, to rabić heta nie duža atrymlivałasia.
Kamientary