AAN daje katastrafičny dla najbiadniejšych krain prahnoz na 2021 hod
Śviet sutyknuŭsia z najmacniejšym za 75 hadoŭ kryzisam, vyklikanym pandemijaj, — na miažy hałodnaj śmierci apynulisia amal 270 młn čałaviek.
Nastupny hod projdzie pad znakam humanitarnaj katastrofy, jakuju vyklikała pandemija karanavirusnaj infiekcyi. Pra heta zajaviŭ dyrektar Suśvietnaj charčovaj prahramy (SCHP) AAN Devid Biźli na śpiecyjalnaj siesii Hienasamblei arhanizacyi, piša RBK.
Pa słovach Biźli, kryzisu, padobnaha da siońniašniaha, nie było za ŭsie 75 hadoŭ isnavańnia AAN. Jon adznačyŭ, što za apošnija čatyry hady z-za ŭzbrojenych kanfliktaŭ u śviecie kolkaść tych, chto haładaje, vyrasła z 80 młn da 135 młn čałaviek.
A pandemija mienš čym za hod padvoiła hetuju ličbu.
«Z-za karanavirusa kolkaść ludziej, što litaralna stajać na parozie hałodnaj śmierci, vyrasła da 270 młn. Miarkujučy pa tym, što my bačym ciapier, 2021 hod budzie litaralna katastrafičnym», — papiaredziŭ Biźli.
Dyrektar charčovaj prahramy zajaviŭ, što praduchilić humanitarnuju katastrofu pieraškadžaje adsutnaść srodkaŭ: suśvietnaja supolnaść vydatkavała nieabchodnyja dla hetaha $19 trłn na baraćbu z pandemijaj, i naleta, chutčej za ŭsio, stolki sabrać nie ŭdasca.
«Idzie ekanamičny spad, a patreby vyraśli ŭdvaja. U nastupnym hodzie my nie zmožam dać dastatkovaje finansavańnie ŭsiamu. Tamu my pavinny zasiarodzicca na baraćbie z destabilizacyjaj, hoładam i mihracyjaj», — dadaŭ Biźli.
«Hoład biblejskich maštabaŭ» Biźli nazvaŭ u jakaści adnaho ź vierahodnych nastupstvaŭ pandemii jašče ŭ krasaviku. Tady jon zajaviŭ, što vostry niedachop charčavańnia adčuvajuć 265 młn čałaviek. Bolšaja častka ź ich pražyvajuć u Afrycy.
U žniŭni SCHP sprahnazavała rost kolkaści hałodnych u Łacinskaj Amierycy na 269%, va Uschodniaj i Centralnaj Azii — na 135%, A ŭ Afrycy — na 90%. Kab praduchilić heta, SCHP nieabchodna było na praciahu paŭhoda sabrać amal $5 młrd.
U pačatku listapada Charčovaja i sielskahaspadarčaja arhanizacyja (FAO) AAN paviedamiła pra mocnaje abvastreńnie situacyi z charčavańniem u čatyroch krainach i pahrozie hetaha jašče ŭ 16 dziaržavach. Pavodle źviestak arhanizacyi, najmacniej ad hoładu pakutujuć Burkina-Faso, Jemien, Paŭdniovy Sudan i Nihieryja.
Kamientary