Advakata Zikrackaha, jaki abaraniaje mnohich biełaruskich žurnalistaŭ, vyklikajuć na pieraatestacyju

Siarhiej Zikracki — adzin z najlepšych biełaruskich advakataŭ, jaki śpiecyjalizujecca na aŭtarskim, karparatyŭnym pravie, intelektualnaj ułasnaści. U apošni hod Zikracki taksama ŭdzielničaje na baku abarony ŭ palityčna matyvavanych spravach, jon abaraniaje mnohich biełaruskich žurnalistaŭ, jakija prachodziać pa administracyjnych i kryminalnych spravach. Zikracki abaraniaŭ Tut.by, kali jaho pazbaŭlali statusu ŚMI, žurnalistku Biełsat Kaciarynu Andrejevu (Bachvałavu), taksama jon advakat supracoŭnikaŭ pres-kłuba, jakija znachodziacca ŭ SIZA pa abvinavačvańni ŭ niavypłacie padatkaŭ.

Papiaredni raz kvalifikacyjnaja kamisija pa pytańniach advakackaj dziejnaści pravodziła pazačarhovuju atestacyju advakataŭ 4 sakavika. Jak paviedamiła Ministerstva justycyi, ź siami advakataŭ atestacyju prajšoŭ tolki adzin.

— Padstavaj dla vykliku na pieraatestacyju staŭ šerah maich kamientaroŭ u ŚMI. Ministerstva justycyi paličyła, što hetyja kamientary nie ŭ poŭnaj miery adpaviadajuć zakanadaŭstvu, a tamu śviedčać ab nienaležnym vykanańni mnoj svaich prafiesijnych abaviazkaŭ. U suviazi z hetym Ministerstva justycyi inicyjuje pazačarhovuju atestacyju, kab vyznačyć mahčymaść dalejšaha vykanańnia mnoj svaich prafiesijnych abaviazkaŭ, — raspavioŭ Tut.by Siarhiej Zikracki.

Cisk na advakataŭ, jakija ŭdzielničajuć u hučnych palityčnych spravach, pačaŭsia paśla prezidenckich vybaraŭ u žniŭni 2020 hoda.

Za apošnija niekalki miesiacaŭ Miniust pazbaviŭ licenzii advakataŭ Maryi Kaleśnikavaj Alaksandra Pylčanku i Ludmiłu Kazak. Akramia taho, licenzij pazbaŭlenyja advakaty Kanstancin Michiel, Michaił Kiryluk, Maksim Konan. Bieź licenzii moža zastacca Uładzimir Sazančuk, jaki abaraniaje palityka Mikałaja Statkieviča, błohiera Dźmitryja Kazłova i žurnalistku Kaciarynu Andrejevu (Bachvałavu).

U 2020 hodzie była taksama spynienaja licenzija advakata Julii Levančuk, jana viadomaja pa spravie ab abaronie źbitaha siłavikami pradprymalnika Maksima Charošyna.

Akramia pazbaŭleńnia licenzij, dziejnaść advakataŭ chočuć abmiežavać i zakonam. Niadaŭna stała viadoma, što ŭ Biełarusi rychtujecca zakonaprajekt «ab źmienie zakonaŭ pa pytańniach advakackaj dziejnaści», jakim prapanujecca zabaranić advakatam, jakija pracujuć indyvidualna, i advakackim biuro abaraniać ludziej, jakija prachodziać pa kryminalnych i administracyjnych artykułach.

Pra cisk na biełaruskich advakataŭ, jakija ŭdzielničajuć u palityčnych spravach, padčas 46-j siesii Rady AAN pa pravach čałavieka zajaŭlaŭ i Viarchoŭny kamisar AAN.

U abaronu biełaruskich advakataŭ vystupili Amierykanskaja asacyjacyja jurystaŭ (American Bar Association, ABA), Instytut pravoŭ čałavieka Mižnarodnaj asacyjacyi jurystaŭ (IBAHRI) i Fond Dž. Kłuni «Za spraviadlivaść» (CFJ), a taksama aŭtarytetnyja rasijskija advakaty.

• 0
• 0
• 0
• 0
• 0
• 0
• 0
• 0