Kuplajcie biełaruskaje

Maskva moža nie abmiežavacca sankcyjami suprać małočnaj pradukcyi. Što, kali jana zabaronić uvoz u RF hałoŭnaha biełaruskaha noŭ‑chaŭ?

Išoŭ 2012 hod. Jašče nie adhučała recha apošniaj rasijska‑biełaruskaj handlovaj vajny za kancylarskija knopki, jak pačałasia novaja.

Navina była jak hrom siarod jasnaha nieba. Hałoŭny sanitar Rasii zabaraniŭ impart ź Biełarusi idejaŭ sajuznaj dziaržavy. Jak antysanitarnych. «Biełaruskaja pradukcyja idejaŭ sajuznaj dziaržavy nie adpaviadaje rasijskim standartam jakaści», — paviedamiła Maskva.

Pad katok sankcyj trapili prykładna 1200 nazvaŭ biełaruskich sajuznych ideałahiem, u tym liku samyja papularnyja na rynku susiedziaŭ, jak «biełarusy tyja ž samyja rasijcy», «na zachad ad Smalensku niama nivodnaha rasijskaha sałdata», «my siabroŭstvam z Maskvoju handlavać nie budziem, ja tak Sałanu i skazaŭ».

Spačatku Minsk vyrašyŭ abyści zabarony za košt nievialikaha rebrendynhu. U Biełarusi źjavilisia takija frazy jak «rasijcy tyja ž samyja biełarusy» abo «my siabroŭstvam z Rasijskaj Fiederacyjaj handlavać nie budziem, ja tak Barozu i paviedamiŭ». Adnačasova presa pisała, što nijakaj handlovaj vajny niama, a biełaruskija ideołahi voś‑voś atrymajuć siertyfikaty, nieabchodnyja dla pracy na rasijskim rynku kancepcyj.

Tym časam u kułuarach pieramovaŭ pradstaŭniki rasijskaj tandemakratyi i kantralavanyja imi tłustyja aliharchičnyja katy nie chavali, što žadajuć prybrać da ruk hałoŭny biełaruski cech pa vytvorčaści sajuznych idejaŭ. Nu, abo, prynamsi, akcyjanavać jaho, a akcyi padzialić pa‑bratersku. Kali cech daviedaŭsia pra hetyja płany, jon pieražyŭ šok i dva dni nie moh hulać u chakiej.

«Lepiej stojačy, čym na kaleniach!» — była reakcyja biełaruskaha boku. Kožnuju hadzinu pa BT pakazvali prostych rasijanaŭ, jakija płakalisia, što žyć nie mohuć biez taho, kab niechta im nie kazaŭ, što biełarusy — tyja samyja rasijcy. A viadučyja «Panaramy» pałochali, što vakantnuju nišu biełaruskich idejaŭ sajuznaj dziaržavy moža zaniać kitajskaja padrobka kštałtu «mančžury tyja ž rasijcy».

U adkaz zalaskaŭ kalkulatar «Hazpromu»: pieralik cenaŭ na enierhanośbity pa novych taryfach vyliŭsia ŭ rachunak, roŭny sumarnamu VUP Respubliki Biełaruś ad kiebičaŭskich časoŭ da našych dzion. Adnačasova rasijski ŭrad zajaŭlaŭ, što heta sprečka haspadarčych subjektaŭ, na jakuju jon nie ŭpłyvaje, zaklikaŭ zališnie nie palityzavać pytańnie zabarony na ŭvoz sajuznych idejaŭ i vykazvaŭsia za supracoŭnictva ź Biełaruśsiu pa ŭsich napramkach u kanstruktyŭnym rečyščy. Padkreślivajučy, što Biełaruś i Rasija — adna siamja.

Aficyjny Minsk taksama dekłaravaŭ hatoŭnaść jašče hłybiej pašyrać palityčnyja i ekanamičnyja biełaruska‑rasijskija suviazi. Adnačasova mytniki pačali vybaračna prypyniać rasijskija aŭto i prahladać ich na najaŭnaść idej kantralavanaj demakratyi. U adkaz biełarusaŭ na maskoŭskich budoŭlach pačali praviarać na pradmiet sajuznaj rytoryki.

Pieršaja faza handlovaj vajny skončyłasia fienamienalnaj vychadkaj Minsku. Biełaruskija spartsmieny admovilisia jechać na Alimpijadu ŭ Sočy. MZS zajaviła, što Hulni nielehitymnyja.

• 0
• 0
• 0
• 0
• 0
• 0
• 0
• 0