Palitviaźnia Alaksandra Trockaha, asudžanaha da 10 hadoŭ, pieraviali ŭ mahiloŭskuju turmu jašče da apielacyi

Jak raspaviali svajaki Alaksandra Trockaha, doŭhi čas jany nie mahli daviedacca, dzie jon znachodzicca. Akramia taho, palitviaźnia źmiaščali ŭ karcar, ale ni pryčyny pakarańnia, ni jaho terminy svajaki daviedacca nie mohuć. 

Taksama Alaksandru nie addajuć listy ad žonki i dziaciej. Palitviazień nie atrymlivaŭ ad rodnych karespandencyi amal dva miesiacy. Pra heta jon sama napisaŭ u niadaŭnim liście rodnym. Pry hetym padkreśliŭ, što ad inšych svajakoŭ i ludziej jamu addajuć niekatoryja listy. 

Svajaki Alaksandra taksama adznačajuć, što da jaho ŭžo piać miesiacaŭ nie moža patrapić nataryus. Biez zaśviedčanych Alaksandram dakumientaŭ jahonaja firma nie moža funkcyjanavać u narmalnym režymie. 

Sud pa prysudu abaviazaŭ Trockaha vypłacić paciarpiełamu supracoŭniku DAI 10 tysiač rubloŭ maralnaj i materyjalnaj škody. 

«Škodu jašče nie vypłacili. Čakajem apielacyju i źbirajem pacichu hrošy, chacia baćka prasiŭ pa mahčymaści nie płacić», — raspavioŭ syn Alaksandra.

Nahadajem, Minski haradski sud 5 sakavika vynies prysud pa kryminalnaj spravie za zamach na zabojstva supracoŭnika orhanaŭ unutranych spraŭ (art. 14 art. 362 Kryminalnaha kodeksa) suprać 45-hadovaha biznesmiena Alaksandra Trockaha. Pavodle abvinavačvańnia, jon pravioz 12 žniŭnia na kapocie svajoj mašyny supracoŭnika DAI Uładzimira Jurava, u vyniku čaho toj atrymaŭ cialesnyja paškodžańni, jakija nie paciahnuli za saboj karotkačasovaha rasstrojstva zdaroŭja. Pa słovach Trockaha, jaho mašynu biespryčynna spynili ludzi ŭ ciomnym i bałakłavach, a kali toj, bajučysia za svajo žyćcio, admoviŭsia vyjści z mašyny, supracoŭnik DAI «dastaŭ bajavuju zbroju i nakiravaŭ u jaho bok, pryceliŭsia prama ŭ hałavu», paśla hetaha jon źjechaŭ ź miesca. Paśla zatrymańnia Trockaha mocna źbili.

Z čerapna-mazhavoj traŭmaj pad kanvojem i ŭ kajdankach jon pravioŭ u špitali try tydni. Zatym Alaksandra Trockaha pieraviali ŭ SIZA-1 pa kryminalnaj spravie za hvałt u dačynieńni da milicyjanta (art. 364 KK). Ale pierad pieradačaj spravy ŭ prakuraturu śledčyja pierakvalifikavali abvinavačańnie na bolš žorstkaje — zamach na zabojstva supracoŭnika orhanaŭ unutranych spraŭ.

Sudździa Siarhiej Chrypač pryznaŭ Alaksandra vinavatym pa art. 14 art. 362 Kryminalnaha kodeksa, vyrašyŭ, što ŭ Trockaha sapraŭdy byŭ namier na zabojstva supracoŭnika DAI i pakaraŭ jaho 10 hadami pazbaŭleńnia voli va ŭmovach uzmocnienaha režymu. Prakuror Anton Ciumiencaŭ prasiŭ pakarać Trockaha 11 hadami kałonii. Heta rekordny termin źniavoleńnia dla zatrymanaha padčas pratestaŭ. Taksama sud abaviazaŭ Trockaha vypłacić paciarpiełamu supracoŭniku DAI 10 tysiač rubloŭ maralnaj i materyjalnaj škody.

• 0
• 0
• 0
• 0
• 0
• 0
• 0
• 0