Samy doŭhi vypadak: brytaniec chvareŭ na kavid na praciahu 10 miesiacaŭ
Za hety čas jon 42 razy prajšoŭ praz PŁR-testy i siem razoŭ byŭ špitalizavany.
72-hadovy brytaniec Dejv Śmit z horada Brystal zachvareŭ na kavid padčas pieršaj chvali pandemii, jašče ŭ 2020 hodzie. U bolšaści ludziej hety virus źnikaje ź cieła na praciahu niekalkich tydniaŭ paśla zaražeńnia, ale Śmit — vyklučeńnie.
Na praciahu 290 dzion, abo amal što dziesiaci miesiacaŭ, u arhaniźmie mužčyny byŭ prysutny virus kavidu. Na siońnia heta samy doŭhi viadomy vypadak kavidu, piša Guardian.
Za čas chvaroby Śmitu 42 razy rabili PŁR-testy, siem razoŭ mužčynu špitalizavali. Jon raspaviadaje, što časam jaho stan byŭ nastolki drenny, što žonka piać razoŭ pačynała rychtavać jaho pachavańnie. Dva-try miesiacy mužčyna byŭ prykavany da łožka, adnojčy jon navat źviazvaŭsia pa Skype z rodnymi z Novaj Ziełandyi, kab raźvitacca ź imi. Časam miedyki vykazvali zdahadku, što Śmit maje paŭtorny kavid abo što testy reahujuć stanoŭča na niejkija reštki virusa ŭ jaho arhaniźmie. Ale praz daśledavańni hienietykaŭ stała viadoma, što ŭvieś hety čas u ciele brytanca była adna i taja ž infiekcyja.
Dejva Śmita narešcie zdoleli vylečyć pry dapamozie kaktejlu z antycieł, raspracavanaha farmaceŭtami kampanii Regeneron — taki ž preparat atrymlivaŭ Donald Tramp. Brytancu pieradali leki pa tak zvanaj prahramie prymianieńnia lekaŭ ź mierkavańniaŭ humannaści. Pa jaje ŭmovach, časam pacyjentam dajuć dostup da lekaŭ, prymianieńnie jakich pakul što aficyjna nie dazvolena, ale dla hetaha pacyjentu nie pavinny prynieści palohki dazvolenyja leki.
Infiekcyjanist Ed Moran z Brystala tłumačyć, što takich pacyjentaŭ nie vielmi šmat, ich kolkaść składaje niekalki čałaviek na špital. Niekatoryja ź ich hinuć ad chvaroby, ale dla častki takich pacyjentaŭ kavid pieratvarajecca ŭ zaciažnuju chvarobu ź pieryjadami abvastreńnia i palohki. U kryvi bolšaści ludziej z zaciažnoj infiekcyjaj nizki ŭzrovień antycieł, što niejtralizujuć virus kavidu. Miedyki źviazvajuć heta abo ź niadaŭna pieraniesienym kursam lačeńnia suprać raku kryvi, abo z unaśledavanymi prablemami ŭ vytvorčaści antycieł.
Što datyčycca Śmita, u 2019 hodzie jon prajšoŭ praz chimijaterapiju ŭ metach baraćby ź lejkiemijaj. Jakraz pierad sakavikom 2020 hoda, kali mužčyna adčuŭ pieršyja simptomy kavidu, Śmitu paviedamili, što jon pieramoh rak.
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary