«Prahułka na hadzinu vakoł doma». Siarhiej Drazdoŭski — pra paŭhoda chatniaha aryštu

Raspytali Siarhieja, jak jon pieranios hetyja paŭhoda ŭ chatniaj izalacyi i što razam z kalehami źbirajecca rabić z rašeńniem Minharvykankama likvidavać ich arhanizacyju.

Advakat Siarhieja jašče ŭ mai sprabavaŭ dabicca źmieny Siarhieju miery ŭtrymańnia, užo tady byli znojdzienyja paručalniki, adnak heta adbyłosia ŭ lipieni. 

«Vyrašalnym, na moj pohlad, staŭ termin — hetyja šeść miesiacaŭ. Bo pa zakonie, kab utrymlivać mianie i Aleha pad aryštam bolš za hety čas, śledstvu byli b patrebnyja značnyja novyja padstavy. Musić, ich nie było», — vykazvaje zdahadku Siarhiej.

Paŭhoda jon pravioŭ amal što zamknionym u svajoj chatniaj prastory. Siarhiej mieŭ dostup da telebačańnia i radyjo, ale internetam karystacca było nielha. Špacyr — adzin raz na dzień z 11 da 12 vakoł doma. Možna było taksama naviedvać daktaroŭ, kali na toje davaŭsia papiaredni dazvoł. 

«Jak vazočnika, mianie mahli naviedvać blizkija, jany dapamahali z pobytavymi momantami. Toje, što ja maju invalidnaść, spraściła mnie adsutnaść ruchu jak takoha: ja daŭno pryzvyčaiŭsia zajmacca fizičnymi praktykavańniami doma. Ja ŭspryniaŭ aryšt jak składanuju zadaču, jakoj damo rady. Pierahortvaŭ chatniuju biblijateku, zmoh zasieści za napisańnie płanaŭ. Ciažka, kali tabie niama z kim ich abmierkavać. Ale ŭsio heta nie paraŭnajecca ź ciažkaściami taho ž Aleha ŭ SIZA».

Pieršaje, što zrabiŭ Siarhiej, kali aryšt skončyŭsia, akramia zvankoŭ siabram i pahružeńnia ŭ sacsietki, heta naviedaŭ cyrulniu. 

«Ja dla siabie vyrašyŭ, što nie budu padčas aryštu šukać mahčymaści heta zrabić. Zaros za paŭhoda zaŭvažna. Uvohule, heta, kaniečnie, vielmi pryjemnyja pačućci: kali ty možaš vychodzić na vulicu, kali tabie treba, možaš telefanavać tamu, kamu tabie treba, pisać u fejsbuku. Takija zvyčajnyja rečy, ale takija važnyja». 

U lutym paśla apytańnia ŭ DFR Siarhiej raskazvaŭ, jak jamu pahražali turmoj, kali jon nie pryznajecca ŭ złačynstvach ich arhanizacyi, nazyvali machlarom. Supracoŭniki, što brali ŭdzieł u apytańni, pavodzili siabie hruba. Tady ž Siarhiej ahučyŭ, što ŭvaha orhanaŭ da ich była vyklikanaja nibyta finansavańniem pratestoŭcaŭ. Pa słovach Siarhieja, minułyja paŭhoda aryštu supracoŭniki stavilisia da jaho karektna.

Siarhiej byŭ u kursie, što adbyvałasia ŭ krainie, ale vyklučna ŭ farmacie «zahałoŭkaŭ», biez padrabiaznaściaŭ. Tamu ŭ pieršy ž dzień źmianieńnia miery ŭtrymańnia zadaŭsia metaj maksimalna zapoŭnić infarmacyjnyja prabieły i pieračytvaŭ staryja naviny ŭ detalach. Pryznajecca, što ŭsio heta dałosia jamu ciažka: «nibyta naviny štodzień byli horšymi i horšymi».

Pra toje, što Minharvykankam u kancy lipienia pryniaŭ rašeńnie ab likvidacyi «Ofisa pa pravach ludziej ź invalidnaściu», Siarhiej daviedaŭsia ad kaleh praz advakata. 

«Naš «Ofis» staŭ adnym z šerahu arhanizacyj, jakija chočuć likvidavać. I pakul što my, jak i astatnija kalehi, atrymali nieadekvatnyja tłumačeńni: za toje, što my 24 miesiacy nie prynosili prybytku (ale ž my niekamiercyjnaja ŭstanova). Viadoma, heta nie moža być sapraŭdnaj pryčynaj.

U paniadziełak my z kalehami budziem źbiracca i vyrašać, jak pracavać dalej. U nas, naprykład, byŭ raspačaty vialiki prajekt pa pracy ź dziećmi ź invalidnaściu, a zaraz našy bankaŭskija rachunki aryštavanyja. Treba budzie zrazumieć, jak praciahvać našu dziejnaść, bo ŭ nas niama sumnievaŭ, što jaje treba praciahvać. U siońniašnich umovach jašče bolš aktualnaja praca pa abaronie pravoŭ čałavieka. Dziaržaŭnyja orhany praciahvajuć šukać niejkija zmovy i terarystaŭ z ekstremistami, začyščajuć pravaabarončyja arhanizacyi, ale niemahčyma žyć pa-za miežami pravoŭ u sučasnym śviecie. Jak i niemahčyma zabaranić prahu svabody i žadańnie lepšaj budučyni», — kamientuje Siarhiej.

• 0
• 0
• 0
• 0
• 0
• 0
• 0
• 0