Zachad nie budzie ŭvodzić sankcyi paśla vyhnańnia Cimanoŭskaj. Ekśpierty — pra nastupstvy spartovaha skandału
Biełaruś znoŭ trapiła na pieršyja staronki zachodnich ŚMI praz skandał, na hety raz — vyhnańnie z Alimpijady Kryściny Cimanoŭskaj, jakaja publična raskrytykavała dziejańni spartyŭnych funkcyjanieraŭ. Kryścinu bieź jaje viedama pastavili vystupać na dadatkovaj dystancyi. Jakija palityčnyja nastupstvy čakajuć Biełaruś?
Palityčny analityk Arciom Šrajbman adznačaje, što «heta historyja nie tolki pra miechanizmy raboty našaj dziaržavy, ale i pra reputacyju. Kali b spartyŭnyja čynoŭniki luboj inšaj krainy, akramia Biełarusi i, napeŭna, KNDR, vyrašyli davieźci da aeraporta spartsmiena, źniataha z hulniaŭ za roznahałośsi sa svaim načalstvam, nichto b navat nie źviarnuŭ uvahi. A ŭ našym vypadku ŭsim, navat u dalokaj Japonii, jasna, što moža pahražać Cimanoŭskaj u krainie — donary jeŭrapiejskaj biaśpieki».
«Łukašenka moža razzłavacca»
Pry hetym Šrajbman ličyć, što nie varta čakać rezkaj reakcyi Zachadu.
«Usio ž taki hety kiejs nie mocna vyłučajecca z łohiki pavodzinaŭ biełaruskich uładaŭ, — adznačaje ekśpiert. — Jon nie bolš aburalny za žorstkija prysudy, jakija vynosiać u Biełarusi ledź nie štotydzień. Pa vyniku heta viadzie da taho, što Zachad praciahvaje ŭsprymać našu krainu jak režym, jaki varta strymlivać i karać. Ale ja sumniajusia, što reakcyja ci sankcyi buduć mienavita na hety kiejs. Całkam mahčyma, što fihuranty spravy z boku NAK trapiać u nastupny pakiet sankcyj ZŠA, Jeŭrasajuza ci asobnych bałtyjskich krain, bo takija dziejańni možna paličyć palityčnymi represijami. Pa fakcie Cimanoŭskuju pačali «presavać» paśla taho, jak jana raskrytykavała pradstaŭnikoŭ ułady.
Pa mierkavańni analityka, sankcyi ŭ dačynieńni da Biełarusi mohuć być mienavita z boku spartyŭnych arhanizacyj. U takim vypadku «Łukašenka moža razzłavacca».
«Heta moža adlustravacca na bolš pilnym ideałahičnym adbory ludziej, jakija pradstaŭlajuć Biełaruś na spabornictvach. Spartoŭcaŭ, jakija padpisali pietycyi ci zajavy suprać hvałtu, mohuć pierastać da ich dapuskać, bo buduć ličyć nienadziejnymi. Dumaju, mahčymyja i pakarańni čynoŭnikaŭ, jakija dapuścili, kab hetaja situacyja vyliłasia ŭ taki skandał».
«U Biełarusi kryzis nie skončyŭsia»
Ekśpiert Jeŭrapiejskaha centra mižnarodnych adnosin (ECFR) Pavieł Ślunkin ličyć, što kiejs Cimanoŭskaj chutčej pakazvaje Zachadu, što «ŭ Biełarusi nie ŭsio dobra, kryzis nie skončyŭsia i treba im zajmacca».
«Što tyčycca niejkich sankcyj, intaresy Zachadu tut naŭprost nie zakranajucca. U suchim astatku spartsmienku prosta źniali sa spabornictvaŭ za toje, što jana krytyčna vykazałasia nakont svajho kiraŭnictva. Ja b nie čakaŭ mocnaj palityčnaj reakcyi z boku zachodnich krain. Dumaju, kali jana budzie, to tolki ad spartyŭnych kamitetaŭ».
Ślunkin miarkuje, što chacia situacyja ź Cimanoŭskaj niedapuščalnaja, ale jon nie bačyć, kab palityki «vielmi hučna vykazvalisia ci zaklikali da čahości».
«A heta było, kali adbyŭsia rejs z Pratasievičam. Roźnica pamiž hetymi vypadkami vidavočnaja. U situacyi z Ryanair byli parušanyja praviły aviazłučeńnia. Heta byŭ unutryjeŭrapiejski rejs, jaki pralataŭ tranzitam praź Biełaruś. Da taho ž, na borcie znachodzilisia jeŭrapiejskija hramadzianie. Vypadak ź Cimanoŭskaj inšy, tamu tut varta čakać rytaryčnaha asudžeńnia i sankcyj z boku MAK. Mahčyma, u asabisty sankcyjny śpis uklučać datyčnych da skandału ludziej, — dadaje Ślunkin. — Ale ž samaje važnaje: hety skandał pakazvaje, što kryzis u Biełarusi nie skončany i budzie praciahvacca dalej.
«Rezkich palityčnych dziejańniaŭ nie budzie»
Dyrektar pa daśledavańniach Centra novych idej Ryhor Astapienia kaža, što palityčnaja sistema Biełarusi funkcyjanuje ŭ režymie, kali luboje prajaŭleńnie niełajalnaści ŭsprymajecca jak vyklik, na jaki treba reahavać maksimalna žorstka.
«Represijami prasiaknutyja šmat jakija dziaržaŭnyja orhany. I jany ličać, što kali pastupiać nie tak rezka, to trapiać u niamiłaść Łukašenki, — raspaviadaje jon. — Što tyčycca nastupstvaŭ, mnie zdajecca, ciapier treba čakać rasśledavańnia z boku MAK. I ŭžo paśla mohuć być nakładzienyja sankcyi, jakija zakranuć spartovaje ŭzajemadziejańnie».
Na dumku palitołaha, niejkich rezkich palityčnych dziejańniaŭ ad uładaŭ inšych dziaržaŭ adnosna hetaha vypadku chutčej za ŭsio nie budzie.
«Hetaja situacyja nie źjaŭlajecca nadzvyčajnaj situacyjaj u kantekście tych represij, jakija adbyvajucca ŭnutry Biełarusi. My bačyli vielmi roznyja ich prajaŭleńni ciaham apošniaha hodu, tamu ja nie dumaju, što tut možna kazać pra niejki novy ŭzrovień», — sumiruje Astapienia.
«Hałoŭnaje — heta vopyt!» Łukašenka nazvaŭ, kaho bačyć nastupnym prezidentam14
Kamientary