Cukru na try dni? Čytačy masava skardziacca na adsutnaść praduktu ŭ kramach, raźbirajemsia
Stali źjaŭlacca paviedamleńni ab tym, što ŭ biełaruskich kramach prablemna znajści cukar. «Naša Niva» źviarnułasia da čytačoŭ praz naš telehram-kanał. I ludzi z roznych miescaŭ krainy kanstatujuć prablemu. Raźbirajemsia, što adbyvajecca.
«Kapyl. Cukar jość tolki ŭ adnoj kramie, pradaŭcy platkarać, što novy zavoz budzie nie rasfasavany, adrazu ŭ miachach pa 50 kiłahram, dy daražejšy».
«Śmiłavičy, Červieński rajon, niama cukru».
«U kramach «Kapieječka», «Dabranom», «Jeŭraopt», «Vostraŭ čyścini» źnik cukar. Kažuć, pryjdzie daražejšy. Rajcentr Mahiloŭskaj vobłaści».
«Pleščanicy. Učora nie znajšli cukru ŭ niekalkich kramach, u adnoj dalniaj, na ŭskrajku, zabrali apošni pačak».
«Smalavičy — u «Jeŭraopcie» try dni niama cukru».
«U mnohich «Jeŭraoptach» skončyŭsia cukar, pazvaniŭ na haračuju liniju — kažuć pra prablemy ŭ pastaŭščykoŭ».
Taksama čytačy paviedamlajuć, što chodziać čutki, nibyta novaja partyja cukru ŭžo budzie kaštavać nie 1,68 rubla za kiłahram, a 2,2.
Što adbyvajecca?
Jak my vyśvietlili, sioleta čakajecca antyrekord u zbory cukrovaha buraka, pra heta sihnalizujuć ludzi, blizkija da Ministerstva sielskaj haspadarki.
«Sieleta vielmi małaja ŭradžajnaść cukrovaha buraka, jon pahareŭ na palach. Zbor adbyvajecca ŭ vieraśni, kolki dakładna sabrali, stanie jasna ŭ kastryčniku, ale z paloŭ kažuć, što zusim strach. Adnaznačna varta čakać rostu cen na cukar i hetak dalej, pa łancužku», — tłumačyć nam abaznany.
Pa našaj infarmacyi, u suviazi ź piesimistyčnymi čakańniami na rynku, pastaŭščyki śpiecyjalna zaciahvajuć pastaŭki: viedajuć, što «zaŭtra», kali MARH vymušany budzie padniać ceny na cukar (jakija rehulujucca dziaržavaj), staryja zapasy možna budzie pradać daražej.
Pavyšeńnie maksimalnaj adpusknoj cany, sapraŭdy, čakajecca ŭ halinie, bo inačaj buduć ciarpieć dziaržaŭnyja cukrovyja zavody.
«Ciapier cukar u Minsku pradajecca pa 1,72 rubla. Kali razvažać z pazicyi pastaŭščyka, to viedajučy, što nastupnyja zakupki buduć daražejšymi, stanie vidavočna, što imavierny prybytak za vierasień prybytkam nie akažacca. Bo na zakupku novych partyj pryjdziecca nakiravać bolšyja sumy hrošaj. A voś kali pačakać, to ty i raniejšyja partyi pradasi daražej, čym płanavaŭ, i ničoha nie straciš. Tamu jany i trymajuć pastaŭki, navat majučy pradukcyju, čakajuć što budzie dalej», — tłumačyć «Našaj Nivie» pradstaŭnik rytejłu.
Minčanka pakinuła stanoŭčy vodhuk na sumku — i raptam vykryła zdradu čužoha muža20
Kamientary