«Dziela pavahi čałaviečaj hodnaści». ES i Rada Jeŭropy zaklikali Biełaruś admianić śmiarotnaje pakarańnie
Jeŭrasajuz i Rada Jeŭropy zajavili ab nieprymańni śmiarotnaha pakarańnia va ŭsich krainach śvietu i pry lubych abstavinach, pieradaje Radyjo Svaboda.
«Śmiarotnaje pakarańnie — heta žorstkaje, biesčałaviečnaje i prynižalnaje dla hodnaści pakarańnie, jakoje supiarečyć pravu na žyćcio. Jaho admiena nieabchodnaja dziela pavahi čałaviečaj hodnaści», — havorycca ŭ sumiesnaj zajavie kiraŭnika dypłamatyi ES Žaziepa Barela i hienieralnaha sakratara Rady Jeŭropy Maryi Pejčynavič-Buryč z nahody Jeŭrapiejskaha i Suśvietnaha dnia suprać śmiarotnaha pakarańnia, jaki adznačajecca 10 kastryčnika.
«My zaklikajem Biełaruś pierajści da admieny pakarańnia śmierciu», — havorycca ŭ zajavie Barela i Pejčynavič-Buryč.
U zajavie padkreślivajecca, što admiena śmiarotnaha pakarańnia — heta pierš za ŭsio pytańnie palityčnaj voli.
Lik krain, u jakich karajuć śmierciu ludziej, praciahvaje skaračacca. U minułym hodzie pakarańni nie pravodzilisia ŭ 176 krainach. Heta 91% dziaržaŭ-členaŭ AAN.
Biełaruś zastajecca adzinaj krainaj Jeŭropy, dzie jość śmiarotnaje pakarańnie.
Ułady Biełarusi admovilisia vynosić pytańnie admieny śmiarotnaha pakarańnia na bližejšy refierendum, jaki pavinien prajści da lutaha 2022 hoda.
Kamientary