Daviedacca, jakoj majomaściu vałodajuć čynoŭniki, stała niemahčyma
Nacyjanalnaje kadastravaje ahienctva źmianiła infarmacyju ŭ bazach nieruchomaści. Ciapier imiony hramadzian i pradprymalnikaŭ, jakija vałodajuć majomaściu, schavanyja. Raniej pry dapamozie hetaj bazy možna było daviedacca, naprykład, ułaśnikami jakoha žylla źjaŭlajucca čynoŭniki.
Jak ahienctva tłumačyć pryčynu? Pačaŭ dziejničać zakon «Ab abaronie piersanalnych danych», pryniaty viasnoj. Takim čynam, z 15 listapada piersanalnyja danyja hramadzian i indyvidualnych pradprymalnikaŭ, jakim naležyć nieruchomaść, bolš nie buduć adlustroŭvacca.
Dziaržsłužačyja abaviazanyja štohod padavać dekłaracyi ab dachodach — na siabie i blizkich svajakoŭ, adnak da hramadstva hetyja źviestki nie dachodziać. Choć u mnohich jeŭrapiejskich krainach u metach baraćby z karupcyjaj hetyja danyja — adkrytyja. U Biełarusi ž ličać heta niemetazhodnym.
Hienprakuror Alaksandr Kaniuk u svoj čas zajaŭlaŭ, što publikacyja takoj infarmacyi moža stać nahodaj dla złačynstvaŭ suprać majomaści čynoŭnikaŭ.
Nahadajem taksama, što sioleta było źmienienaje i kryminalnaje zakanadaŭstva ŭ častcy abarony piersanalnych danych. Źjavilisia dva novyja artykuły:
- Art. 203-1 KK: Niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych. Važna: kali havorka idzie pra raspaŭsiudžvańnie źviestak čynoŭnikaŭ i ich rodnych, pakarańnie bolš žorstkaje — da 5 hod kałonii.
- Art. 203-2 KK: Nievykanańnie mier zabieśpiačeńnia abarony piersanalnych danych.
U najbližejšy čas supracoŭniki dziaržorhanaŭ, jakija majuć dostup da zboru i apracoŭki piersanalnych danych, pavinny prajści dadatkovaje navučańnie, kab nie dapuścić parušeńnia zakona.
Zavadčanin Ihar, jaki viartaŭsia dadomu buchim, upieršyniu ŭ žyćci jedzie za miažu. A jašče jon chałasty7
Kamientary