Što budzie z rejsami «Biełavija» i cenami na kvitki, kali tak šmat zabaronaŭ?
Vysoki turystyčny siezon skončyŭsia, ale popyt na pieraloty jość u luby čas. Dla vyletaŭ ź Biełarusi ŭžo dziejničaŭ šerah abmiežavańniaŭ, a napiaredadni ES raspaŭsiudziŭ sankcyi na avijakampaniju «Biełavija».
Onliner.by pasprabavaŭ razabracca, što ŭsio heta značyć.
U aficyjnym časopisie ES pryvodzicca tłumačeńnie pryčyn, čamu «Biełavija» ŭklučyli ŭ sankcyjny śpis. Ale kankretnyja zabarony tam nie prapisanyja.
Tym nie mienš hetaja situacyja ŭžo paŭpłyvała na pracu avijakampanii.
— U suviazi z uviadzieńniem abmiežavańniaŭ avijakampanija vymušana skaraciła park pavietranych sudoŭ. Na hety momant fłot avijakampanii składajecca z 15 samalotaŭ, — paviedamili ŭ «Biełavija».
Pavodle infarmacyi na sajcie kampanii, na pačatku hoda było 29 pavietranych sudoŭ.
«Na pačatku hoda ŭ «Biełavija» znachodziłasia 18 samalotaŭ u lizinhu. Stroha vykonvajučy kantrakty, častkova my viarnuli samaloty na patrabavańnie lizinhavych kampanij» — raspaviadaŭ kiraŭnik avijakampanii Ihar Čarhiniec u kancy listapada.
Hetych samalotaŭ chopić?
U avijakampanii ličać, što hetaha całkam dastatkova dla vykanańnia ŭsich zapłanavanych rejsaŭ u zimovym siezonie — jak rehularnych, tak i čartarnych.
Samy vialiki kamiercyjny fłot u śviecie ŭ avijakampanii American Airlines — kala 900 samalotaŭ. U inšych hihantaŭ, niamieckaj Lufthansa i amierykanskaj United Airlines — prykładna pa 760 samalotaŭ.
Ci realna kupić novyja samaloty?
U kampanii kažuć, što tak.
Da letniaha siezona chočuć kupić novyja samaloty, a taksama damovicca ab lizinhu z kampanijami — nierezidentami ES.
«Jość dla hetaha Kitaj, jość inšyja krainy ŭ Jeŭropie, jakija nie naležać da ES, u Rasii budziem brać samaloty. My znojdziem borty dla našaha parku. Častku samalotaŭ my ŭžo nabyli, častku jašče kupim ciapier», — kamientavaŭ Čarhiniec razryŭ stasunkaŭ ź lizinhavymi kampanijami ź ES.
Chaču kupić kvitki na zimovyja vakacyi. Ci mohuć potym admianić rejsy?
U «Biełavija» zajaŭlajuć, što ŭviedzienyja abmiežavańni nie adabjucca na rejsach, jakija ŭžo zapłanavanyja ŭ biahučym raskładzie. Ale asobnyja karekciroŭki mohuć być.
— Zimovy raskład sfarmavany. Jak i raniej, u pracesie pracy i analizu zahružanaści rejsaŭ u raskład mohuć unosicca kropkavyja karekciroŭki na praciahu ŭsiaho siezona, źviazanyja z aptymizacyjaj ratacyi samalotaŭ i pabudovaj aptymalnaj stykavaj bazy.
Pieravažnaja bolšaść rejsaŭ budzie vykananaja pa raskładzie. U adzinkavych vypadkach źmieny raskładu pasažyry rehularnych rejsaŭ papiaredžvajucca pra heta piersanalna, pry źmienie raskładu čartarnych rejsaŭ infarmujecca zakazčyk rejsa, — kažuć pradstaŭniki avijapieravozčyka.
A što z čartarami?
U turystyčnych kampanijach tłumačać, što na hety momant čartary ź Biełarusi lotajuć tolki ŭ Jehipiet. Karekcirovak u raskładzie nie było.
— Viadoma, turfirmy taksama sočać za tym, što adbyvajecca, bo ŭ nas jość zaležnaść ad čartaraŭ. Ciapier latajem tolki ŭ Jehipiet, adpaviedna, zadziejničana nie tak šmat samalotaŭ, kab, umoŭna kažučy, ich nie chapiła. Kudy bolš bartoŭ treba ŭ letni siezon, kali jość Turcyja i, mahčyma, inšyja kirunki.
Z rehularnych napramkaŭ, kudy ciapier lotajuć turysty, heta Emiraty. Tudy, jak zvyčajna, lotajuć «Biełavija» i flydubai.
Naohuł, asablivaść zimovaha siezona — heta ekzatyčnyja napramki z vyletam z Maskvy. Heta nie masavy patok turystaŭ. Da taho ž častka ludziej, jakija źbiralisia ciapier lacieć, z-za novaha štama «amikron» vyrašyli pieračakać, pahladzieć, jak budzie ŭsio raźvivacca.
Inšaja situacyja: bilet nabyty, ciapier dumaju ab tym, kab jaho zdać. Mnie viernuć hrošy? Ci ja mahu palacieć paźniej?
Hrošy za kvitki viartajucca ŭ adpaviednaści z praviłami abranaha taryfu. Nie dla ŭsich taryfaŭ viartańnie biletaŭ dazvolenaje.
Źmianić datu padarožža možna z dapłataj abo bieź jaje, heta zaležyć ad abranaha taryfu.
Ci možna ciapier palacieć na adpačynak i potym zastacca ŭ inšaj krainie?
— Ryzyki zastacca ŭ čužoj krainie niama. Dziaržavy, u jakija ciapier vykonvajucca paloty, adkrytyja dla «Biełavija», novyja abmiežavańni nie paŭpłyvajuć na ich dastupnaść, rejsy buduć vykonvacca ŭ adpaviednaści z raskładam, — kažuć u avijakampanii.
Što budzie z koštami na kvitki?
Ceny na avijabilety mianiajucca dynamična i zaležać ad biahučaj i prahnazujemaj zahruzki rejsaŭ, popytu na avijapieravozki pa kankretnym kirunku i inšych faktaraŭ. U suviazi ź situacyjaj cana na pieraloty nie źmienicca, ličać u avijakampanii.
A što budzie letam, kali turysty masava zachočuć na mora?
Pakul ni turfirmy, ni avijakampanija nie dajuć kankretyki. Ab novych napramkach kazać nie prychodzicca.
— Pry płanavańni raskładu palotaŭ na letni pieryjad-2022 avijakampanija zychodzić z realnaj kolkaści samalotaŭ u fłocie, — adkazali ŭ «Biełavija».
Kamientary