Što zrabiŭ dla Biełarusi Pavieł Biełavus, jaki nie vyjšaŭ na volu paśla 15 sutak aryštu

15 listapada zatrymali hramadzkaha aktyvista, stvaralnika kramy Symbal.by Paŭła Biełavusa. Jaho vyklikali na razmovu ŭ milicyju ab 11 hadzinie, dadomu jon nie viarnuŭsia. Paźniej stała viadoma, što jon u izalatary na Akreścina.

Jašče praź niejki čas źjaviłasia papiaredniaja infarmacyja, što Paŭła mahli zatrymać, bo jon dasłaŭ kamuści poštaj knihu «Biełaruskaja nacyjanalnaja ideja», jakuju biełaruskija ŭłady pryznali ekstremisckaj.

Pavał Biełavus — adzin z zasnavalnikaŭ i pieršy dyrektar kulturnickaj placoŭki «Art Siadziba», stvaralnik kramy Symbal.by, kiraŭnik kampanii «Hodna», art-menedžar, žurnalist.

18 listapada prajšoŭ pieršy sud nad Paŭłam, jaho abvinavacili pavodle 2 artykułaŭ KaAP: 19.11 (raspaŭsiudžvańnie infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść) i 19.12 (niezakonny vyrab i/abo raspaŭsiudžvańnie metodyk abo inšych materyjałaŭ ab sposabach vyrabu vybuchovych pryładaŭ i vybuchovych rečyvaŭ). Sudździa adpraviŭ spravu na dapracoŭku.

19 listapada sudździa Leninskaha rajonu Julija Šut asudziła Paŭła Biełavusa na 15 sutak užo pa inšym artykule — za «niesankcyjanavanuju akcyju» (č. 1 art. 24.23 KaAP).

Skončyŭ hieafak, ale chacieŭ być žurnalistam

Pavał naradziŭsia ŭ Lidzie, vučyŭsia na hieahrafičnym fakultecie ŭ Bieraściejskim dziaržaŭnym universytecie.

«Choć i vučyŭsia na hieafaku, chacieŭ stać žurnalistam. Ja pastupaŭ tudy, bo dobra viedaŭ biełaruskuju movu, matematyku, i mnie patrebny byŭ treci pradmiet. I ja taki: «O, hieahrafija! Pajedu pastupać na hieafak». Ale z druhoha kursu ja pačaŭ pisać, bolš pracavaŭ u žurnalisckaj sfery. Dziakujučy hieafaku, što ja vučyŭsia ŭ Bieraści, ja paznajomiŭsia ź «Dziedzičam», jaki zaciahnuŭ mianie ŭ aktyvizm», — raskazvaŭ pra siabie Pavał.

Razam ź siabrami zasnavaŭ «Art Siadzibu»

24 śniežnia 2011 hodu Pavał Biełavus razam ź siabrami stvaryli infarmacyjna-aśvietnickuju arhanizacyju «Art Siadziba». Praz kancerty, lekcyi i zabaŭlalnyja imprezy, jakija rabiła «Art Siadziba» da biełaruščyny masava dałučałasia moładź pa ŭsioj krainie.

«Pašu ja viedaju z 2009-ha. Tady jon zapomniŭsia mnie svaim tvorčym i niestandartnym padychodam. My razam raspačynali «Art Siadzibu», rabili imprezy, pierajaždžali z roznych pamiaškańniaŭ, razam rabili Symbal.by. Paša dla mianie — heta sapraŭdny biełarus, jaki imkniecca zrabić usio, kab Biełaruś i biełaruščyna byli papularnymi i pryvabnymi. I robić usio heta ščyra! Paša — najlepšy siabra, da jakoha možna źviarnucca pa dapamohu, paradu, budź heta vokładka, kancepcyja novaha albomu ci niejkaja biznes-ideja. Ja zaŭždy ŭpeŭnieny, što Paša nie padviadzie», — kaža Źmicier Afanasienka, lider hurtu Amaroka.

Zrabiŭ vyšyvanki iznoŭ modnymi, papularyzuje biełaruskuju kulturu

Paźniej Pavał stvaryŭ kramu Symbal.by, jakaja papularyzavała rečy i źjavy, pryśviečanyja biełaruskaj movie, kultury i historyi. Viasnoj i letam 2020-ha krama adšyvała vialikija partyi achoŭnych masak i pieradavała ich medykam pa ŭsioj krainie. Praź cisk uładaŭ na pačatku sakavika 2021-ha kramu začynili.

U 2020 hodzie Pavał stvaryŭ hramadzkuju kampaniju «Hodna», jakaja prasoŭvaje sučasnuju nacyjanalnuju ideju Biełarusi. U joj kamandy maładych ludziej stvarali kulturnyja i histaryčnyja prajekty.

«Dla mianie Paša — nia prosta kaleha i siabra, jon jak starejšy brat, u jakoha zaŭsiody možna čamuści navučycca. Jon maryć ab tym, kab Biełaruś była biełaruskaj. Paša vielmi šmat robić dla Biełarusi, dla taho, kab kožny adčuŭ hodnaść i honar za svaju krainu, svaju movu i kulturu, hanaryŭsia, što jon biełarus. U jaho heta atrymlivajecca, bo ŭ jaho zaŭsiody šmat idej, harać vočy, jon natchniaje tym, nakolki jon lubić svaju pracu, svaju misiju», — kaža menedžarka kampanii «Hodna», siabroŭka Paŭła Alina Hieraščanka.

Voś što pra Paŭła i jaho dziejnaść kaža jašče adzin siabra i kaleha, aktor Biełaruskaha Svabodnaha teatru Alaksiej Saprykin.

«Paša ŭ najvyšejšaj stupieni spraviadlivy čałaviek. Jość taki znakamity vyraz: «Nu vy ž usio sami razumiejecie». I voś Paša na jaho zaŭždy adkazvaŭ: «Nie, nie razumieju, čamu ja pavinien heta razumieć?». I jon ščyra choča palepšyć našuju krainu, šmat zrabić dla biełaruskaj movy, kultury, tradycyjaŭ i historyi. Paša vielmi pałymiany čałaviek, jon vielmi mocna haryć luboj spravaj, jakuju jon pačynaje rabić. Dla jaho praca na nivie biełaruščyny stała takim paklikańniem, stała sensam žyćcia, tamu što jon zaŭsiody niešta novaje prydumlaje, padchoplivaje, staić u avanhardzie roznych idejaŭ. Jon adzin z samych pałymianych ludziej, jakich ja sustrakaŭ».

U Paŭła jość žonka Kaciaryna i dvoje małych dzietak: Safija i Miron.

«Paša vielmi lubić svaju siamju, svaich dzietak. U jaho navat jość tatuiroŭki ź ich imionami: na adnoj ruce imia dačuški, a na druhoj — imia synka», — dadaje siabroŭka Alina.

«Ja viedaju Pašu jak čałavieka, jaki ščyra lubić Biełaruś», - dadaje jašče adzin siabra Paŭła.

• 1
• 0
• 0
• 0
• 0
• 3
• 0
• 0