Čystki da refierendumu? Čamu pa ŭsioj krainie ŭ žurnalistaŭ, vałancioraŭ i naziralnikaŭ za vybarami prachodziać vobšuki
U «Našu Nivu» z usioj krainy prychodziać sihnały ab tym, što pa ranicach da biełarusaŭ u chaty ŭryvajucca siłaviki pry padtrymcy ŭzbrojenaha SACHR. Pieravaročvajuć rečy, załaziać u techniku, ale hety vobšuk ničym nie zakančvajecca i nie afarmlajecca naležnym čynam. Pa vyniku čałavieku dajuć raśpisacca ŭ papiercy, što jon nie budzie zajmacca «ekstremizmam» abo supracoŭničać z peŭnymi arhanizacyjami.
Tak, viadoma pra takija vypadki siarod byłych siabroŭ inicyjatyŭnych hrup kandydataŭ u prezidenty, siarod naziralnikaŭ na vybarach 2020, siarod vałancioraŭ «Viasny», jakich prymušali padpisać papiery, što bolš z hetaj arhanizacyjaj jany supracoŭničać nie buduć. Što adbyvajecca?
«Mietadałohija ŭziataja z teoryi baraćby z arhanizavanaj złačynnaściu»
«Da mianie dalataje, što pastaŭlena zadača pravieści vobšuki ŭ tych, chto byŭ naziralnikam, členaŭ inicyjatyŭnaj hrupy i hetak dalej, papałochać, kab padumali, ci varta aktyŭničać napiaredadni i padčas refierendumu, — tłumačyć nam były supracoŭnik orhanaŭ. — Nazyvajecca «adpracoŭka»: prychodziać, pieravaročvajuć, kali ničoha nie znachodziać, to dajuć padpisać papierku».
«Pa adnym možna zapałochvać i nie kidajučy ŭ turmu. Tady maštab represij jak by trochu prychavany, heta nahadvaje tyja samyja «čornyja varanki». Meta — zapałochvańnie. Mietadałohija ŭziataja z teoryi baraćby z arhanizavanaj złačynnaściu», — dadaje inšy supracoŭnik orhanaŭ.
Pa słovach našych surazmoŭcaŭ, da padziej 2020-ha HUBAZiK hetak ža «bambiŭ» błatnych — z efiektnym zatrymańniem, ale biez pravavych nastupstvaŭ. Prosta kab lišni raz papałochać i adspravazdačycca. A kali heta była schodka, to jašče i kab pierasvaryć miž saboj, maŭlaŭ, niechta zdaje.
«Chacia ŭ realnaści čaściej za ŭsio ludzi prosta byli na hukavym kantroli, — kažuć našy surazmoŭcy. — Kryminalitet nie źviartaŭsia da advakataŭ ab niepravamiernaści takich dziejańniaŭ. Bo prakuratura ŭsio adno b nie znajšła nijakich parušeńniaŭ, a pierad vačyma stajaŭ dośvied aŭtaryteta Juryja Pałškova, u jakoha «znajšli» bojeprypasy».
«Kiraŭnictva orhanaŭ bačyć va ŭsim hramadstvie kryminalnuju strukturu»
Miž tym, jak adznačajuć byłyja siłaviki, kryminał ličyŭ za lepšaje hulać u hetyja pastanoŭki, paźbiahajučy realnych terminaŭ.
«Siła arhanizavanaj złačynnaści mienavita ŭ ijerarchii. Błatnych ža pavažajuć ci bajacca nie za nabityja na kaleniach zorački, a za ŭmieńnie stvaryć ijerarchiju, sfarmiravać «abščak», delehavać vykanańnie zadač i znajści ludziej, hatovych ich vykonvać, — tłumačyć niadaŭni vysokapastaŭleny supracoŭnik MUS. — Zadača pravaachoŭnych orhanaŭ — inkarparavacca ŭnutr abo nie dać sfarmiravacca takoj struktury.
Hledziačy na publičnuju rytoryku i kryminalizacyju ŭsiaho, što adbyvajecca ŭ krainie, luboj dziejnaści — ad žurnalistyki i advakatury da suški bializny na bałkonie, — vyhladaje łahičnym, što kiraŭnictva orhanaŭ bačyć va ŭsim hramadstvie kryminalnuju strukturu. I baicca taho, što takaja kolkaść ludziej narešcie zmoža strukturavacca i arhanizavacca ijerarchična. A tamu dziejničaje adpracavanymi mietadami, i struktury dziejničajuć tyja ž samyja — HUBAZiK i SACHR».
Čamu mienavita SACHR? Pa słovach našych surazmoŭcaŭ, jany pracujuć bolš jakasna, čym AMAP.
«Kab zajści na vobšuk, pracedura ž zvyčajna takaja: dla vykliku śpiecpadraździaleńnia apieratyŭnik pavinien źviarnucca da kiraŭnika hetaha padraździaleńnia ci da dziažurnaj słužby, padrychtavaŭšy dakumienty, — praciahvajuć našy surazmoŭcy. — Choć na zapyt hrupy i pavinny rychtavacca adpaviednyja dakumienty, na praktycy ŭsio robicca pa zvanku i tolki paśla zakryvajecca dakumientami.
Taki paradak praściej za ŭsio realizavać mienavita z SACHR, tam dzie načalstva časam zapluščvaje vočy na farmalnaści, a supracoŭniki pracujuć «jakasna». AMAP ža nikoli nie lubili pryciahvać praź nizki ŭzrovień padrychtoŭki».
«Bolšaść prosta vykonvaje rabotu ŭ siłu taho, što nie maje dobraj adukacyi i šmat dumać nie navučana»
Kaniečnie, u takoj situacyi ŭźnikaje pytańnie, a jak bajcy SACHR sami žyvuć z tym, što im davodzicca rabić?
«Bolšaść prosta vykonvaje rabotu ŭ siłu taho, što nie maje dobraj adukacyi i šmat dumać nie navučana. Heta ich rabota, abstaviny i detali ich nie cikaviać, — ličyć były siłavik. —
Ale častka tak ci inačaj razumieje, čym zajmajecca, adnak zarobak i kvatera, razam z adsutnaściu inšych pierśpiektyŭ, zvužajuć prastoru dla manieŭru i nie dazvalajuć vykazvacca ci bastavać adkryta.
Viadoma, u kuryłkach i doma za stałom jany aburajucca i padkołvajuć sami siabie za svaju «važnuju rabotu», uspaminajučy, jak kłali tvaram u padłohu prahramistaŭ, daktaroŭ i mieniedžaraŭ.
Aficery, jakija skančvali ŭniviersitet i pieryjadyčna sustrakajucca hrupami vypusknikoŭ, čujuć šmat zajmalnych pytańniaŭ adnosna svajoj raboty ad tych, chto znajšoŭ rašučaść i sumleńnie zvolnicca z orhanaŭ. Takija vypadki mnie viadomyja».
«Admyvaŭ haŭno z unitazaŭ, my tam jak samyja končanyja». Błohier Vadzim Vadimati Jermašuk — pra toje, jak žyŭ u kałonii ŭ «nizkim statusie»36
Kamientary