U Rečycy ŭ navahodniuju noč pamior zatrymany milicyjantami mužčyna. Svajaki: Jaho da śmierci źbili ŭ RAUSie
28-hadovy žychar Rečycy Źmicier Uschopaŭ pamior u pryjomnym pakoi rajonnaj balnicy.
Svajaki pamierłaha raskazvajuć, što ŭ noč z 31 śniežnia na 1 studzienia jaho zatrymaŭ milicejski patrul. Pry zatrymańni mužčyna supraciŭlaŭsia.
Jak paviedamlajuć pravaabaroncy-viasnoŭcy, praź niejki čas milicyjanty pryvieźli jaho ŭ pryjomny pakoj balnicy ŭ stanie kliničnaj śmierci. Kali jaho pabačyli rodzičy, adzieńnie na im było razarvanaje, jon byŭ uvieś až da nižniaj bializny ablity vadoj. Na levaj skroni kruhłaja rana. Zapiaści na rukach, dzie nadziavajuć kajdanki, byli sinija.
Svajaki Dźmitryja ličać, što chłopca źbivali ŭ milicyi i ablivali vadoj.
«Naša Niva» pahavaryła z maci Uschopava, Alenaj Michajłaŭnaj. Voś što jana raskazała.
— Heta praŭda pra vašaha syna, što jaho nie stała?
— Heta možna pisać. Jany jaho zabili — milicyja zabiła. Ja ŭdava afhanca, usio pišycie!.. A syna ja ad milicyjaniera naradziła… Zakatavali syna jak Isusa Chrysta, tolki jamu 28 hod… Chaj niasuć mianie razam z synam i kładuć u ziamlu pobač.
— Jak jon trapiŭ u milicyju? Čamu jon tam byŭ?
— Jon jechaŭ da mianie Novy Hod adznačać, stajaŭ na prypynku ź siabram: «Ja zaraz padjedu», — zvonić. Jany tam pili šampanskaje i zakusvali mandarynam. A tut usio, jechali: raśpićcio. Ruki załamali. A jon kaža — ja da mamy jedu, vypuścicie, nie zatrymlivajcie… A potym jany tam jaho jaho… na skroni rana, śpina siniaja, ruki sinija. Majka na kavałki razarvanaja, jak vuhal jaho cieła. Ja bolš nie mahu havaryć…
Baćka, Alaksandr Leanidavič, skazaŭ «Našaj Nivie:
— U milicyi nam skazali «pamior», a kali pryjšli zabirać u morh, skazali «a, heta toj, jakoha zabili?».
Čytajcie taksama: Źjaviłasia videa, jak Uschopaŭ sam zachodzić u RAUS. Praź dźvie hadziny jon budzie miortvy
Paźniej źjaviŭsia aficyjny kamientar ad Śledčaha kamiteta.
«31 śniežnia ŭ 23.10 supracoŭniki milicyi zatrymali na prypynku hramadskaha transpartu na vuł. Savieckaj mužčynu z prykmietami mocnaha ałkaholnaha apjanieńnia. Praz akazanaje im niepadparadkavańnie da jaho była ŭžytaja fizičnaja siła, — raspaviali ŭ SK. — Mužčynu dastavili ŭ Rečycki RAUS, a zatym ŭ ramkach administracyjnaha pracesu pavieźli na miedycynski ahlad u rajonnuju balnicu. Pry padjeździe da miedustanovy mužčynu stała błaha. Maładoha čałavieka terminova dastavili ŭ pryjomny pakoj, dzie pačali pravodzić reanimacyjnyja mierapryjemstvy. Niahledziačy na namahańni lekaraŭ, u 1.20 kanstatavanaja jaho śmierć».
«Pavodle papiarednich vysnoŭ ekśpiertaŭ, śmierć nie nosić traŭmatyčnaha charaktaru — na ciele pamierłaha nie vyjaŭlenyja paškodžańni ŭnutranych orhanaŭ, pierałomaŭ kostak. Čakajecca zaklučeńnie ekśpiertnaha daśledavańnia na najaŭnaść u kryvi ałkaholu, narkatyčnych i inšych rečyvaŭ», — dadali ŭ viedamstvie.
U Źmitra Uschopava zastałasia 5-hadovaja dačka.
«Jana zabrała dziaciej i viarnułasia ŭ Minsk»: historyja biełarusa, jaki emihravaŭ u Barsiełonu ź siamjoj, a zastaŭsia adzin18
Kamientary