Mužčyna zrabiŭ sełfi ź ciažarnaj žonkaj na krai skały. A potym skinuŭ jaje ŭniz
U červieni 2018 hoda 40-hadovy Chakan Ajsał i jaho 32-hadovaja žonka Semła pryjechali na adpačynak u turecki rehijon Fietchije. Jany naviedvali plaž pad nazvaj Dalina matyloŭ, kali Semła, što była tady na siomym miesiacy ciažarnaści, sarvałasia sa skały i zahinuła. Palicyja abvinavaciła jaje muža ŭ tym, što toj skinuŭ žančynu z abryvu, i ciapier jon pryznany vinavatym, piša The Mirror.
Chakana pačali padazravać, kali zdymki sužoncaŭ na skale źjavilisia ŭ navinach. Tady adzin z turystaŭ, jaki taksama ŭ toj čas byŭ u dalinie, uspomniŭ hety dzień — i, jak jon kaža, Chakan Ajsał pavodziŭ siabie tady nadta dziŭna. Jany z žonkaj padychodzili bližej da abryvu i zusim nie razmaŭlali pamiž saboj.
Inšy śviedka śćviardžaje, što, kali Semła sarvałasia sa skały, jaje muž vyhladaŭ nadta spakojnym. Raskazvajuć, nibyta Chakan padšturchoŭvaŭ žonku da taho, kab padyści jak maha bližej da abryvu.
Abvinavačvańnie paličyła, što mužčyna pačaŭ płanavać zabojstva žonki z taho, što zastrachavaŭ jaje žyćcio ad niaščasnych vypadkaŭ na sumu 400 tysiač tureckich lir (amal 30 tysiač dalaraŭ), pry hetym vypłaty pa strachoŭcy moh atrymać tolki jon sam.
Chutka paśla śmierci žonki Chakan zapatrabavaŭ vypłat pa strachoŭcy, ale, kali pačałosia rasśledavańnie, jamu admovili ŭ hetych hrašach.
I heta jašče nie ŭsie sakrety mužčyny: jon prymusiŭ svaju žonku aformić siem kredytaŭ dla jaho.
Pa sacsietkach Chakana bačna, što mužčyna lubić tracić hrošy. Jon padarožničaŭ pa ŭsioj Turcyi, byvaŭ i za miažoj, dzie spyniaŭsia ŭ najlepšych hatelach. Chakan cikaviŭsia ekstremalnymi vidami sportu — skačkami z parašutam, raftynham, bandžy-džampinham.
Mužčyna nie pryznaŭ vinu ŭ zabojstvie žonki.
15 lutaha turecki sud asudziŭ jaho da pažyćciovaha źniavoleńnia. Šans na daterminovaje vyzvaleńnie Ajsał atrymaje tolki praz 30 hadoŭ.
U ZŠA złačyniec 17 hadzin trymaŭ 80-hadovuju žančynu ŭ padvale. Jaje źniknieńnie zaŭvažyli, kali jana nie padzialiłasia vynikam u Wordle
Ćvil i hnil. Damy, što Bred Pit pabudavaŭ dla biednych, razvalvajucca na vačach
Na Šry-Łancy ŭ 37 hadoŭ pamior biełaruski kinapradziusar Andrej Matałyha4
Kamientary