Prahramistka daniesła ŭ 2020-m na susiedziaŭ za BČB-ściah, a ciapier sama ŭciakła ŭ Litvu. Dyjaspara choča dabicca jaje departacyi ź ES
Zajmalnaja situacyja razhortvajecca ŭ Vilni, dzie miascovaja biełaruskaja dyjaspara źviarnuła ŭvahu na toje, što ŭ hetym horadzie abjaviłasia ajcišnica ź Minska, ź jakoj na radzimie pierastali havaryć susiedzi, bo jana danosiła ŭ milicyju ab vyviešvańni ŭ ŽK «Kaskad» nacyjanalnych ściahoŭ. Dyjaspara aburanaja i choča dabicca departacyi.
Žančynu zvać Viera Lavonik-Šylajeva. Pra toje, što jana danosiła na susiedziaŭ, stała viadoma paśla ŭzłomu milicejskich baz. U listapadzie 2020-ha jana paviedamiła, što «5 čałaviek viešajuć BČB-ściah pamiž damami».
Heta akurat toj vializny ściah, jaki staŭ simvałam Kaskada i byŭ bačny zdalok.
I voś litaralna paru dzion tamu jaje muž u farbach apisaŭ, što jany z žonkaj pierabralisia u Litvu — «čas chutkich rašeńniaŭ».
Juryj Šylajeŭ taksama ajcišnik. Imavierna, siamiejnaja para akazałasia ŭ Litvie ŭ suviazi z masavym vyjezdam IT-biznesaŭ ź Biełarusi.
Viera Lavonik-Šylajeva adrazu pačała šukać pracu ŭ Litvie.
Paśla taho, jak hety fakt vykryŭsia, mihranty z Kaskada, jakija paznali Lavonik-Šylajevu, padniali pytańnie ŭ čacie ŭsioj dyjaspary.
Ciapier rychtujucca zvaroty da litoŭskich i haradskich uładaŭ ab tym, što hety čałaviek datyčny da masavych represij u Biełarusi i nie moža žyć u ES.
Niekatoryja prapanujuć pakinuć Vieru ŭ spakoi, ale pacyfisckaja pazicyja nie padtrymlivajecca bolšaściu, siarod jakoj daminuje arhumient, čto kali čałaviek śviadoma vyrakaŭ susiedziaŭ na katavańni ŭ izalatarach, to jon pavinien nieści adkaznaść, choć by i ŭ vyhladzie zabarony na žyćcio ŭ Litvie — krainie, kudy ŭciakali tyja, na kaho danosili ludzi, kštałtu Šylajevaj.
U sacyjalnych sietkach Lavonik-Šylajevaj pad dopisam ab pošuku pracy taksama šmat krytyki. Jana pryznaje svoj zvanok u 102.
«Ja heta zrabiła, tak. Što ciapier? […] Heta byŭ hramadzianski kanflikt, interpretavany jak palityčny. […] Vy mianie nie słuchajecie. Ja nie paviedamlała pra palityku, ja była vymušanaja paviedamić pra hramadski paradak, a nie pra palityku», — apraŭdvajecca jana.
Reakcyi litoŭskich dziaržaŭnych orhanaŭ na situacyju pakul što nie było.
Čytajcie taksama:
Byłaja žurnalistka «SB», jakuju padazrajuć u źlivie infarmacyi z BYSOL, atrymała stypiendyju dla represavanych u Hiermanii
«Možna ŭziać aŭtamat i pierasiekčy miažu?» Pavuk spytaŭ u pamiežnikaŭ, ci zakonna rasijskija vojski ŭ 2022 hodzie pierajšli biełaruska-ŭkrainskuju miažu66
Kamientary