Na spadarožnikavych zdymkach vakolic Maryupala, jak miarkujecca, vyjavili ŭžo treciaje masavaje pachavańnie. Na zdymki źviarnuli ŭvahu žurnalisty «Schiemaŭ», prajekta ŭkrainskaj słužby Radyjo Svaboda.
Miesca novaha masavaha pachavańnia — pasiołak Stary Krym. Jaho z 10 sakavika kantralujuć rasijskija vojski. Adlehłaść da Maryupala — kala 5 kiłamietraŭ.
Pieršyja tranšei daŭžynioj 60—70 mietraŭ źjavilisia na Starakrymskich mohiłkach 24 sakavika.
Na spadarožnikavym zdymku ad 7 krasavika miesca pachavańnia pavialičyłasia, a častka tranšej užo była zakapanaja.
Na zdymku 24 krasavika źjavilisia novyja tranšei, a ahulnaja praciahłaść pachavańnia stała bolš za 200 mietraŭ.
U kamientary «Schiemam» mer Maryupala Vadzim Bojčanka raskazaŭ, što ŭładam viadoma pra toje, što rasijskija vajskoŭcy vyvoziać cieły zahinułych žycharoŭ Maryupala na terytoryju Starakrymskich mohiłak, dzie chavajuć ich u miescach masavaha pachavańnia.
«Nam viadoma pra hetyja brackija mahiły, tamu što hetyja fašysty — i ŭ mianie niama inšych słoŭ — pryciahvajuć da spravy pachavańnia miascovaje nasielnictva, za ježu. Jany nam i paviedamili, što treba «pracahadzin» napracavać, kab tabie dali ježu, vadu… Ciapier u Maryupali niedastatkova humanitarki, jakuju jany zavoziać, tamu ludzi vymušanyja heta rabić», — raskazaŭ Vadzim Bojčanka.
Raniej masavyja pachavańni maryupalcaŭ pabačyli kala akupavanaj vioski Vinahradnaje i pasiołka Manhuš (daŭžynia 300 metraŭ).
Kali Kanapackaja stała całkam padkantrolnaja Łukašenku?22
Kamientary