21 listapada 2021 hoda ŭ Nacyjanalnym teatry imia Jakuba Kołasa (Viciebsk) adbyłasia premjera śpiektakla «Cil». Ale adrazu paśla premjery śpiektakl byŭ zabaronieny, zatym byli zvalnieńni ŭ kalektyvie. Ciapier pasady pazbaviŭsia i režysior hetaj pastanoŭki Michaił Krasnabajeŭ — jamu nie praciahnuli kantrakt. Pra heta Zerkalo.io paviedamili čytačy i na ŭmovach ananimnaści paćvierdzili supracoŭniki teatra.
Michaił Krasnabajeŭ pracavaŭ u viciebskim teatry praktyčna ŭsio žyćcio. Jon naradziŭsia ŭ 1960-m u Ščučynskim rajonie, vučyŭsia ŭ Minskim instytucie kultury (ciapier BDUKM) i Teatralna-mastackim instytucie (ciapier BDAM). Paśla zakančeńnia apošniaha Krasnabajeŭ u 1985-m pryjšoŭ u Kołasaŭski teatr i da 2004 hoda byŭ jaho akcioram. Zatym pierajšoŭ na pasadu režysiora, z 2017 hoda pracavaŭ mastackim kiraŭnikom kalektyvu.
Siarod jaho pastanovak — «Chrystos pryziamliŭsia ŭ Harodni» i «Leanidy nie viernucca da Ziamli» pavodle ramanaŭ Uładzimira Karatkieviča.
U minułym hodzie Michaił Krasnabajeŭ padrychtavaŭ da 95-hodździa teatra śpiektakl «Cil», pastaŭleny pa pjesie rasijskaha dramaturha Ryhora Horyna. Toj napisaŭ jaje na asnovie znakamitaha ramana bielhijskaha piśmieńnika Šarla de Kastera «Cil Ulenšpihiel» ab baraćbie fłamandcaŭ suprać ispanskaha panavańnia ŭ XVI stahodździ, jakaja zaviaršyłasia vyzvaleńniem sučasnych Niderłandaŭ.
Na premjernym pakazie prysutničała kiraŭnictva Viciebskaj vobłaści, a taksama pradstaŭniki Ministerstva kultury: ministr Anatol Markievič i načalnik Hałoŭnaha ŭpraŭleńnia dziaržaŭnych śpiecyjalnych kulturnych mierapryjemstvaŭ i prafiesijnaha mastactva Iryna Dryha. Paśla zakančeńnia pakazu čynoŭniki ŭručyli akcioram i supracoŭnikam teatra ŭznaharody, pramovili chvalebnyja pramovy ŭ honar jubileju kalektyvu. Ale sam śpiektakl im nie spadabaŭsia. Jak raspaviali na ŭmovach ananimnaści supracoŭniki ŭstanovy, asablivaje razdražnieńnie ŭ haściej vyklikali vykarystańnie na scenie čyrvonych stužak i vykryki sa sceny «Žyvie Fłandryja!» (Viciebski teatr pracuje na biełaruskaj movie).
Adznačym, što ŭ aryhinalnaj pjesie Horyna prysutničała takaja fraza.
Čto za sładostnyj kraj, hdie vsieho čieriez kraj,
Hdie połno i žratvy, i piťja!
Tak čto, čiert pobieri, znaj živi, piej da žri,
I da zdravstvujet Fłandrija!
«Da zdravstvujet» na biełaruskaj movie hučyć jak «Žyvie». Ale ŭ vyniku śpiektakl źniali z repiertuaru.
Z 1 śniežnia 2021 hoda byŭ razarvany kantrakt z dyrektaram teatra Alaksandram Starych.
Taksama sa studzienia 2022 hoda z teatra byli zvolnienyja akciory Julija Krašeŭskaja i Arciom Hierak. Apošni hraŭ adnu ź viadučych rolaŭ u apalnym śpiektakli (jon vykanaŭ rolu karala Filipa). Krašeŭskaja syhrała ŭ pastanoŭcy rolu druhoha płana. Tamu «Cil», vierahodna, staŭ tolki padstavaj dla ich zvalnieńnia.
Kamientary