«Ja ščaśliŭčyk!» Jak 40-hadovy baćka troch dziaciej Kalcoŭ syšoŭ ź siamji dziela 23-hadovaj Aryny Sabalenka
Roźnica miž zakachanymi składaje 17 hadoŭ, svoj raman tenisistka i chakieist doŭha chavali ad čužych vačej.
Aryna Sabalenka dy Kanstancin Kalcoŭ. Fota: instagram.com/sabalenka_aryna
Chto jana?
Aryna Sabalenka — lidar ajčynnaha tenisa apošnich hadoŭ. Uśled za Natašaj Źvieravaj dy Viktoryjaj Azarankaj jana pieramahała na prestyžnych turnirach WTA i ciaham siami siezonaŭ prafiesijnaj karjery prasoŭvałasia da viaršyń suśvietnaha rejtynhu.
Adnak hałoŭnyja piki minčanka pakul tak i nie skaryła. U adzinočnym razradzie na turnirach «Vialikaha Šlema» jana spyniałasia na paŭfinałach maksimum. U płanietarnym «tabieli ab ranhach» uzdymałasia na druhi radok, chacia realnyja mažlivaści stać najlepšaj na śviecie byli.
Za karjeru Sabalenka zarabiła amal 7 miljonaŭ dalaraŭ tolki pośpiechami na korcie. Vialikija hrošy davali i rekłamnyja kantrakty. Tamu Arynu možna nazvać i paśpiachovym kamiercyjnym prajektam.
Sabalenka atrymlivaje piersanalnyja vinšavańni ad Łukašenki z kožnaj pieramohaj. Jana ŭdzielničała ŭ navahodnim zvarocie palityka.
Chto jon?
Najlepšyja karjernyja hady Kanstancina Kalcova prypali na pieryjad, kali Aryna była jašče maleńkaj dziaŭčynkaj.
Napačatku stahodździa forvard-vunderkind paśla šerahu hodnych siezonaŭ u Rasii pierajechaŭ za akijan. Kłub NCHŁ «Pitsburh Pinhvinz» abraŭ na drafcie chakieista jašče 17-hadovym (pad vysokim 18-m numaram), ale vyrašyŭ pačakać kolki siezonaŭ staleńnia biełarusa.
Paŭza apraŭdałasia: paśla skamiečanaha debiutnaha pieršynstva Kalcoŭ pravioŭ usie 82 hulni «rehularki» druhoha siezona.
Paśla, praŭda, amierykanski praryŭ spyniŭ łakdaŭn, jaki Kanstancin prabaviŭ u Rasii. A zatym forvard uvohule vyrašyŭ iści pa šlachu najmienšaha supracivu — dy źmianiŭ NCHŁ na KCHŁ da kanca prafiesijnaj dziejnaści. Za dziesiać nastupnych hod jon pieramahaŭ u Kubku Haharyna, dvojčy ŭdzielničaŭ u Alimpijadzie ŭ składzie nacyjanalnaj zbornaj dy rehularna vystupaŭ na pieršynstvach śvietu.
Paśla zakančeńnia karjery Kanstancin zastaŭsia ŭ chakiei, kab pracavać trenieram. Jak hałoŭny ŭ «Breście» dy maładziečanskim «Dynama» siabie asabliva nie prajaviŭ. A voś jak asistent karystaŭsia popytam: za jaho plačyma praca ŭ KCHŁ na mastkach minskaha «Dynama», maskoŭskaha «Spartaka» i «Sałavata Jułajeva» — kantrakt z ufimcami biełarus padpisaŭ na minułym tydni.
Kalcoŭ abaraniaŭ kolery prezidentskaj kamandy na lodzie padčas kaladnaha chakiejnaha turniru. I rehularna vystupaŭ u miedyja, kali ŭ Biełarusi adniali prava prymać čempijanat śvietu pa chakiei: abvinavačvaŭ u palityzavanaści IIHF dy narakaŭ na ŭcisk svabod dy pravoŭ biełaruskich zaŭziataraŭ z boku Zachadu.
Što było da adnosin?
Ramantyčnyja pryhody Sabalenka publika stała adsočvać u 2018-m, kali Instahram 20-hadovaj spartsmienki poŭniŭsia sumiesnymi zdymkami z chakieistam Maćviejem Bažko.
Paśla padarunkaŭ dy kvietak, jakija spartoviec dasyłaŭ dziaŭčynie, byŭ zaručalny piarścionak. I paśla źjaŭleńnia Aryny ź im na ruce u adnoj sa spartovych prahram navat pajšli čutki pra chutki šlub tenisistki. Adnak u 2020-m źnikła i ŭpryhožańnie, i sam zalotnik: Sabalenka pryznałasia, što admoviłasia ad prapanovy, bo nie bačyła siabie pobač z Bažko.
«Darma raspačała hetyja adnosiny. U mianie była depresija nievialičkaja. I tut były źjaviŭsia. I ja: «Nu dooobra»… Nie vielmi pryhoža było z majho boku. Atrymałasia tak, što ja vykarystoŭvała čałavieka, chacia i dobra da jaho staŭlusia. Adnak šmat pytańniaŭ, šmat niuansaŭ», — tłumačyła spartsmienka paśla.
Kalcoŭ, naadvarot, žyŭ ščaślivym šlubam z 2006 hoda. Svaju naračonuju jon sustreŭ jašče ŭ Štatach za dva hady da taho, jak uzakoniŭ adnosiny: Julija pracavała ŭ restaranie, kudy chakieist adnojčy zavitaŭ na viačeru. Paśla siamja rasšyryłasia: Alaksandr, Daniła i Stefan zrabili Kanstancina ščaślivym baćkam. Samy małodšy syn naradziŭsia ŭ spartsmiena ŭ 2019-m.
Jak jany syšlisia?
Dzie kankretna miž Arynaj dy Kanstancinam praskočyła iskra, składana skazać.
Adnak ŭ 2020 hodzie spartsmieny paasobku źjaŭlalisia na roznych mierapryjemstvach — i, adpaviedna, mahli kamunikavać. Uzajemnaja cikavaść «padahravałasia» i tym, što Kalcoŭ sutyknuŭsia z šeraham siamiejnych prablem dy nie vytrymaŭ ich ciažaru. Prynamsi, pra heta raspaviadała jaho žonka, jakaja i paviedamiła pra razryŭ.
«Naš šlub nie vytrymaŭ hoda biez pracy Kanstancina, karanavirusa i naradžeńnia dziciaci», — napisała ŭ sacsietkach Julija. A paśla, tehnuŭšy Sabalenku, u tym ža paviedamleńni abvinavaciła «dziaŭčat, što visnuć na šyi čužych mužčyn ź niemaŭlatami ŭ siemjach» u nieprystojnych pavodzinach.
Napačatku para pra adnosiny nie havaryła. Aryna kazała, što ŭ asabistym žyćci adčuvaje siabie pierakaci-polem. Kanstancin ža admaŭlaŭ usialakaje dačynieńnie tenisistki da siamiejnaj dramy — i prasiŭ hramadstva nie čapać dziaŭčynu dy nie varušyć svajho pryvatnaha žyćcia.
Adnak ciaham 2020-ha Sabalenku ŭsio čaściej stali zaŭvažać na matčach chakiejnaha «Dynama» — kłuba, dzie Kalcoŭ pracavaŭ asistentam. U imiannym džersi z VIP-łožy dziaŭčyna raz-poraz nazirała za dziejańniami «bieła-błakitnych». Paśla źjaviłasia fota z aeraporta, dzie vielmi padobny da Kalcova čałaviek vypraŭlaŭ Arynu ŭ padarožža.
Zusim ža vidavočnym tajnaje stała ŭ 2021 hodzie, kali para pierastała maskiravać adnosiny.
Kalcoŭ pačaŭ vinšavać dziaŭčynu ŭ sacsietkach sa śviatami dy pryznavacca ŭ kachańni. Aryna ž adkazvała mesedžami dy smajłami ŭzajemnaści, a taksama asadžvała kamientataraŭ, jakija dzivilisia roźnicy va ŭzroście dy zadavali niepryjemnyja pytańni.
Kali ž śviet pabačyŭ sumiesnyja foty z abdymkami-pacałunkami pary, a sami spartoŭcy razam pačali źjaŭlacca na hłamurnych mierapryjemstvach, apošnija pytańni adpali sami saboj.
«Jaje niemahčyma nie kachać!»
Ciapier u sacsietkach tenisistka i chakieist šmat pościać pra svaje adnosiny.
Sabalenka vinšavała kachanaha z narodzinami, dzialiłasia sumiesnymi fota z vandrovak pa Jeŭropie, demanstravała dapamohu Kanstancina ŭ trenirovačnym pracesie. Dopisy «chaj tak budzie zaŭsiody» pad sumiesnymi pacałunkami, padajecca, paćviardžajuć, što Arynu z hałavoj nakryła pačućciami.
«Dobra, kali jość niechta, zdolny zrazumieć majo varjactva. Zatoje sa mnoj nie zasumuješ», — napisała tenisistka pad adnym z sumiesnych fota.
Chakieist u sacsietkach kudy mienš aktyŭny, adnak asnoŭnuju masu pastoŭ pryśviačaje kachanaj. Ścisły na słovy Kalcoŭ časam dzielicca pačućciami.
«Los źvioŭ majo žyćcio z samaj pryhožaj, piaščotnaj, kłapatlivaj i nievierahodna mudraj dziaŭčynaj. Ale pačućcio, kali ty pobač, nie pieradać słovami dla mianie. Ja ščaśliŭčyk!» — radasna pisaŭ Kalcoŭ.
«Bolšaść miarkujuć pa ludziach sa srodkaŭ masavaj infarmacyi. I kali pahladzieć na Arynu tolki z hetaha rakursu, to stvarajecca ŭražańnie, što heta vielmi ahresiŭny i dužy čałaviek na korcie ź vialikaj kolkaściu emocyj. Ale jaje lubiać nie za heta. Vy kali-niebudź bačyli intervju z Arynaj bieź jaje cudoŭnaj uśmieški i ščaślivaha pozirku? Nie! — pisaŭ chakieist. — Ale… Jana nievierahodna piaščotny, ranimy, lubiačy čałaviek, jakoha niemahčyma nie kachać!»
Jakimi buduć nastupnyja piać hadoŭ? Prahnoz Łatuški12
Kamientary