Padčas adpačynku chavajcie čamadan u vańnie. Tak paźbiehniecie vialikich prablem

Paśla doŭhaha padarožža my časta marym tolki pra toje, kab kinucca na miakki łožak u hatelnym numary. Byvaje, što my kidajem tudy i ŭłasny čamadan.

Ale Brytani Kempbeł, brytanski entamołah, raić tak nie rabić. Bolš za toje, čamadan taksama lepiej nie stavić na padłohu ci ŭ šafu. Najlepšaje miesca dla jaho — vannaja ŭ hatelnym numary, asabliva vanna, piša onet.pl.

Pryčyna takoj pieraściarohi — kłapy, drobnyja nasiakomyja, što charčujucca kryvioj čałavieka i inšych mlekakormiačych. Ich ukus časta vyklikaje niepryjemnyja simptomy i moža pryvieści da ciažkich chvarob nakštałt tyfu, tubierkulozu i sifilisu.

Kłapy zvyčajna chavajucca ŭ matracach, a taksama ŭnutry pružyn łožka, u abiŭcy i ŭ ščylinach mebli. Tamu, kali my kładziem čamadan na łožak, kłapy mohuć trapić u jaho, zabracca ŭ adzieńnie i «pryjechać» z nami dachaty, paśla čaho pazbavicca ad ich budzie vielmi składana. Kempbeł adznačaje, što hetyja nasiakomyja cudoŭna vyžyvajuć u časovych miescach znachodžańnia: u asabistym bahažy ci pad siadzieńniami ŭ mašynach, aŭtobusach i ciahnikach.

Vannaja — toje miesca, dzie ŭ vas najmienšaja vierahodnaść natrapić na kłapoŭ, tamu biaśpiečniej za ŭsio było b zachoŭvać čamadan mienavita tam.

Akramia łožkaŭ, niebiaśpiečna stavić čamadany na bahažnyja palicy, bo ŭ ich pustych nožkach taksama mohuć chavacca kłapy. Ale navat kali vy ŭpeŭnienyja, što kłapoŭ niama, lepiej za ŭsio pamiaścić čamadan u vialiki pakiet i tuha jaho zaviazać.

Karysna taksama viedać prykmiety taho, što ŭ hatelnym numary jość kłapy. Pieršaja ź ich — pach karyjandra ci maliny, što hnije. Taksama źviartajcie ŭvahu na maleńkija čornyja kropki na dyvanie, asabliva tam, dzie jon dachodzić da ściany, i kala mebli. Heta mohuć być ślady kryvi, jakija pakinuli kłapy.

Uvažliva ahledźcie łožak, zazirnicie pad matrac i padhałoŭnik, praviercie firanki, abrusy, dyvany, kamody, šafy i ramy dla karcin. Paścielnyja kłapy zvyčajna plaskatyja, majuć avalnuju formu, ich daŭžynia składaje 4-5 milimietraŭ. Koler takich kłapoŭ śvietła-karyčnievy, ale paśla pićcia kryvi jany robiacca fijaletavymi. Kali vy zaŭvažycie ŭ numary niešta, što mahło b śviedčyć pra prysutnaść kłapoŭ, adrazu ž paviedamicie pra heta administracyi hatela.

Pa viartańni z adpačynku praviercie čamadan na mahčymuju najaŭnaść kłapoŭ. Kali ličycie, što adzieńnie ŭ im mahło kantaktavać z kłapami, myjcie jaho na praciahu nie mienš čym 2 hadzin pry tempieratury nie nižej za 50 hradusaŭ.

Čytajcie taksama:

Jak zrazumieć, što vy padchapili ad klaščoŭ barelioz

Chatnija srodki ad soniečnych apiokaŭ — prostyja i efiektyŭnyja. Adrazu ž pamienšać bol

• 27
• 0
• 17
• 14
• 39
• 13
• 35
• 0