«Budzie jašče šmat našych udaraŭ»: Arastovič anansavaŭ pomstu za Vińnicu, Mikałajeŭ i Charkaŭ
Udary kryłatymi rakietami pa centrach ukrainskich haradoŭ — heta nie prosta parušeńnie pravił viadzieńnia vajny, a admaŭleńnie łohiki i zavajova cyvilizacyi jak takoj. Rasijanie abaviazkova pavinny adkazać za ataki, USU zabiaśpiečać hety praces užo siońnia ŭviečary, skazaŭ daradca kiraŭnika Ofisa prezidenta Ukrainy Alaksiej Arastovič, kamientujučy ŭdary pa Vińnicy, Mikałajevie i Charkavie, piša UNIAN.
«My budziem bić pa ich. Jany pa nas. Roźnica ŭ tym, što my bjom tolki pa vajennych celach, kožny raz staranna prahnazujučy spadarožnuju škodu. Jany bjuć, nie źviartajučy ŭvahu na takoje, kožny raz układvajučy ŭ prahnoz dadatkovy efiekt ad teroru mirnaha nasielnictva, abo — niepasredna dziela takoha teroru, jak ciapier u Mikałajevie i Charkavie», — zajaviŭ Arastovič.
Daradca staršyni OP nahadaŭ, što ŭžo trysta hadoŭ u cyvilizavanym śviecie praviły viadzieńnia vajny patrabujuć minimizacyi ŭpłyvu pry vybary mietadaŭ dziejańniaŭ i srodkaŭ paražeńnia. Kali dla vykanańnia vajennaha zadańnia dastatkova paranić voraha, a nie zabić, praviły praduhledžvajuć, što praciŭnik pavinien być tolki paranieny.
«Stralba kryłatymi rakietami ŭ centry horada ciaham dnia — heta nie prosta parušeńnie praviłaŭ viadzieńnia vajny. Heta admaŭleńnie łohiki i zavajova cyvilizacyi jak takoj. I cyvilizacyja daje adkaz. Chutka nie budzie, bo takoj mahčymaści niama. Ale kožny taki ŭdar paskaraje dziejańnie cyvilizacyi suprać antycyvilizacyj: sankcyi, pieradača zbroi nam. Budzie jašče šmat našych udaraŭ, ich udary ŭ adkaz, znoŭ našy, znoŭ ich. Z pucinskim režymam budzie skončana na poli boju, inšych sposabaŭ ź im skončyć niama. Siońnia viečaram USU spytajuć ź ich za Vińnicu, Mikałajeŭ i Charkaŭ», — adznačyŭ Arastovič.
Pavodle apošnich danych, u vyniku ŭdaru pa centry Vińnicy zahinuŭ 21 čałaviek, bolš za 100 paranienyja.
Kamientary