Telefonnym machlaram udałosia vymanić u biełaruskich piensijanieraŭ bolš za 4 miljony dalaraŭ
Chvalu machlarstvaŭ u dačynieńni da pažyłych ludziej, učynienych pad padstavaj akazańnia dapamohi svajakam, jakija nibyta patrapili ŭ DTZ, udałosia źbić. Ale ź siaredziny sakavika, kali ŭ Biełarusi było zafiksavana pieršaje paviedamleńnie pra takoje złačynstva, ašukancy vymanili ŭ biełaruskich piensijanieraŭ bolš za 4 miljony dalaraŭ. Pra heta paviedamiŭ namieśnik načalnika Hałoŭnaha ŭpraŭleńnia kryminalnaha vyšuku MUS Dźmitryj Burdziuk.
«Na siońniašni momant śledčymi ŭzbudžana ŭžo 592 kryminalnyja spravy, ź ich u 463 vypadkach padazravanyja ŭstanoŭlenyja. Pry hetym ahulnaja suma naniesienaj škody hramadzianam pieravysiła čatyry miljony dalaraŭ ZŠA!», — raskazaŭ milicejski čynoŭnik.
Pa jahonych słovach, «na vudu machlaroŭ čaściej za ŭsio traplajucca žančyny va ŭzroście ad 60 hadoŭ i starej». «Naprykład, u Minsku z bolš čym 400 paciarpiełych tolki 43 — heta pradstaŭniki mocnaha połu», — adznačyŭ jon.
Što tyčycca kurjeraŭ, to imi čaściej za ŭsio stanoviacca ludzi va ŭzroście ad 18 da 35 hadoŭ biez peŭnaha rodu zaniatkaŭ. Samamu małodšamu ź ich 15 hadoŭ, najstarejšamu — 56. Siarod zatrymanych sioleta 179 čałaviek — 12 hramadzian Rasijskaj Fiederacyi, 14 niepaŭnaletnich, 13 žančyn. Bolš za čverć hetych ludziej raniej pryciahvalisia da kryminalnaj adkaznaści.
Sutnaść złačynnaj schiemy — u tym, što čałavieku telefanujuć i paviedamlajuć, što ź jahonym blizkim svajakom zdaryłasia niešta kiepskaje, najčaściej bujnoje DTZ. I kab jaho ŭratavać, treba terminova vialikaja suma hrošaj, jakuju achviary machlarstva prapanujecca nieadkładna vydać kurjeru, jaki chutka pryjazdžaje. Paśla atrymanyja hrošy chutka pieravodziać za miažu, i navat zatrymańnie kurjera nie daje mahčymaść ich viarnuć, bo jon paśpiavaje ich pieradać inšym ludziam.
Kamientary