WSJ: Pahrozy Pucina jadziernaj zbrojaj pracujuć, a voś samo jaje vykarystańnie napeŭna nie spracuje

Pucin rehularna pahražaje śvietu vykarystańniem jadziernaj zbroi. Pa intensiŭnaści pahroz Pucina možna paraŭnać chiba što z Kim Čen Ynam. Čamu jon vykazvaje takija pahrozy? Tamu što jany pracujuć, piša ŭpłyvovaje amierykanskaje vydańnie.

Aściarohi adnosna mahčymaj jadziernaj eskałacyi strymlivajuć ZŠA i ich sajuźnikaŭ ad bolš aktyŭnaha ŭdziełu ŭ vajnie va Ukrainie. Chacia Zachad i pastaŭlaje Ukrainie zbroju, karysnuju dla pierałomu ŭ bajavych dziejańniach, jon nie navažyŭsia na kroki, jakija mahli b pryvieści da pramoha sutyknieńnia pamiž Rasijaj i NATA. Naprykład, nie abviaściŭ bieśpiłotnuju zonu nad Ukrainaj.

Zachodnija krainy pakul što nie zaŭvažyli nijakich dziejańniaŭ Rasii, jakija b śviedčyli pra padrychtoŭku da vykarystańnia jadziernaj zbroi. Ale da samich pahroz Pucina na Zachadzie staviacca surjozna: imaviernaść vykarystańnia jadziernaj zbroi nie nulavaja.

Zachodnija lidary ličać rytoryku Pucina prykmietaj adčaju. Daśledčyki i vajskovyja stratehi sprabujuć vyznačyć roznyja scenaryi. U bolšaści ź ich vykarystańnie jadziernaj zbroi pahoršyć stanovišča Rasii.

Fransua Esbur, daradca paryžskaha Fondu stratehičnych daśledavańniaŭ pa pytańniach abarony, zajaviŭ, što vykarystańnie taktyčnaj jadziernaj zbroi na poli boju budzie aznačać «hučny vybuch, ale adnosna niaznačny efiekt na chod vajennych dziejańniaŭ».

Ukraina trymaje svaje siły raskancentravanymi i nie zasiarodžvaje vojski dla nastupu. Akramia taho, kab skarystacca pieravahaj, rasijskim vojskam treba budzie prasunucca praź jadziernyja apadki.

Čysta tearetyčna, Rasija mahła b skinuć bombu na bujny ŭkrainski nasieleny punkt. Ale zachodnija analityki taksama nie bačać u hetym stratehičnaj karyści: takaja ataka prymusić Zachad dziejničać aktyŭniej, Zachad pierastanie siabie strymlivać siabie ŭ padtrymcy Ukrainy.

Z druhoha boku, Pucin pakazaŭ siabie na hetaj vajnie vielmi kiepskim strateham. Brytanski ekśpiert pa jadziernaj zbroi Łoŭrens Frydman kaža, što rasijski lidar užo zrabiŭ niekalki durnych krokaŭ za čas vajny, tamu nielha całkam vyklučać mahčymaść taho, što jon moža zrabić niešta «jašče durniejšaje».

U telezvarocie ŭ sieradu Pucin pachvaliŭsia tym, što ŭ Rasii jość bolš sučasnaja zbroja, čym u NATA, i dadaŭ, što ŭ vypadku pahrozy terytaryjalnaj cełasnaści Rasii «jany abaviazkova vykarystajuć usie dastupnyja sistemy ŭzbrajeńnia».

Farmulujučy pahrozu, Pucin vychodzić za miežy aficyjnaha abhruntavańnia vykarystańnia jadziernaj zbroi. U 2020 hodzie Maskva apublikavała novuju jadziernuju daktrynu, u jakoj havaryłasia, što adnoj z padstaŭ vykarystańnia jadziernaj zbroi źjaŭlajecca adkaz na zvyčajnuju ataku, «jakaja pahražaje samomu isnavańniu dziaržavy».

Ale ž pahroza terytaryjalnaj cełasnaści Rasii heta zusim inšaja situacyja, čym pahroza samomu isnavańniu dziaržavy.

Na praktycy rasijskuju daktrynu nieabaviazkova varta ŭsprymać jak kančatkovuju instrukcyju da dziejańniaŭ u realnaj situacyi. Rasija heta nie taja kraina, jakaja ŭvieś čas stroha kirujecca svaimi ž zakonami.

Dy i ŭ pahrozach Pucina ničoha novaha niama. 27 lutaha jon zahadaŭ pavysić uzrovień bajavoj hatoŭnaści rasijskaha jadziernaha arsienała. Na pačatku sakavika ZŠA adkłali vyprabavańnie mižkantynientalnaj balistyčnaj rakiety. Paźniej zachodnija aficyjnyja asoby zajavili, što nie vyjavili nijakaj niezvyčajnaj jadziernaj aktyŭnaści Rasii.

Tym nie mienš, niekatoryja bajacca, što Pucin niezakonna anieksuje ŭkrainskija terytoryi, abvieścić ich rasijskimi, a potym na padstavie abarony terytaryjalnaj cełasnaści Rasii vykarystaje jadziernuju zbroju. Ale Ukraina ŭžo nanosiła ŭdary pa celach u akupavanym Krymie i pa rasijskim Biełharadzie, i nijakaha adkazu nie było.

Akramia taho, vykarystańnie jadziernaj zbroi — vielmi ryzykoŭny krok. Nichto nie viedaje, u jakim stanie rasijski jadzierny arsienał. Častyja niaspraŭnaści pry zapusku rakiet byli b fatalnymi dla Rasii. I jašče pytańnie, ci vykanaje rasijskaje vajskovaje kamandavańnie zahad prymianić jadziernuju zbroju, kali Pucin taki zahad daść.

• 40
• 0
• 0
• 2
• 4
• 7
• 7
• 0