«Kinuli ŭ miasarubku». Elitnaja bryhada rasijskaha HRU paniesła surjoznyja straty pry adstupleńni ź Limana
Ruskaj słužbie «Bi-bi-si» stała viadoma, što ŭ apieracyi pa niaŭdałym utrymańni Limana brali ŭdzieł elitnyja rasijskija vajskovyja złučeńni, i jany panieśli surjoznyja straty. Jak minimum dzieviać čałaviek zahinułymi i adnaho ciažka paranienym straciła pry adstupleńni ź Limana 3-ja hvardziejskaja bryhada śpiecyjalnaha pryznačeńnia Hałoŭnaha ŭpraŭleńnia Hienieralnaha štaba, vyśvietliła vydańnie, vyvučyŭšy sacyjalnyja sietki i pahavaryŭšy ź siastroj adnaho z zahinułych bajcoŭ. Takija vajskovyja złučeńni jašče z savieckich časoŭ adpraŭlajucca na samyja važnyja vajennyja zadańni.
Pakul rasijskaje vojska adstupała ź Limana ŭ Danieckaj vobłaści, rasijskaja prapahanda raskazvała, što jaho ŭtrymlivajuć mabilizavanyja z samaabvieščanaj «ŁNR» i rasijskija dobraachvotniki z atradaŭ «Bars», jakija farmujucca ŭ rehijonach. Ale nasamreč usio akazałasia nie zusim tak.
«Usiu treciuju śpiec. bryhadu śpiecnaza zahubili. Kinuli ŭ miasarubku. Jaki jon u mianie pryhožy. 19 hod».
«Pry vykanańni zadač na terytoryi Ukrainy hieraična zahinuŭ moj brat. Viečnaja tabie pamiać, majo serca, moj hieroj!»
«Paviedamili vielmi sumnyja naviny dla mianie! Zahinuli maje braty, siabry, sapraŭdnyja tavaryšy pa słužbie i prosta dobryja mužyki. Mnie budzie vas nie chapać!»
«Prosim malitvaŭ ab supakoi vajara Viačasłava (Zincova), vypusknika škoły-internata pry Mikoła-Šartomskim manastyry. Zahinuŭ u Čyrvonym Limanie».
30 vieraśnia i 1 kastryčnika ŭ sacyjalnaj sietcy «VKontaktie» źjaviŭsia šerah padobnych paviedamleńniaŭ, jakija śviedčyli pra toje, što adstupleńnie rasijskaha vojska z horada Liman Danieckaj vobłaści adbyvałasia nie tak prosta, jak pra heta paviedamlali aficyjnyja rasijskija ŚMI. Horad sprabavali ŭtrymlivać daloka nie tolki dobraachvotniki z Rasii ci mabilizavanyja žychary samaabvieščanych respublik, jakija Uładzimir Pucin da taho momantu abviaściŭ terytoryjaj Rasii.
«Zahinuli 8 čałaviek, dvoje byli paranienyja ŭ ciažkim stanie. Adzin ź ich pamior, adzin pakul žyvy, ale vielmi ciažki. Zahinuła amal usia hrupa», — raspaviała Bi-bi-si siastra adnaho z zahinułych vajskoŭcaŭ, paćvierdziŭšy, što pry adstupleńni ź Limana adździaleńnie straciła 3-ja bryhada śpiecpryznačeńnia HU HŠ z Taljaci. «Usiaho zahinuła dzieviać čałaviek, dvoje paranienych», — skazała žonka inšaha zahinułaha.
Poŭnaj infarmacyjaj pra miesca i abstaviny hibieli desantnikaŭ ich svajaki nie vałodajuć, infarmacyja im pastupaje ŭryŭkavaja: «Viedaju, što voś hetych chłopcaŭ tam kinuli, jany cełyja sutki adbivalisia, ale nie zmahli. Zahinuŭ moj brat, jamu byŭ usiaho tolki 21 hod, zahinuŭ jaho siabar, jamu 19 hadoŭ», — raspaviała siastra zahinułaha.
Kali cieły vajskoŭcaŭ viernuć dadomu i kali adbudziecca pachavańnie, siemji pakul nie viedajuć. 19-hadovy šarahoviec Daniił Bajkoŭ byŭ samym małodšym u hetym adździaleńni, razam ź im zahinuli staršy lejtenant Viačasłaŭ Zincoŭ, małodšy lejtenant Viktar Harabiec, staršyny Andrej Šoryn i Juryj Fiłataŭ, šarahoviec Alaksiej Čyndzin.
Vajskoŭcy Karpienka i Uźbiakaŭ ź ciažkimi ranieńniami byli dastaŭlenyja ŭ špital. Uźbiakaŭ paźniej skanaŭ.
Vierahodna, heta samaja bujnaja adnarazovaja strata 3-j bryhady śpiecyjalnaha pryznačeńnia, choć straty jana niesła z samaha pačatku vajny: «Viadoma, [straty] byli, ale chiba nam chtości kaža pra heta», — skazała siastra adnaho z zahinułych.
Nakolki viadoma z adkrytych krynic, pieršyja bajcy 3-j bryhady HRU zahinuli ŭ pačatku sakavika. Da adstupleńnia ź Limana samymi ciažkimi dla bryhady byli sutki z 3 pa 4 sakavika — tady zahinuli čatyry raźviedčyki: kamandzir roty major Azamat Alimaŭ, kapitan Alaksiej Čučmanaŭ, małodšy siaržant Stanisłaŭ Hierasimaŭ i małodšy siaržant Jahor Bukacin.
Žurnalisty Bi-bi-si, «Miedyjazony» i hrupa vałancioraŭ ź pieršaha dnia vajny viaduć padlik zahinułych rasijskich vajskoŭcaŭ na padstavie adkrytych krynic. Da 1 vieraśnia žurnalisty sabrali źviestki pra 26 zahinułych vajskoŭcaŭ 3-j hvardziejskaj bryhady śpiecnaza, siarod jakich było piać aficeraŭ. Da siaredziny vieraśnia niezvyčajnaj, ale važnaj krynicaj infarmacyi akazaŭsia stend z fotazdymkami zahinułych vajskoŭcaŭ, vystaŭleny padčas čempijanata Uzbrojenych siłaŭ Rasii pa boksie ŭ Barysahlebsku. Na im byli nadrukavanyja dadzienyja 47 zahinułych sałdat i aficeraŭ 3-j hvardziejskaj bryhady śpiecnaza HRU.
Aznajomiŭšysia z fotazdymkami na stendzie, Bi-bi-si vyśvietliła, što proźviščy bolšaści zhadanych śpiecnazaŭcaŭ raniej źjaŭlalisia ŭ ŚMI i sacsietkach, ale biez paznačeńnia miesca słužby. Na stendzie taksama byli fatahrafii dvuch supracoŭnikaŭ HRU, pra čyju hibiel raniej nie paviedamlałasia publična. Ciapier u hety śpis dadałosia jak minimum dzieviać novych proźviščaŭ.
I tady, i ciapier amal kožny čaćviorty zahinuły bajec śpiecnaza HRU — aficer. Takija straty asabliva adčuvalnyja dla vojska i ciažka papaŭniajucca. Zamianić aficera śpiecnaza možna tolki čałaviekam z takoj ža śpiecyjalnaściu i ŭzroŭniem padrychtoŭki, a na heta sychodziać hady navučańnia i trenirovak.
Pavodle acenki ekśpierta amierykanskaha Centra vajenna-marskoha analizu Majkła Kofmana, na kožnaha zahinułaha rasijskaha vajskoŭca padčas vajny va Ukrainie prypadaje ŭ siarednim kala troch z pałovaj paranienych. Na asnovie hetych źviestak možna vykazać zdahadku, što z šerahaŭ 3-j bryhady śpiecnaza HRU ŭ vyniku hibieli abo ranieńnia mahli vybyć (pa mienšaj miery časova) bolš za 200 čałaviek.
Dakładnaja kolkaść atradaŭ śpiecnaza zasakrečanaja. Ale navat pavodle kansiervatyŭnych acenak, vybyvańnie bolš za 200 bajcoŭ moža być raŭnaznačna poŭnamu vychadu sa stroju dźviuch rotaŭ śpiecnaza.
U chodzie vajny ŭ Čačni raźviedroty śpiecnaza HRU naličvali pa 45-70 čałaviek. Kali brać za asnovu takuju acenku, nie vyklučana, što sa stroju vyviedziena 75% raźviedrot bryhady.
Što ź siabie ŭjaŭlaje 3-ja bryhada HU HŠ
3-ja bryhada HRU, jakoj ciapier kamanduje pałkoŭnik Albiert Amaraŭ, była stvorana ŭ 1966 hodzie ŭ HDR. Sa studzienia 1991-ha pa červień 1992 hoda jana dysłakavałasia ŭ Ryzie, a zatym była pieradysłakavanaja ŭ pasiołak Roščynski Samarskaj vobłaści. U 2010 hodzie bryhada pierajechała ŭ Taljaci.
Vajskoŭcy bryhady prymali ŭdzieł u hramadzianskaj vajnie ŭ Tadžykistanie, dźviuch čačenskich kampanijach, miratvorčaj misii ŭ Kosavie, a ŭ pačatku 2000-ch achoŭvali rasijskaja pradstaŭnictva ŭ afhanskim Kabule. U žniŭni 2017 hoda bryhada straciła dvuch svaich vajskoŭcaŭ u Siryi.
Skandalnym dla 3-j bryhady HRU atrymaŭsia 2015 hod, kali pad horadam Ščaście ŭ Łuhanskaj vobłaści ŭ pałon trapili dva hramadzianina Rasii Jaŭhien Jerafiejeŭ i Alaksandr Alaksandraŭ. Na dopycie jany zajavili, što źjaŭlajucca vajskoŭcami 3-j hvardziejskaj bryhady. Rasijski bok, jaki na toj momant admaŭlaŭ prysutnaść svaich vojskaŭ na ŭschodzie Ukrainy, zajaviŭ, što hetyja vajskoŭcy daŭno zvolnilisia i vajavali na baku «narodnaj milicyi ŁNR» u jakaści dobraachvotnikaŭ.
U krasaviku 2016 hoda Jerafiejeŭ z Alaksandravym byli asudžanyja va Ukrainie da 14 hadoŭ źniavoleńnia, a ŭžo praź miesiac ich abmianiali na ŭkrainskuju lotčycu Nadzieju Saŭčanka, jakuju rasijski bok vinavaciŭ u datyčnaści da hibieli zdymačnaj hrupy rasijskaha telebačańnia. Pra dalejšy los Jerafiejeva i Alaksandrava ničoha nie paviedamlałasia, a Saŭčanka zatym paśpieła pabyvać deputatam Viarchoŭnaj rady, fihurantam kryminalnaj spravy i žurnalistkaj.
Pamiž kazakami i mabilizavanymi
Rasijskija ŚMI amal nikoli nie paviedamlajuć pra apieracyi z udziełam śpiecnaza HU HŠ, časam pra heta stanovicca viadoma postfaktum, kali apieracyja prachodzić paśpiachova, a ŭ vypadku z vajnoj va Ukrainie i kali havorka idzie pra adstupleńni rasijskaha vojska, prapahanda zaŭsiody imkniecca vystavić spravu tak, što na kankretnym učastku frontu pravalilisia nie kadravyja vajskoŭcy, a rasijskija dobraachvotniki i mabilizavanyja z samaabvieščanych respublik.
Tak heta adbyvałasia, kali USU prarvali front u Charkaŭskaj vobłaści, vyzvaliŭšy ŭ vyniku Bałakleju, Izium, Kupiansk i mnostva inšych nasielenych punktaŭ. Tady rasijskija ŚMI raspaviadali, što pieradavuju tam trymali mabilizavanyja z «ŁNR» i bajcy Rashvardyi z Baškartastana i Samary. Tolki praź niekalki dzion vyśvietliłasia, što ŭ pałon tam trapili marpiechi z Kalininhradskaj vobłaści.
Pra vajskoŭcaŭ, jakija sprabavali ŭtrymać Liman, aficyjnyja rasijskija vajenkary raspaviadali ŭ padobnych intanacyjach: «Pa ich adrazu vidać, što heta zvyčajnyja rabotniki vajny, na jakich usiu našu historyju i trymalisia franty. Nijakich pantoŭ, praźmiernaściaŭ u ekipiroŭcy, napusknoj bravady», — pisaŭ pra vajskoŭcaŭ, jakija ŭtrymlivali horad, Alaksandr Koc z «Kamsamolskaj praŭdy», udakładniajučy, što heta dobraachvotniki z atrada «Bars-13», kazaki, mabilizavanyja žychary samaabvieščanaj «ŁNR» i 20-ja armija.
Telehram-kanał «Rybaŕ», jaki śpiecyjalizujecca na vajennaj tematycy, udakładniaŭ skład tych, chto sprabavaŭ utrymać Liman: «503-ci hvardziejski motastrałkovy połk sa składu 19-j motastrałkovaj dyvizii 58-j ahulnavajskovaj armii». U prarasijskim kanale «Staršie Eddy» pisali: «Liman abaraniaje nie tolki BARS «Kubań», ale i rehularnaja armija». A były žurnalist rasijskaha prakramloŭskaha kanała Lifenews i aŭtar prajekta Wargonzo Siamion Piehaŭ raspaviadaŭ prysutnym na maskoŭskaj Krasnaj płoščy ŭ honar anieksii zachoplenych terytoryj Ukrainy, što Liman utrymlivali «Smalenskaja piachota, «Barsy» — dobraachvotniki, «Ruski lehijon», kamiendačy, jakija nie pakidajuć horad».
Ź niekrałohaŭ, jakija źjavilisia ŭ apošnija dni, i razmoŭ sa svajakami zahinułych stała jasna, što akramia mabilizavanych z samaabvieščanych respublik i dobraachvotnikaŭ utrymlivać Liman sprabavaŭ (biespaśpiachova) i śpiecnaz HRU.
U SSSR śpiecnaz HRU vykarystoŭvaŭsia dla praviadzieńnia najbolš važnych sakretnych apieracyj i dyviersij u tyle praciŭnika. U Rasii atradam HRU stali daručać inšyja — niazvykłyja dla ich — zadačy, pakolki mnohija inšyja vajskovyja padraździaleńni akazalisia nie padrychtavanyja da ŭdziełu ŭ bajach.
U pieršyja hady vajny ŭ Čačni śpiecnaz HRU niaredka vykarystoŭvali prosta ŭ jakaści ahulnavajskovaj raźviedki. A ŭ chodzie šturmu Hroznaha atrady śpiecnaza naohuł uklučali ŭ skład šturmavych hrup na ahulnych padstavach.
Apytanyja Bi-bi-si ekśpierty adznačajuć, što ŭ chodzie vajny na terytoryi Ukrainy atrady HRU znoŭ vykarystoŭvajucca dla vyrašeńnia nieŭłaścivych elitnym raźviedčykam zadač (u tym liku i dla abarončych bajoŭ), a heta viadzie da dadatkovych strataŭ.
Čytajcie taksama:
«Nie chočacca pamirać za Pucina». Parazmaŭlali z rasijanami, jakija ŭciakajuć ad mabilizacyi
ISW: Ukraincy vyciskajuć byłyja najlepšyja rasijskija častki na ŭschodzie i na poŭdni
Vajskovy ekśpiert patłumačyŭ, čamu zaciahvajecca vyzvaleńnie Chiersonščyny
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8282
Kamientary