U Dziatłavie hatovyja ŭžo addać pałac Radziviłaŭ usiaho za try bazavyja
Były pałac Radziviłaŭ pad Dziatłavam na Hrodzienščynie jaki ŭžo raz vystavili na aŭkcyjon. Infarmacyja pra heta źjaviłasia na sajcie Dziaržaŭnaha kamiteta pa majomaści. Budynak apynuŭsia ŭ raździele łotaŭ, jakija hatovyja pradać za adnu bazavuju. Ale, jak piša vydańnie «Viečiernij Hrodno», nabyć pałac možna za try bazavyja, to-bok za 96 rubloŭ.
U byłym pałacy dva pavierchi, budynak niežyły, ale jość kanalizacyja, elektryčnaść, aciapleńnie i vodazabieśpiačeńnie. Bonusam da pałaca iduć čatyry chałodnyja pabudovy i sklep. Ahulnaja płošča majontka pieravyšaje 1,5 tys. kvadratnych mietraŭ.
Ciapier pałac znachodzicca na bałansie adździeła ideałahičnaj raboty, kultury i pa spravach moładzi Dziatłaŭskaha rajonnaha vykanaŭčaha kamiteta.
Aŭkcyjon zapłanavany na 29 listapada. Pakupnik łota atrymaje prava arandavać ziamlu na 50 hadoŭ, a vykarystoŭvać adrestaŭravany pałac možna budzie jak lačebny, navučalny, navukovy ci spartyŭny abjekt.
Histaryčny budynak, jakomu bolš za 270 hadoŭ, tolki letaś dvojčy vystaŭlali na tarhi. Pieršapačatkova za jaho prasili 30 tys. rubloŭ, paźniej košt źmienšyli da 145 rubloŭ. Ale achvotnych uziać jaho i niešta ŭ im rabić nie znachodzicca. Adpužvaje, vidać, najpierš toje, što budučy pakupnik abaviazany pravieści ŭ pałacy rekanstrukcyju i pačać vykarystoŭvać abjekt nie paźniej za 5 hadoŭ z momantu padpisańnia damovy kupli-prodažu.
Rod Radziviłaŭ staŭ ŭładalnikam Dziatłava ŭ XVIII stahodździ. Historyja budaŭnictva pałacavaha kompleksu źviazana z kniaziem Ulrykam Kryštafam Radziviłam. Jahony baćka Mikałaj Faŭstyn Radzivił pačaŭ uźviadzieńnie pałaca. U vyniku ŭ 1751 hodzie na miescy spalenaha šviedskimi vojskami padčas Paŭnočnaj vajny draŭlanaha zamka byŭ pabudavany šykoŭny dvuchpaviarchovy budynak.
Da kanca XVIII stahodździa pobač z pałacam byŭ uładkavany park i sažałka z mastkami, paviljonami, jakija nie zachavalisia. U kancy XVIII stahodździa pałacava-parkavy kompleks Radziviłaŭ pierajšoŭ va ŭładańnie rodu Sołtanaŭ, ale byŭ kanfiskavany rasijskimi ŭładami za ŭdzieł haspadara ŭ paŭstańni 1830—1831 hadoŭ.
Paśla ŭ budynku raźmiaščalisia kazarmy, zatym škoła, a ŭ 1930 hodzie były pałac pieratvaryli ŭ prytułak dla dziaŭčynak. Z 1950 hoda tut znachodziłasia miedycynskaja ŭstanova. Pałacavy korpus i ciapier praktyčna zachoŭvaje pieršapačatkovy vyhlad.
Čytajcie taksama:
U Bierazinie vystavili na aŭkcyjon siadzibu hrafaŭ Patockich
Kolišni pałac Radziviłaŭ u Dziatłavie znoŭ vystavili na aŭkcyjon
U Dziatłavie pradajuć pałac Radziviłaŭ. Usiaho za 145 rubloŭ
«Ludzi, ja viarnułasia ŭ SSSR. Jašče i 170 rubloŭ za hety kašmar!» Błohierka aburyłasia načnoj čarhoj u padatkovuju7
Kamientary