Mužčyna piać hadoŭ chadziŭ z kavałačkam zatyčki ŭ vuchu i dumaŭ, što hłuchnie
Brytaniec, jaki ličyŭ, što amal ahłuch, vyjaviŭ, što ŭ jaho vuchu zasieła nasadka ad zatyčki dla vušej. Płastmasavy pradmiet «žyŭ» tam piać hadoŭ, piša Bi-bi-si.
Uoles Li, žychar horada Vejmut u anhlijskim hrafstvie Dorsiet, uvieś hety čas dumaŭ, što prablemy sa słycham źviazanyja ź jaho pracaj u vielmi šumnaj avijacyjnaj halinie abo sa starymi traŭmami, atrymanymi ŭ rehbi.
Ale ŭrešcie jon vyrašyŭ kupić chatni endaskop, z dapamohaj jakoha vyjaviŭ u vuchu maleńki bieły abjekt. Paśla hetaha Uoles pajšoŭ da doktara.
Pa jaho słovach, jon adčuŭ vielizarnuju palohku, kali doktar dastaŭ ź jaho vucha kavałačak płastyka.
Uoles Li, vieteran Brytanskaha karaleŭskaha fłotu, ličyć, što pradmiet zastaŭsia ŭ jaho ŭ vuchu padčas praciahłaha palotu samalotam.
«Piać hadoŭ tamu, kali ja byŭ u svajoj siamji ŭ Aŭstralii, ja kupiŭ hetyja maleńkija zatyčki dla vušej, na jakija možna nadziavać roznyja nasadki, — skazaŭ jon. — Voś adna z hetych nasadak tam i zasieła».
Prykładna z taho času jon pačaŭ zaŭvažać paharšeńnie słychu i pačaŭ aścierahacca, što nieŭzabavie zusim ahłuchnie.
Uoles raspavioŭ, što za hetyja hady jon niekalki razoŭ sprabavaŭ dobra pračyścić vušy, adnak biez pośpiechu. Jon užo pačaŭ «varjacieć».
Doktar-ŁOR, jaki vyciahnuŭ płastmasavaha mučyciela, taksama byŭ trochi «ŭ šoku».
«Spačatku jon [doktar] pasprabavaŭ vyciahnuć jaho…, ale z-za taho, što frahmient tak doŭha tam znachodziŭsia, vakoł jaho zaćviardzieła vušnaja siera, i jon naohuł nie ruchaŭsia», — padzialiŭsia svaimi pakutami Uoles.
«Tady jon dastaŭ taki minijaciurny pincet, jaki ŭstaŭlajecca ŭ trubku, i prasunuŭ jaho ŭ vušny kanał. Ja prosta adčuvaŭ, jak jon ciahnie, a potym byŭ rezki streł».
«Ja adrazu ž pačaŭ čuć usio vakoł. Tuman, jaki byŭ u majoj hałavie ŭsie hetyja hady, raźviejaŭsia, i ja staŭ usio vydatna čuć».
«Heta była takaja nievierahodnaja palohka,… byccam ja znoŭku pačaŭ čuć!» — kaža mužčyna.
ŁOR-chirurh Nił de Zojsa ŭ kamientary Bi-bi-si skazaŭ, što pravierka vušej u chatnich umovach — pracedura adnosna biaśpiečnaja, ale jon nie raić sprabavać vydalać staronnija pradmiety samastojna, pakolki heta moža pryvieści da infiekcyi i novych prablem.
U takich vypadkach, pa jaho słovach, patrabujecca prafiesijnaja miedycynskaja dapamoha.
«Usie ekstremisty ci ŭžo asudžanyja, ci źjaŭlajucca fihurantami spraŭ, jakija buduć razhledžany sudami». Švied padvodzić rysu pad represijami?9
Kamientary
Pravilno hovoriat: u britanciev dažie jumor osobiennyj.