ZŠA źmiakčyli sankcyi suprać Vieniesueły za prahres u pieramovach ułady i apazicyi
ZŠA vyrašyli asłabić naftavyja sankcyi suprać Vieniesueły ŭ adkaz na dasiahnieńnie damoŭlenaściaŭ pamiž uładami i apazicyjaj hetaj dziaržavy, paviedamiła Ministerstva finansaŭ ZŠA.
Viedamstva vypuściła licenziju, zhodna ź jakoj kampanija Chevron na paŭhoda atrymlivaje prava zdabyvać naftu i vyrablać naftapradukty ŭ Vieniesuele, a taksama pastaŭlać ich na amierykanski rynak.
«Hetaja miera adlustroŭvaje doŭhaterminovuju palityku ZŠA kropkava źmiakčać sankcyi ŭ zaležnaści ad kankretnych krokaŭ, jakija pasłablajuć biedstvy vieniesuelskaha naroda i padtrymlivajuć adnaŭleńnie demakratyi», — havorycca ŭ pres-relizie ministerstva.
Pry hetym, jak zajaviŭ vysokapastaŭleny pradstaŭnik Biełaha doma, Vašynhton pakidaje za saboj prava jak na dalejšaje pasłableńnie sankcyj suprać Vieniesueły, tak i na ich uzmacnieńnie.
Pierad hetym ułady i apazicyja Vieniesueły damovilisia ab supracoŭnictvie ŭ zabieśpiačeńni humanitarnaj dapamohi dla krainy. Pahadnieńnie, dasiahnutaje na pieramovach u Mieksicy, praduhledžvaje razmarozku častki valutnych reziervaŭ krainy ŭ zamiežnych bankach, zamarožanych niekalki hadoŭ tamu, kali šerah krain Zachadu, uklučajučy ZŠA, admovilisia pryznavać lehitymnaść prezidenta Vieniesueły Nikałasa Madury.
Buduć razmarožanyja, jak paviedamlajuć ahienctvy, kala 3 miljardaŭ dalaraŭ, jakija nakirujuć na finansavańnie humanitarnych vydatkaŭ, jak ramont elektryčnych sietak abo pastaŭki miedycynskaha abstalavańnia i miedykamientaŭ. Kiravańnie srodkami budzie ažyćciaŭlacca pad ehidaj AAN.
Pajšoŭ z žyćcia 32-hadovy Maksim Čarniaŭski — zasnavalnik supołki «Nadakučyŭ nam hety Łukašenka» pačatku 2010-ch22
Kamientary