Sirata z Mahilova kinuła błohiera na 6 tysiač dalaraŭ. Toj dumaŭ, što jana miljanierka
Aficyjny pradstaŭnik Śledčaha kamiteta Alaksandr Suchadolski raskazaŭ ahienctvu «Minsk-Naviny» pra niezvyčajnaje machlarstva, jakoje ździajśniała dziaŭčyna z Mahilova, jakaja ad pačatku nie mieła vialikich hrošaj, ale ŭmieła rabić vyhlad, što ich maje.
18-hadovaja mahiloŭka, jakaja hadavałasia biez baćkoŭ, na svajoj staroncy ŭ sacyjalnych sietkach stała vydavać siabie za bahatuju maładuju łedzi, čyje baćki žyvuć za miažoj i dasyłajuć ŭlubionaj dačce šmat hrošaj, vykonvajučy ŭsie jaje žadańni.
Na dziaŭčynu «zapadali» pieradusim chłopcy-alfonsy, jakija sami nie śpiašalisia daryć darahija padarunki, ale zaprašali «zamožnuju» znajomuju da siabie dadomu. A tam jana nieprykmietna prysabiečvała hrošy i kaštoŭnyja rečy. Prytym rabiła heta takim čynam, što paśla paciarpiełyja navat nie źviartalisia ŭ milicyju, bo apubličvańnie spravy mahło b razburyć ich siamiejnaje žyćcio.
Takim čynam dziaŭčyna ŭźbiłasia na darahija rečy, telefon i navat aryhinalnuju sumačku Christian Dior. I ŭrešcie jana pryvabiła bahataha mahiloŭskaha błohiera, ź jakim zaviała pierapisku ŭ sacyjalnaj sietcy.
Dziaŭčyna daviedałasia, što jon pradaŭ kvateru i atrymaŭ bujnuju sumu najaŭnymi, a praź miesiac atrymała dostup i da jahonaj kvatery.
Nieŭzabavie jana znajšła, dzie zachoŭvajucca hrošy, ale adrazu ŭsiu sumu kraści nie stała, a pačała ŭpotaj brać patrochu, za hrošy błohiera stvarajučy ŭ tym liku i ŭ jahonych vačach vobraz bahaciejki, jakaja atrymlivaje ščodruju padtrymku ad baćkoŭ.
Niejki čas dziaŭčyna žyła padvojnym žyćciom u svajo zadavalnieńnie.
Chłopcu jana havaryła, što heta baćki dasłali hrošy, a siabram i znajomym, jakija sustrakali jaje ŭ barach i kaviarniach u darahich rečach, — što heta ščodryja padarunki ciapierašniaha maładoha čałavieka.
Ale ŭsia schiema abrynułasia tady, kali prykładna praź miesiac chłopiec vyrašyŭ kuplać novuju kvateru i nie daličyŭsia ŭ svaich zapasach bolš za 6 tys. dalaraŭ. Abvinavačanaja ŭ kradziažy, dziaŭčyna pasprabavała pieravieści strełki na siabroŭ błohiera, jakija prychodzili ŭ hości, ale dabiłasia tolki taho, što paciarpieły źviarnuŭsia ŭ milicyju. A tam nieŭzabavie razbłytali ŭvieś kłubok.
U chodzie śledstva vyśvietliłasia, što abvinavačanaja, akramia ŭsiaho inšaha, naviedvała darahi fitnies-kłub, dzie skrała bujnuju sumu ŭ inšaj žančyny.
Dziejańni 18-hadovaj žycharki Mahilova byli kvalifikavanyja pa č. 3 art. 209 KK («Kradziež, učynieny ŭ bujnym pamiery»). Sud pryznaŭ dziaŭčynu vinavataj i prysudziŭ da 2 hadoŭ pazbaŭleńnia voli i štrafu 20 bazavych vieličyń (640 rubloŭ). Taksama joj treba budzie pakryć škodu paciarpiełym, a na jaje majomaść nakłali aryšt.
Kamientary