Dalar i jeŭra praciahvajuć daražeć. Čamu tak adbyvajecca i što budzie z kursam dalej
Biełaruski rubiel praciahvaje abiasceńvacca ŭ adnosinach da dalara ZŠA i jeŭra, ale adnačasova ŭmacoŭvajecca da rasijskaha rubla. Čamu tak adbyvajecca i čaho varta čakać ad kursaŭ najbližejšym časam?
Jak źmianiŭsia kurs za dva tydni?
Na piatnicu, 23 śniežnia, Nacyjanalny bank vyznačyŭ kurs 2,7370 rubla za 1 dalar ZŠA. Dva tydni raniej dalar pa kursie Nacbanka kaštavaŭ 2,4778. Takim čynam, za dva tydni biełaruski rubiel u adnosinach da amierykanskaj valuty patańnieŭ na 26 kapiejek.
Jeŭra za hety pieryjad padaražeŭ na 32 kapiejki. U adnosinach da rasijskaha rubla biełaruski, naadvarot, umacavaŭsia. U pazaminułuju piatnicu Nacbank aceńvaŭ 100 rasijskich rubloŭ u 3,9504 biełaruskaha. Zhodna z kursam, ustanoŭlenym na zaŭtra, 100 rasijskich rubloŭ buduć kaštavać 3,7985 biełaruskaha.
Nafta ŭpłyvaje na kursy
Ekśpiertka Beroc Nastaśsia Łuzhina tłumačyć takija pavodziny biełaruskaha rubla tym, što jon paŭtaraje trajektoryju rasijskaha, kurs jakoha staŭ prasiadać na fonie novych sankcyj i trochi nižejšych cenaŭ na naftu.
«Heta źviazana z novymi abmiežavańniami ŭ dačynieńni da Rasii i padzieńniem cenaŭ nafty na suśvietnym rynku. Cana za baral rasijskaj nafty Urals ciapier znachodzicca navat na bolš nizkim uzroŭni, čym uviedzienaja dla jaje stol 60 dalaraŭ za baral. Usio heta niehatyŭna adbivajecca na ekspartnych dachodach RF, tamu ich rubiel słabieje», — tłumačyć ekśpiertka.
Pa słovach Łuzhinoj, biełaruski rubiel chaj i nie całkam, ale šmat u čym paŭtaraje trajektoryju rasijskaha, tamu jaho źnižeńnie ŭ adnosinach da dalara i jeŭra na fonie padzieńnia rasijskaha rubla vyhladaje całkam čakanym.
Biełaruski rubiel umacoŭvajecca da rasijskaha
Umacavańnie biełaruskaha rubla ŭ adnosinach da rasijskaha ekanamistka tłumačyć tym, što ŭ vyniku imklivaha rostu kursu rasijskaha rubla ŭ siaredzinie hoda biełaruski patańnieŭ da rasijskaj valuty na 30% i navat bolš adsotkaŭ u paraŭnańni z pačatkam hoda.
«Biełaruski rubiel tak chutka nie ŭmacoŭvaŭsia da ćviordych valut i adpaviedna — tańnieŭ da rasijskaha. Tamu ciapier jon prosta adyhryvaje pazicyi. Na ciapierašni momant roźnica ŭ kursie skaraciłasia da 10,5% z pačatku hoda. Na padstavie hetaha my možam mierkavać, što, choć biełaruski rubiel i budzie šmat u čym paŭtarać trajektoryju rasijskaha, u biahučaj situacyi jon abiasceńvajecca da dalara pavolniej».
«Devalvacyja rasijskaha rubla vyhadnaja rasijskim eksparcioram»
Na dumku Łuzhinoj, kali ŭ blizkim časie nie adbudziecca nijakich hłabalnych źmien, to rasijskaja valuta ŭ nastupnym hodzie moža praciahnuć pastupovaje źnižeńnie. Razam ź joj budzie źmianiacca i kurs biełaruskaha rubla.
«Kali prasiadańnie rasijskaha rubla praciahniecca, to heta budzie adbyvacca płaŭna, biez rezkich vahańniaŭ», — ličyć jana.
Taksama ekśpiert adznačaje, što ŭmieranaja devalvacyja nacyjanalnaj valuty nie tolki nie pałochaje Rasiju, ale i budzie dla jaje šmat u čym karysnaj, bo rubiel byŭ pieraacenieny.
«Heta budzie vyhadna dla ekspartu», — adznačaje ekśpiert.
Što tyčycca padaražeńnia jeŭra na 32 kapiejki za dva tydni, to hety praces tłumačycca tym, što za hety pieryjad jeŭrapiejskaja valuta ŭmacavałasia ŭ adnosinach da amierykanskaj. Jak vynik — jeŭra ŭ Biełarusi padaražeŭ na 6 kapiejek bolš, čym dalar.
«Naša Niva» — bastyjon biełaruščyny
PADTRYMAĆČytajcie taksama: Urad anansuje mahčymaje asłableńnie rehulavańnia cen
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin9
Kamientary
https://nashaniva.com/306039