Vierchniaja płanka ŭzrostu pryzyvu na terminovuju słužbu ŭ armiju moža być pavialičanaja da 30 hadoŭ (ciapier 27) užo padčas viasnovaj pryzyŭnoj kampanii 2023 hoda, pry hetym nižniaja płanka zastaniecca raniejšaj — 18 hadoŭ, vykazaŭ zdahadku kiraŭnik kamiteta Dziarždumy pa abaronie Andrej Kartapołaŭ.
Kartapołaŭ — nie prosta deputat, jon były namieśnik ministra abarony Rasii i aŭtar niekalkich papravak u zakony ab vajskovaj słužbie, uniesienych u Dziarždumu letaś (niekatoryja pryniatyja) i źviazanych z vajnoj suprać Ukrainy.
Źmianić ramki pryzyŭnoha ŭzrostu 21 śniežnia prapanavaŭ ministr abarony Siarhiej Šajhu — heta adna ź jaho inicyjatyŭ pa reformie armii, ź jakimi Šajhu vystupiŭ pierad prezidentam Uładzimiram Pucinym na štohadovaj kalehii Minabarony. Dasłoŭna ministr skazaŭ: «paetapna pavialičyć uzrost pryzyvu hramadzian z 18 da 21 hoda, a hraničny — pavysić da 30 hadoŭ».
Ciapier deputat Kartapołaŭ kaža ab pierachodnym varyjancie, pry jakim pavieličeńnia nižniaj miažy pakul nie budzie, a hraničnaha — budzie (choć papraŭki ab źmienie uzrostavych miežaŭ jašče nie ŭchvaleny i navat nie ŭniesieny).
Na pieršym časie buduć pryzyvać «pa źmiešanym typie» — heta značyć, ludziej ad 18 da 30 hadoŭ. Poŭny ž pierachod da novaj sistemy, pry jakoj minimalny pryzyŭny ŭzrost budzie składać 21 hod, a hraničny — 30 hadoŭ, zojmie ad adnaho hoda da troch, paviedamiŭ Kartapołaŭ.
Ekśpierty stanoŭča acanili samu ideju pryzyvać u armiju z 21 hoda, a pavyšeńnie hraničnaha ŭzrostu da 30 hadoŭ ŭspryniali naściarožana i źviazali ź nieabchodnaściu zabiaśpiečyć rasijskija vojski ludźmi ŭ kantekście vajny suprać Ukrainy.
Kartapołaŭ nie chavaje, što pašyreńnie uzrostavych ramak nieabchodnaje dla vyrašeńnia prablemy z kolkaściu sałdat: «umoŭna kažučy, u padparadkavańni vajenkamata znachodziacca 100 čałaviek va ŭzroście ad 21 hoda da 30 hadoŭ, jakija nie prachodzili vajennuju słužbu i nie mieli na toje dastatkovych padstaŭ. A vajennaje zadańnie — 200 čałaviek. Adpaviedna, pałovu ź ich składuć ludzi va ŭzroście 18 hadoŭ, jak i było raniej, pałovu — ludzi ad 21 hoda da 30 hadoŭ».
Akramia źmieny pryzyŭnoha ŭzrostu Šajhu prapanavaŭ Pucinu pavialičyć kolkaść vajskoŭcaŭ da 1,5 młn čałaviek. Pucin prapanovy Šajhu padtrymaŭ.
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja5
Kamientary