Zialenski: Ustupleńnie Biełarusi ŭ vajnu było b vielizarnaj pamyłkaj
Prezident Ukrainy Uładzimir Zialenski daŭ intervju mižnarodnamu ahladalniku Bi-bi-si Džonu Simpsanu. Jon adchiliŭ mahčymaść jakich-niebudź terytaryjalnych sastupak Rasii.
U adkaz na pytańnie ab mahčymaści kampramisu z rasijskim lidaram Uładzimiram Pucinym Zialenski zajaviŭ:
«Ciońnia naša vyžyvańnie, naša jadnańnie — adna meta. My idziom u Jeŭropu, Ukraina vybrała hety šlach. Usio heta niemahčyma stracić. Ukraina choča harantyj biaśpieki, usie my chočam — my abjadnanyja. Tamu jakija-niebudź terytaryjalnyja kampramisy buduć tolki asłablać našu dziaržavu. Pytańnie ž nie ŭ słovie «kampramis». Navošta jaho bajacca? U nas miljon kampramisaŭ u žyćci. Jany kožny dzień adbyvajucca. Pytańnie — z kim. Kampramis z Pucinym? Nie! Čamu? Bo niama viery», — skazaŭ jon.
Zialenski dadaŭ, što jakija-niebudź kampramisy ŭ dačynieńni da Danbasa, Kryma abo paŭdniovych terytoryj Ukrainy buduć «bombaj u centry našaj krainy i bombaj u centry Jeŭropy».
Taksama Zialenski zakranuŭ adnosiny z Alaksandram Łukašenkam, jaki ŭ čaćvier zajaviŭ, što hatovy ŭstupić u vajnu suprać Ukrainy, kali «adtul choć adzin sałdat pryjdzie na terytoryju Biełarusi zabivać» jaho ludziej.
«Ja spadziajusia, što Biełaruś nie dałučycca da vajny. Kali heta adbudziecca — my budziem zmahacca i vyžyviem», — skazaŭ Zialenski, dadaŭšy, što stanavicca płacdarmam dla napadu rasijskaha vojska suprać Ukrainy było b dla Biełarusi vielizarnaj pamyłkaj.
Ciapier čytajuć
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?14
Kamientary
A pytańnie ŭstupleńnia ŭ vajnu najaŭnaha łukašienskaŭskaha vojska (padnačalenaha Rasiei) budzie zaležyć ad pośpiechaŭ novaj vajskovaj kampanii hetaha hoda. Kali pośpiech budzie vidavočny - biezumoŭna, što apryčniki Łukašienki dałučacca. Kali praciahniecca miasarubka, to viadoma Pucin dazvolić pakinuć apryčnaje vojska Łukašienki ŭ spakoi