Litva prapanuje ŭzmacnić žorstkaść pakarańnia za parušeńnie sankcyj
Litoŭskaje MZS prapanuje ŭnieści papraŭki ŭ zakon ab mižnarodnych sankcyjach i dać Litvie mahčymaść uvodzić nacyjanalnyja sankcyi, kali heta nie supiarečyć mižnarodnym abaviazacielstvam krainy i zakonam Jeŭrasajuza. Nacyjanalnyja sankcyi ŭvodzilisia b i adklikalisia b z dapamohaj zakona, jaki parłamientu pradstaŭlaŭ by ŭrad z padačy ministra adpaviednaj śfiery. Akramia taho, MZS choča na nacyjanalnym uzroŭni zrabić bolš žorstkaj adkaznaść za abychod sankcyj, piša Delfi.lt.
Jurydyčnym asobam za parušeńnie sankcyj prapanujuć pryznačać nastupnyja spahnańni:
- štraf u pamiery ad 50 da 100% koštu tavaraŭ, jakija byli pradmietam parušeńnia sankcyj, ale nie mienš za 10 tys. jeŭra;
- štraf ad 10 da 50 tys. jeŭra, kali parušeńnie sankcyj nie tyčycca tavaraŭ, pasłuh abo jakich-niebudź srodkaŭ.
Za paŭtornaje parušeńnie na praciahu hoda prapanavana štrafavać u pamiery 5% ad hadavoha dachodu. Moža być pryznačanaja kanfiskacyja tavaraŭ abo srodkaŭ, źviazanych z parušeńniem sankcyj.
U inšym prajekcie zakona MZS prapanuje ŭvieści novyja nacyjanalnyja sankcyi za ahresiju suprać Ukrainy. Havorka idzie pra spynieńnie razhladu i pryniaćcia rašeńniaŭ pa zajaŭkach hramadzian Rasii i Biełarusi na vydaču viz u pradstaŭnictvach Litvy za miažoj, za vyklučeńniem vypadkaŭ, kali ŭ takich pytańniach pasrednikam vystupaje MZS.
Pakiet papravak, padrychtavanych MZS, pavinien zaćvierdzić urad, paśla čaho jany pastupiać u parłamient.
Ciapier čytajuć
Kruiz na ciepłachodzie «Biełaja Ruś» pa rekach Paleśsia kaštuje jak adpačynak u Turcyi. Ale kajuty na viasnu-leta amal vykuplenyja6
Kamientary