«Atrymlivaju kala 4600 dalaraŭ». Hety minčuk užo niekalki miesiacaŭ nie pracuje, ale praciahvaje atrymlivać zarobak
Nie pracavać i atrymlivać hrošy — hučyć jak mara. Ale dla niekatorych IT-śpiecyjalistaŭ heta realnaść. Minčuk Jaŭhien trapiŭ mienavita ŭ takuju situacyju — i raskazvaje vydańniu CityDog.io, jak jamu takoje žyćcio.
Pra rełakiejt: «24 lutaha 2022-ha ŭzmacniŭsia namier aficyjna pracaŭładkavacca ŭ varšaŭskim ofisie»
«Ja pracuju ŭžo kala 6 hadoŭ u aŭtsorsinhavaj kampanii, śpiecyjalizujusia na raspracoŭcy mabilnych aplikacyj pad Android. U nas jość pradstaŭnictvy ŭ roznych krainach, i pa rełakiejcie vielmi šmat našych supracoŭnikaŭ pierajechała ŭ Litvu, Polšču, Kazachstan i Hruziju.
Doŭhi čas ja razhladaŭ, choć i nieachvotna, varyjant ź pierajezdam u inšuju krainu — ad hetych dumak mianie strymlivali patencyjnyja ciažkaści, źviazanyja ź lehalizacyjaj, vyvučeńniem novaj movy, niekatoryja asabistyja pryncypy i, mahčyma, patałahičnaja lanota. Ale paśla čarady zatrymańniaŭ i pieratrusaŭ u maich znajomych i jašče bolš imklivaj izalacyi našaj krainy ja padumaŭ: «A ź inšaha boku, my tak daŭno nie padarožničali, «novy ofis u novaj krainie» hučyć zusim nie tak užo i drenna, čamu b i nie».
Tamu my z žonkaj za vychadnyja sabralisia i źjechali ŭ Polšču. Instahramnyja fotki maich siabroŭ, dzie jość palmy, mora i anamalna ciopłaje nadvorje, časam prymušajuć mianie sumniavacca ŭ majoj fantazii, ale tut taksama možna žyć.
Paźniej my z žonkaj viarnulisia, naviedali svajakoŭ, pažyli na radzimie niekatory čas. Ale 24 lutaha 2022-ha ŭ nas źlohku ŭzmacniŭsia namier praciahnuć praces lehalizacyi i aficyjna pracaŭładkavacca ŭ varšaŭskim ofisie.
Jak heta — nie pracavać i atrymlivać hrošy: «Davodzicca razhladać napierad i inšyja miescy pracy, kab byŭ alternatyŭny varyjant»
Jašče da taho, jak ja padpisaŭ damovu ab pracy, u mianie ŭžo byŭ aktyŭny prajekt, kudy byli ŭciahnutyja jašče try raspracoŭščyki, teściroŭščyk i prajekt-mieniedžar. Prajekt byŭ dastatkova pierśpiektyŭny, u cełym usio išło niadrenna. A ŭ studzieni ad našych pasłuh admovilisia — i ja adpraviŭsia na łaŭku zapasnych, dzie da hetaha času i siadžu.
Miarkujučy pa tym, što ja čuju ad siabroŭ, spravy ŭ inšych kampanijach plus-minus iduć hetak ža i niamała ludziej akazałasia ŭ padobnym stanie. Ale heta, viadoma, zaležyć ad rynku, krainy i ad śfiery ŭ tym liku — mahčyma, u napramku fuł-stek abo devops znajści zamovu atrymajecca chutčej.
Tym nie mienš, z-za kryzisu i inflacyi klijenty imknucca ekanomić, a viendaram znajści novyja prajekty stanovicca ŭsio ciažej z-za vialikaj kankurencyi ŭ tym liku.
Jak siadzicca na benčy? Heta vielmi ciažka. Zarpłata zastałasia na tym ža ŭzroŭni (atrymlivaju 20000 złotych — heta kala 4600 dalaraŭ), i mnie stabilna płaciać, ale ciapier ciažki čas, i niaredka naviedvajuć tryvožnyja dumki. Kampanii prypyniajuć nabor supracoŭnikaŭ i robiać skaračeńni, tamu davodzicca razhladać napierad i inšyja miescy pracy, prachodzić intervju, kab byŭ alternatyŭny varyjant.
Časam mianie dałučajuć da ŭnutranych iventaŭ: naprykład, vebinary — dla tranśfieru viedaŭ, dla abmienu cikavaj infarmacyjaj, navinami. Taksama ja sam praciahvaju padtrymlivać svoj uzrovień, pakrysie raźvivacca, vyvučać novyja technałohii, zapaŭniać prabieły. Naprykład, kali baču ŭ steku technałohij siarod patrabavańniaŭ adkrytaj vakansii niešta, z čym raniej nie pracavaŭ, to pačynaju heta vyvučać. Sprabavaŭ pahłybicca ŭ React Native i Flutter — nabory instrumientaŭ dla raspracoŭki krospłatformiennych prahram.
Imknusia taksama padtrymlivać anhlijskuju i ŭ cełym być hatovym da luboha intervju.
Navyki nieabchodna padtrymlivać, ale ŭsio ž taki byvaje nialohka vykraić dla hetaha čas: varta nie zabyvacca i pra vyvučeńnie roznaha materyjału, novych trendaŭ, papularnaha medyjakantentu, asartymientu ŭ kramach.
Mnie padabajecca mastactva, ja lublu kiniematohraf, mahu skazać, što ja vialiki amatar pahladzieć roznyja sieryjały i filmy, imknusia nie zabyvać taksama vydzialać na heta svoj čas. Jašče čas patrebny na pajezdki za pakupkami, trenažornuju zału, spa, kulturnyja prahramy, prahułki na śviežym pavietry — usio heta, viadoma, treba, tak. I tamu ciažka znajści čas na absalutna ŭsio.
A što dalej: «Ci zadavalniaje mianie takaja situacyja? Adnaznačna skažu: nie»
Ja nie lublu niavyznačanaść. Vielmi spadziajusia, što ŭ chutkim časie ŭsio raźvierniecca ŭ lepšy bok i źjavicca ŭpeŭnienaść u zaŭtrašnim dni. Ale infarmacyi pra toje, kali moža źmianicca situacyja, niama.
A jak vyrašajucca prablemy z boku kiraŭnictva i nakolki ŭsio drenna — pra heta, viadoma, nichto nie raspaŭsiudžvajecca. Kropkava i indyvidualna imknucca vyrašać usie pytańni, šukać klijentaŭ i ŭtrymlivać daśviedčanych raspracoŭščykaŭ tak doŭha, kolki heta mahčyma.
Sprahnazavać, nakolki doŭha ŭsio heta jašče budzie doŭžycca, ja nie mahu: mahčyma, hod ci bolš — heta naŭprost źviazana z ekanamičnym kryzisam. Paśla taho, jak situacyja ŭ śviecie pačnie pacichu naładžvacca, inviestary znoŭ buduć układvać hrošy jak u prybytkovyja prajekty, tak i ŭ startapy.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant26
Kamientary