Futbalist anhlijskaj premjer-lihi robić paśpiachovuju rep-karjeru, ale nosić masku i nie raskryvaje asobu
Padazrajuć, što heta niechta z «Arsienała».
Futbalisty ŭžo daŭno pačali nadavać asablivuju ŭvahu svajoj miedyjnaj paznavalnaści i raźvivacca nie tolki ŭ sporcie, ale i ŭ inšych kirunkach. Niaredka hulcy sprabujuć siabie ŭ muzycy, pryčym heta nie cacka tolki dla małaviadomych futbalistaŭ — paŭnavartasny trek jość u Alfonsa Devisa, a ŭ Rafaeła Leaŭ jość ceły mini-albom, niekalki samastojnych relizaŭ i klipaŭ, jakija jon vypuskaje pad psieŭdanimam WAY 45.
Niadaŭna ŭ ciecivie źjaviŭsia klip na trek Thrill vykanaŭcy Dide. Jon imhnienna nabraŭ papularnaść i vyklikaŭ vialikuju kolkaść čutak nakont taho, chto ž moža być hetym zahadkavym ananimnym repieram, jaki zjaŭlajecca na videa ŭ mascy i nie pakazvaje svoj tvar. Z-za źmiestu pieśni pačali raspaŭsiudžvacca čutki, što heta moža być futbalist, jaki hulaje ŭ kamandzie APŁ.
«Switch sides swiftly, then I'm onside chippin' // Catch me online 'cause my team stay winning // You know how it is // They're gonna put it in the paper like, «Which baller is this?» // I hide my face and wear the mask in the vids»
(«Chutka mianiaju kirunak, potym ja padklučajusia zboku [z fłanha] // Złavi mianie anłajn, tamu što maja kamanda praciahvaje pieramahać // Jany vyjduć z zahałoŭkami «Što heta za hulec?»//Ja chavaju tvar i našu masku na videa»)
Tut vykanaŭca čytaje pra toje, jak jon chutka mianiaje bok (namiok na źmienu fłanhaŭ na poli i pazicyju — vinhier), pra toje, što jahonaja kamanda praciahvaje pieramahać i što paśla vychadu treka jany (heta značyć miedyja i fanaty) buduć sprabavać zrazumieć, što ž heta za futbalist, jaki chavaje svoj tvar pad maskaj.
Uličvajučy hetyja radki, ich sens i fanatyzm ad muzyki (a mienavita brytanskaha dryła) i ŭsiaho hanhstarskaha ŭ niekatorych hulcoŭ APŁ, asabliva ŭvažlivyja fanaty adrazu sfarmavali šort-list futbalistaŭ, jakija mohuć chavacca pad maskaj Dide: tut lidar «Krystał Pełas» Uiłfred Zaa, vinhier «Čełsi» Noni Maduekie (choć u jaho vypadku zusim niezrazumiełyja radki pra pieramohi, tamu hety varyjant adkinuli davoli chutka), a taksama futbalisty «Arsienała» Bukajo Saka i Edzi Nkiecija.
Mienavita apošni pasuje bolš za ŭsio, a zaŭziatary kananiraŭ upeŭnienyja, što Dide — heta dakładna Nkiecija i nie chto inšy. Hałoŭny arhumient na karyść hetaj teoryi hruntujecca na tym, što Dide — heta anahramy słova Eddi, to-bok imia futbalista «Arsienała» (choć na anhlijskaj jano pišacca jak Eddie).
U brytanskaj presie Dide imhnienna achryścili futbalistam APŁ u mascy, faktyčna adkinuŭšy lubyja inšyja varyjanty.
A na staroncy vykanaŭcy ŭ instahramie jon vielmi ŭdała žartuje z svajoj aŭdytoryi. To zrobić publikacyju z podpisam «repier, kali doma, futbalist, kali na poli», to apublikuje fota, dzie pakazvaje palcam na svaju masku z pytańniem «Chto taki Dide?! (kamienty tut — šedeŭr na šedeŭry. Kažuć, što na samoj spravie heta Džejms Miłnier, Chary Kiejn ci navat Chary Mahuajer).
Adna z samych papularnych dumak, što na samaj spravie nijakaha «ananimnaha futbalista APŁ u mascy, jaki raździraje rep-scenu», niama, a Dide — heta prosta talenavity muzykant i fienamienalny markietołah, jaki, vydatkavaŭšy minimum času i resursaŭ, prymusiŭ havaryć pra siabie ŭvieś anhlijski futbolny śviet. Adnak ni sam Edzi Nkiecija, ni inšyja hulcy, jakich na poŭnym surjozie razhladajuć na rolu Dide, svajo dačynieńnie abo niedatyčnaść da prajekta nijak nie kamientujuć i robiać usiu hetuju situacyju jašče bolš zabłytanaj i miedyjna cikavaj.
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?10
Kamientary