Maskoŭskaja kamanda KVZ pažartavała pra Pryhožyna, Łukašenku i elektronnyja pozvy
U siecivie abmiarkoŭvajuć vystupleńnie maskoŭskaj kamandy KVZ. Jaje žarty byli davoli śmiełymi dla konkursu, jaki pakazvajuć na rasijskim «Pieršym kanale» i jaki ličycca palityzavanym.
Uvahu pryciahnuła kamanda Maskoŭskaha avijacyjnaha instytuta — «Zbornaja MAI». Jana była stvoranaja ŭ 2022 hodzie i ŭ tym ža hodzie paśla vystupleńnia na Mižnarodnym fiestyvali «KiViN-2022» u Sočy atrymała prava vystupić u Vyšejšaj lizie.
U hulni čverćfinała vyšejšaj lihi KVZ, jakaja prajšła 22 krasavika, kamanda žartavała na temy, źviazanyja z vajnoj i inšymi rasijskimi realijami.
Tak, kali ŭ adnaho z hulcoŭ zapilikaŭ telefon, toj adrazu jaho vykinuŭ.
«Paviedamleńnie ad «Dziaržpasłuh», paśla pahladžu», — skazaŭ jon (u Rasii ŭvodziać elektronnyja pozvy, jakija vajenkamaty buduć rassyłać praz sajt «Dziaržpasłuhi»).
Padčas scenki kamanda pradstaviła «pieršy rasijski bartavy kampjutar sa štučnym intelektam «Čaburaška».
Dalej adbyvajecca nastupny dyjałoh:
— Čamu «Čaburaška»?
— Heta ironija. Taksama siem miljardaŭ. Tolki zatračana.
Hulec uklučaje kampjutar i jon pačynaje razmaŭlać hołasam, vielmi padobnym da hołasu Łukašenki. U adkaz na pytańnie, čamu taki hołas, kamanda daje tłumačeńnie:
— My padumali, łahična, kali štučny intelekt budzie razmaŭlać družalubnym hołasam. Da taho ž, z takim hołasam było praściej siem miljardaŭ prasić.
Paśla pažartavali, što «Askołkava» — heta toje, što zastałosia rasijskaha inavacyjnaha centra «Skołkava» paśla sankcyj.
Kali prydumany bartavy kampjutar u numary nibyta pačaŭ pomścić i staŭ hienieravać hołas adnaho z hulcoŭ kamandy, toj staŭ apraŭdvacca.
— Pavažanyja žury, heta nie ja, heta niejrasietka maim hołasam hadaści kaža.
— Čaho vy admazvajeciesia, jak Iosif Pryhožyn, — papraknuŭ jaho inšy hulec.
Heta adsyłka da vykładzienaj u sieciva razmovy, jakaja była niby pamiž muzyčnym pradziusaram Pryhožynym i miljarderam Farchadam Achmiedavym. Hałasy na zapisie ŭ rezkich vyrazach krytykujuć ułady Rasii. Pryhožyn paśla zajaviŭ, što heta fejk i namiaknuŭ na mahčymaści štučnaha intelektu.
Cikava, što «Zbornaja MAI» stała pieramožcaj hetaj hulni.
Čytajcie jašče:
Frantmien «Doktara Chausa»: Mužčyna lepš piša žarty, bo jon bolš pradukcyjny
Łukašenku stała drenna na samicie ŠAS u Kazachstanie — Dožd́7
Kamientary
Nijakich "volnaściaŭ" tam niama i by nia moža!!!